உலக சுகாதார அமைப்பிலிருந்து வெளியேறிய அமெரிக்கா: சீனா மீதான அதிருப்தியால் ட்ரம்ப் அதிரடி!

உலக சுகாதார அமைப்பில் (WHO) இருந்து அமெரிக்கா அதிகாரப்பூர்வமாக விலகியுள்ளதாக வாஷிங்டன் இன்று அறிவித்துள்ளது. கொரோனா பெருந்தொற்று காலத்தில் உலக சுகாதார அமைப்பு 'சீனாவுக்கு ஆதரவாக' செயல்பட்டதாகவும், உண்மைகளை மறைத்ததாகவும் குற்றம் சாட்டி வந்த அமெரிக்க அதிபர் டொனால்ட் ட்ரம்ப், கடந்த ஆண்டே இதற்கான நிர்வாக உத்தரவில் கையெழுத்திட்டிருந்தார். ஒரு வருட கால அவகாசத்திற்குப் பிறகு, அந்த விலகல் முடிவு தற்போது நடைமுறைக்கு வந்துள்ளது.

உலக சுகாதார அமைப்பு தன்னைத்தானே சீர்திருத்திக்கொள்ளும் திறனை இழந்துவிட்டதாகவும், சில உறுப்பு நாடுகளின் அரசியல் செல்வாக்கிற்கு அது அடிபணிந்துவிட்டதாகவும் அமெரிக்க சுகாதார மற்றும் மனித சேவைகள் துறை மிகக் கடுமையான விமர்சனங்களை முன்வைத்துள்ளது. "பெருந்தொற்றை கையாண்ட விதம் முற்றிலும் தவறானது; அதனால் அமெரிக்காவிற்கு எந்தப் பயனும் இல்லை" எனக் கூறி இந்த விலகல் முடிவை அமெரிக்கா உறுதி செய்துள்ளது. இந்த வெளியேற்றத்தின் ஒரு பகுதியாக, 2024 மற்றும் 2025-ஆம் ஆண்டுகளுக்கான நிலுவைத் தொகையைச் செலுத்தவும் அமெரிக்கா மறுத்துவிட்டது.

அமெரிக்காவின் இந்தக் குற்றச்சாட்டுகளை உலக சுகாதார அமைப்பு முற்றிலுமாக மறுத்துள்ளது. இது குறித்துப் பேசிய அந்த அமைப்பின் இயக்குநர் ஜெனரல் டெட்ரோஸ் அதானோம் கெப்ரேயஸ், "அமெரிக்காவின் இந்த விலகல் அந்த நாட்டிற்கும் உலகிற்கும் ஒரு மிகப்பெரிய இழப்பு" என வருத்தம் தெரிவித்துள்ளார். பாரம்பரியமாக உலக சுகாதார அமைப்பின் மிகப்பெரிய நிதி ஆதாரமாக அமெரிக்கா இருந்து வந்தது. தற்போது அமெரிக்கா நிதி வழங்க மறுத்துள்ளதால், அந்த அமைப்பில் ஏற்கனவே பெரும் வேலை இழப்புகள் ஏற்பட்டுள்ளன. நிலுவைத் தொகையைச் செலுத்த அமெரிக்கா கடமைப்பட்டுள்ளது என வழக்கறிஞர்கள் வாதிட்டாலும், அதனை ஏற்க வாஷிங்டன் மறுத்துவிட்டதால் சர்வதேச சுகாதாரக் கட்டமைப்பு பெரும் நெருக்கடியைச் சந்தித்துள்ளது.

இதையும் படிங்க: இன்று அபுதாபியில் அமைதிப் பேச்சு: உக்ரைன் - ரஷ்யா - அமெரிக்கா முதல் முறையாக நேருக்கு நேர்!

இதையும் படிங்க: அமெரிக்காவிடம் இருந்து கடன்.. சிக்கித்தவிக்கும் நாடுகள்..!! லிஸ்ட்ல நம்ம நாடு இருக்கா..??