மேகமலை மக்களின் உரிமை..! அரசுக்கு கள்ளமௌனம் ஏன்.? வேல்முருகன் கேள்வி..!!

தமிழக வாழ்வுரிமைக் கட்சி தலைவர் தி.வேல்முருகன், தேனி மாவட்டம் மேகமலை மற்றும் வருசநாடு மலைக்கிராம மக்களின் நிலவுரிமை தொடர்பான பிரச்சினையில் தமிழக அரசு உடனடியாக தலையிட வேண்டும் என வலியுறுத்தியுள்ளார். உச்சநீதிமன்றத் தீர்ப்பைக் காரணம் காட்டி பல தலைமுறைகளாக அப்பகுதியில் வாழ்ந்து வரும் எளிய மக்களை வாழ்விடங்களிலிருந்து வெளியேற்ற முனையும் நடவடிக்கை மிகுந்த வேதனையளிப்பதாக அவர் குறிப்பிட்டார்.

மேகமலை, வருசநாடு ஆகிய இடங்களில் பூர்வீக நிலங்களில் உழுதுண்டு வாழும் மக்கள் தங்கள் நிலவுரிமையைப் பாதுகாக்கக் கோரி உண்ணாநிலை, அறவழி மற்றும் காத்திருப்புப் போராட்டங்களை நாள்கணக்கில் தொடர்ந்து நடத்தி வருகின்றனர். இம்மக்களின் வாழ்வுரிமையை மீட்டெடுக்க பல்வேறு கட்சிகளும் அமைப்புகளும் களத்தில் இறங்கி போராடி வருகின்றன. தமிழக வாழ்வுரிமைக் கட்சியின் சார்பிலும் பல போராட்டங்கள் நடத்தப்பட்டுள்ளன. அண்மையில் மதுரையில் அனைத்துக் கட்சிக் கூட்டமைப்பின் சார்பில் நடைபெற்ற மாபெரும் கண்டன ஆர்ப்பாட்டத்தில் தாமும் கலந்துகொண்டு கண்டன உரையாற்றியதாக வேல்முருகன் தெரிவித்தார்.

இத்தனை போராட்டங்கள் தீவிரமாக வெடித்தும், தமிழ்நாடு முதலமைச்சர், வனத்துறை உள்ளிட்ட துறைசார்ந்த அமைச்சர்கள் அல்லது அப்பகுதி சட்டமன்ற உறுப்பினர்கள் எவருமே இவ்விவகாரத்தில் சிறிதளவும் அக்கறை காட்டவில்லை என அவர் குற்றஞ்சாட்டினார். மக்களை நேரில் சந்தித்து ஆறுதல் தெரிவிக்கவோ, அவர்களது கோரிக்கைகளைக் கேட்கவோ எவ்வித நடவடிக்கையும் எடுக்காமல் அரசு தொடர்ந்து கள்ள மௌனம் சாதிப்பது வன்மையாகக் கண்டிக்கத்தக்கது என்றார். வாக்களித்த குடிமக்களை நடுரோட்டில் தவிக்கவிட்டு வேடிக்கை பார்ப்பதுதான் மக்களாட்சியின் அழகா என அவர் கேள்வி எழுப்பினார்.

இதையும் படிங்க: மேற்கு வங்கத்தில் கிளை அலுவலகம் திறப்பா?... தவெக தலைமை வெளியிட்ட பரபரப்பு விளக்கம்...!

மேகமலை வனப்பகுதியில் வாழும் எட்டாயிரத்திற்கும் மேற்பட்ட பொதுமக்களை தங்கள் வாழ்விடங்களைவிட்டு அப்புறப்படுத்தத் துடிப்பது அப்பட்டமான அநீதி என வேல்முருகன் வலியுறுத்தினார். காடுகளைப் பேணிப் பாதுகாக்கும் பழங்குடி மற்றும் பாரம்பரியக் குடிகளின் வாழ்வைச் சிதைத்துவிட்டு, யாரைத் திருப்திப்படுத்த இந்த நடவடிக்கைகள் மேற்கொள்ளப்படுகின்றன என அவர் கேட்டார்.எனவே, தமிழக அரசு இனியும் அலட்சியம் காட்டாமல், வருசநாடு, மேகமலை மக்கள் தங்கள் வாழ்விடங்களிலிருந்து வெளியேற்றப்பட மாட்டார்கள் என்ற அதிகாரப்பூர்வ உத்தரவாதத்தை உடனடியாக வழங்க வேண்டும் என அவர் வலியுறுத்தினார்.

இதையும் படிங்க: “உங்களுக்கு வெட்கம், மானம், சூடு சொரணை இல்லையா?”... தவெகவுக்கு தாவியவர்களை விளாசித் தள்ளிய பிரேமலதா...!