இனி வாரம் 2 நாள் லீவு..!! வேலை நேரமும் மாற்றமாம்..!! குஷியில் அரசு ஊழியர்கள்..!!
அரசு அலுவலகங்கள் இனி வாரத்தில் 5 நாட்கள் மட்டுமே செயல்படும் என்று திரிபுரா முதல்வர் மாணிக் சாஹா அறிவித்துள்ளார்.
- Wed, 10 Jun 2026 16:49:19 IST
by
Shanthi M.
- #
வடகிழக்கு மாநிலங்களில் ஒன்றான திரிபுராவில் பாஜக ஆட்சியின் கீழ் செயல்படும் அரசு, ஊழியர்களின் நீண்டகால கோரிக்கையை நிறைவேற்றியுள்ளது. முதலமைச்சர் மாணிக் சாஹா தலைமையில் எடுக்கப்பட்ட இந்த முடிவின்படி, இனி மாநிலம் முழுவதும் உள்ள அரசு அலுவலகங்களில் அனைத்து சனிக்கிழமைகளும் விடுமுறை அளிக்கப்படும். இதனால் சனி-ஞாயிறு என இரண்டு நாட்கள் முழு வார விடுமுறை கிடைக்கும்.
இதற்கு முன்பு மாதத்தின் 2ஆம் மற்றும் 4ஆம் சனிக்கிழமைகளில் மட்டுமே அலுவலகங்கள் மூடப்பட்டன. மற்ற சனிக்கிழமைகளில் பணி செய்ய வேண்டியிருந்தது. ஐடி துறை உள்ளிட்ட தனியார் நிறுவனங்களைப் போல அரசு ஊழியர்களும் வாரத்தில் இரண்டு நாட்கள் ஓய்வு பெற வேண்டும் என்ற கோரிக்கை பல ஆண்டுகளாக எழுப்பப்பட்டு வந்தது. வேலை-வாழ்க்கை சமநிலை (Work-Life Balance) மேம்படுத்தி, குடும்பத்துடன் அதிக நேரம் செலவிட முடியும் என ஊழியர்கள் வலியுறுத்தினர்.
முதலமைச்சர் மாணிக் சாஹா இந்தக் கோரிக்கையை ஏற்று உத்தரவு பிறப்பித்துள்ளார். புதிய மாற்றத்தின்படி, அரசு அலுவலகங்களின் பணி நேரமும் மாற்றியமைக்கப்பட்டுள்ளது. முன்பு காலை 10 மணி முதல் மாலை 5 மணி வரை இருந்த பணி நேரம், இனி காலை 9 மணி முதல் மாலை 6 மணி வரை இருக்கும். இதன்மூலம் வாரத்தில் இரண்டு நாட்கள் விடுமுறை வழங்கப்பட்டாலும், அரசு சேவைகள் மற்றும் நிர்வாகத் திறன் பாதிக்கப்படாமல் பார்த்துக் கொள்ள முடியும் என அரசு தரப்பு நம்பிக்கை வெளியிட்டுள்ளது.
இதையும் படிங்க: டெல்லியை உற்றுநோக்கும் அரசியல்..! ஜனாதிபதியுடன் முதல்வர் விஜய் சந்திப்பு..!!
இந்த முடிவு அரசு ஊழியர்கள் மத்தியில் பெரும் வரவேற்பைப் பெற்றுள்ளது. தலைமைச் செயலகத்தின் மூத்த அதிகாரி துலால் தேப் கூறுகையில், “இது ஒரு முற்போக்கான நடவடிக்கை. மத்திய அரசு மற்றும் பிற மாநிலங்களின் ஊழியர்களுக்கு இணையாக திரிபுரா ஊழியர்களும் சிறப்பாகப் பணியாற்ற இது உதவும். நீண்ட தூரப் பயணம் செய்யும் ஊழியர்களுக்கு தொடக்கத்தில் சற்று சிரமம் இருக்கலாம். ஆனால் விரைவில் அனைவரும் புதிய நேரத்துக்குப் பழகிவிடுவார்கள்” என்றார்.
வனத்துறையைச் சேர்ந்த டாக்டர் குயின் சர்மா, “மாதத்திற்கு நான்கு சனிக்கிழமைகளும் விடுமுறை கிடைப்பது மிகுந்த மகிழ்ச்சியளிக்கிறது. இது எங்கள் பணித் திறனை (Productivity) அதிகரிக்க உதவும். இந்த சிறந்த முயற்சிக்கு அரசுக்கு நன்றி” என்று தெரிவித்தார். திரிபுரா அரசின் இந்த நடவடிக்கை, வடகிழக்கு மாநிலங்களில் ஊழியர் நலனை மேம்படுத்தும் முக்கிய முயற்சியாகப் பார்க்கப்படுகிறது. அதிக உழைப்பு மற்றும் குறைந்த ஓய்வு காரணமாக ஏற்படும் மன அழுத்தத்தை குறைத்து, ஊழியர்களின் உடல்-மன நலத்தைப் பாதுகாக்கும் என எதிர்பார்க்கப்படுகிறது.
மேலும், புதிய பணி நேர அட்டவணை மக்களுக்கான அத்தியாவசிய சேவைகளை தடையின்றி தொடர உதவும்.
இந்த மாற்றம் அமலுக்கு வரும் தேதியை அரசு விரைவில் அறிவிக்கும் என எதிர்பார்க்கப்படுகிறது. திரிபுரா அரசின் இந்த முடிவு, பிற மாநிலங்களுக்கும் முன்னுதாரணமாக அமையும் என அரசு ஊழியர் சங்கங்கள் நம்பிக்கை தெரிவித்துள்ளன.
இதையும் படிங்க: திமுக தேர்தல் தோல்வி குறித்த கள ஆய்வு..!! மு.க.ஸ்டாலின் கைக்கு போன பரபரப்பு ரிப்போர்ட்..!!
