புதுச்சேரியில் உயருகிறது லாரி வாடகை..!! நாளை முதல் அமல்..!! எவ்வளவு தெரியுமா..??

பல ஆண்டுகளாக உயர்த்தப்படாத லாரி வாடகையை 15 சதவீதம் அதிகரிக்க முடிவு செய்துள்ளதாக புதுச்சேரி மினி லாரி உரிமையாளர்கள் மற்றும் முகவர்கள் சங்கம் அறிவித்துள்ளது. இந்த உயர்வு நாளை திங்கட்கிழமை முதல் நடைமுறைக்கு வருகிறது.

நேற்று மாலை மேட்டுப்பாளையம் கனரக வாகன மையத்தில் சங்கத்தின் பொதுக்குழு கூட்டம் நடைபெற்றது. மாநிலத் தலைவர் எம். முருகசாமி தலைமையில் நடைபெற்ற இந்தக் கூட்டத்தில், லாரி உரிமையாளர்களின் நீண்டகால கோரிக்கைகள் விரிவாக விவாதிக்கப்பட்டன. கூட்டத்துக்குப் பின்னர் செய்தியாளர்களைச் சந்தித்த முருகசாமி, புதுச்சேரியில் லாரி வாடகை பல ஆண்டுகளாக உயர்த்தப்படவில்லை என்று சுட்டிக்காட்டினார்.

“முதலமைச்சர் என். ரங்கசாமி கடந்த ஐந்து ஆண்டுகளாக டீசல் விலையை உயர்த்தவில்லை. தமிழகத்தைவிட ரூ.10 குறைவாகவே வைத்திருக்கிறார். இது வரவேற்கத்தக்கது. ஆனால், எங்களது வாழ்வாதாரம் பல மடங்கு பாதிக்கப்பட்டுள்ளது” என்று அவர் விளக்கினார்.

இதையும் படிங்க: புதுச்சேரி அமைச்சரவை விரிவாக்கத்திற்கு ஜனாதிபதி ஒப்புதல்..!! புதிய அமைச்சர்கள் நாளை பதவியேற்பு..??

டோல்கேட் கட்டணங்கள் ஆண்டுக்கு பல முறை உயர்த்தப்பட்டு பல மடங்கு அதிகரித்துள்ளதாகவும், டீசல் விலை உயர்வுடன் சேர்த்து வாகன உதிரி பாகங்கள், டயர், பேட்டரி உள்ளிட்ட அத்தியாவசிய பொருட்களின் விலையும் கணிசமாக உயர்ந்துள்ளதாகவும் முருகசாமி தெரிவித்தார். இதனால் லாரி உரிமையாளர்கள் மற்றும் ஓட்டுநர்களின் நிதி நிலைமை மோசமடைந்துள்ளது.

தமிழக மாநில லாரி உரிமையாளர்கள் சம்மேளனம் ஏற்கெனவே 25 சதவீதம் வாடகை உயர்வை அறிவித்த நிலையில், புதுச்சேரி சங்கம் தனது உறுப்பினர்களின் நலன் கருதி 15 சதவீதம் உயர்வை முடிவு செய்துள்ளது. இந்த முடிவு உடனடியாக அமலுக்கு வருவதால், சரக்கு போக்குவரத்துச் செலவு சற்று அதிகரிக்கும். இதனால் காய்கறி, பழங்கள், உணவுப் பொருட்கள் உள்ளிட்ட அத்தியாவசியப் பொருட்களின் விலையில் சிறிய அளவில் தாக்கம் ஏற்பட வாய்ப்புள்ளது என்றும் அவர் எச்சரித்தார்.

புதுச்சேரி சிறிய மாநிலம் என்பதால் மூன்று திசைகளிலும் டோல்கேட்கள் அமைக்கப்பட்டுள்ளன என்று முருகசாமி சுட்டிக்காட்டினார். குறிப்பாக பட்டானூர் டோல்கேட்டை உடனடியாக அகற்ற வேண்டும் என்று புதுச்சேரி அரசுக்கு வலியுறுத்தினார். சேலியமேட்டில் புதிதாக அமைக்கப்பட்ட டோல்கேட் அருகே சாலை நிலைமை மோசமாக உள்ளதால் விபத்துகள் அதிகரிக்கும் அபாயம் இருப்பதாக எச்சரித்தார்.

மதகடிப்பட்டு பகுதியிலும் டோல்கேட் அமைக்கப்பட்டிருப்பது லாரி ஓட்டுநர்களுக்கு பெரும் சிரமத்தை ஏற்படுத்துவதாகக் கூறினார். டோல்கேட் கட்டண உயர்வுக்கு எதிராக மத்திய அரசை கண்டித்து விரைவில் ஆர்ப்பாட்டம் நடத்தப் போவதாகவும் சங்கத் தலைவர் அறிவித்தார். லாரி உரிமையாளர்களின் நியாயமான கோரிக்கைகளை புதுச்சேரி அரசு உடனடியாக பரிசீலிக்க வேண்டும் என்று வேண்டுகோள் விடுத்தார்.

இந்த வாடகை உயர்வு முடிவு சங்க உறுப்பினர்களிடையே பெரும் வரவேற்பைப் பெற்றுள்ளது. நீண்ட காலமாகக் குவிந்து கிடந்த பிரச்னைகளுக்கு தீர்வு காணும் வகையில் இந்த நடவடிக்கை எடுக்கப்பட்டுள்ளதாக சங்க நிர்வாகிகள் தெரிவித்தனர். பொதுமக்களும், வர்த்தகர்களும் இந்த உயர்வை புரிந்துகொண்டு ஒத்துழைப்பு நல்க வேண்டும் என்று அவர்கள் கோரிக்கை விடுத்துள்ளனர்.

இதையும் படிங்க: புதுச்சேரி பெண்களுக்கு ஜாக்பாட்! குடும்பத் தலைவிகள் உதவித்தொகை ரூ.2500 ஆக உயர்வு!