தாய்மாமன் தங்க மோதிரம் திட்ட விதிகளில் தளர்வு! தமிழக அரசு அரசாணை வெளியீடு!

தமிழ்நாட்டில் அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் தாய்மாமன் தங்க மோதிரம் திட்டத்தின் நிபந்தனைகளில் முக்கியத் தளர்வுகளை மேற்கொண்டு, வெளிமாநிலங்களில் திருமணமாகி வசித்து வந்தாலும் பெற்றோர் தமிழகத்தில் வசித்தால் அவர்களது குழந்தைகளுக்கும் தங்க மோதிரம் வழங்கப்படும் எனத் தமிழ்நாடு அரசு மக்கள் நல்வாழ்வுத்துறை அறிவித்துள்ளது.

தமிழகத்தில் உள்ள அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் 'தாய்மாமன் தங்க மோதிரம் திட்டம்' கடந்த 28.09.2026 அன்று தமிழ்நாடு முதலமைச்சரால் முறைப்படி தொடங்கி வைக்கப்பட்டுச் செயல்படுத்தப்பட்டு வருகிறது. இத்திட்டத்திற்காக முன்னதாக வெளியிடப்பட்ட அரசாணையின்படி, தமிழ்நாட்டில் நிரந்தரமாக வசிக்கும் தாய்மார்களுக்கு மட்டுமே இத்திட்டம் பொருந்தும் என நிபந்தனை விதிக்கப்பட்டிருந்தது.

இந்நிலையில், தமிழகத்தைப் பூர்வீகமாகக் கொண்ட பெண்கள் வெளிமாநிலங்களில் திருமணமாகி வசித்து வந்தாலும், பிரசவத்திற்காகத் தங்களது தாய் வீட்டிற்குத் தமிழ்நாட்டிற்கு வந்து அரசு மருத்துவமனைகளில் பிரசவம் மேற்கொள்ளும் நிகழ்வுகள் அரசின் கவனத்திற்கு வந்தன.

இதையும் படிங்க: குடிமகன்களால் தொல்லை..! எடுத்த நடவடிக்கை என்ன? தமிழக அரசுக்கு ஐகோர்ட் உத்தரவு!

குறிப்பாக, சிவகங்கை மாவட்டம் காரைக்குடியைப் பூர்வீகமாகக் கொண்ட உமா மகேஸ்வரி என்பவர், கர்நாடக மாநிலம் மைசூருவில் கணவருடன் வசித்து வந்த நிலையில், பிரசவத்திற்காகக் காரைக்குடியில் உள்ள தனது பெற்றோர் வீட்டிற்கு வந்தார். தொடர்ந்து கடந்த 17.09.2026 அன்று காரைக்குடி அரசு தலைமை மருத்துவமனையில் அவருக்கு அறுவை சிகிச்சை மூலம் குழந்தை பிறந்தது. ஆனால், தாயார் வெளிமாநிலத்தில் வசிப்பவர் என்ற காரணத்தினால் ஆரம்பத்தில் அக்குழந்தைக்குத் தங்க மோதிரம் வழங்க முடியாத சூழல் ஏற்பட்டது. இதனை மனிதாபிமான அடிப்படையில் கனிவுடன் பரிசீலித்த தமிழக அரசு, திட்டத்தின் வழிகாட்டுதல்களில் உடனடித் தளர்வுகளைச் செய்து புதிய உத்தரவைப் பிறப்பித்துள்ளது. 

தமிழ்நாட்டில் உள்ள அரசு மருத்துவமனைகளில் பிறக்கும் குழந்தையின் தாய் தமிழ்நாட்டில் பிறந்து, திருமணமாகி வெளிமாநிலத்திற்குச் சென்றிருந்தாலும், அத்தாயின் தாய் மற்றும் தந்தையர் இருவரும் தமிழ்நாட்டில் நிரந்தரமாக வசிப்பவர்களாக இருந்து, அதற்கான உரிய ஆவணங்கள் சமர்ப்பிக்கப்பட்டால், அந்தக் குழந்தைக்கும் 'தாய்மாமன் தங்க மோதிரம்' திட்டத்தின்கீழ் 1 கிராம் தங்க மோதிரம் வழங்கப்படும்.

இப்புதிய தளர்வின் அடிப்படையில், காரைக்குடி அரசு மருத்துவமனையில் பிறந்த உமா மகேஸ்வரியின் குழந்தைக்கு இன்று (07.10.2026) வட்டார மருத்துவ அலுவலரால் ஒரு கிராம் தங்க மோதிரம் வழங்கப்பட்டது. மேலும், இந்த விதிமுறைத் தளர்வானது கடந்த 22.06.2026 முதல் அரசு மருத்துவமனைகளில் பிறந்த அனைத்துக் குழந்தைகளுக்கும் முன்தேதியிட்டுப் பொருந்தும் என மக்கள் நல்வாழ்வு மற்றும் குடும்ப நலத்துறை அரசுச் செயலாளர் தனது செய்திக்குறிப்பில் தெரிவித்துள்ளார்.

இதையும் படிங்க: தமிழகத்தில் மேற்கு ஆஸ்திரேலியா பல்கலைக்கழகம்: மார்க்சிஸ்ட் கம்யூனிஸ்ட் கட்சி கண்டனம்!