விடுதலை புலிகள் விவகாரம்...! முடியவே முடியாது..! வைகோ மனுவை தள்ளுபடி செய்த நீதிமன்றம்..!!

மதிமுக பொதுச்செயலாளர் வைகோ 2013-ஆம் ஆண்டு விடுதலைப் புலிகள் (LTTE) மீதான தடையை நீக்கக் கோரி தொடர்ந்த வழக்கு தமிழக அரசியல் மற்றும் ஈழத் தமிழர் பிரச்சினையுடன் தொடர்புடைய மிக முக்கியமான சட்டப் போராட்டங்களில் ஒன்று. இந்த வழக்கு சட்ட விரோத நடவடிக்கைகள் சட்டம் அடிப்படையில் விடுதலைப் புலிகள் இயக்கத்தை தடை செய்த மத்திய அரசின் முடிவை எதிர்த்து தொடரப்பட்டது.

விடுதலைப் புலிகள் இயக்கம் 1992-ஆம் ஆண்டு முதலே இந்தியாவில் தடை செய்யப்பட்டிருந்தது. இந்தத் தடை அவ்வப்போது ஐந்தாண்டுகளுக்கு ஒருமுறை நீட்டிக்கப்பட்டு வந்தது. 2012-ஆம் ஆண்டு மே மாதத்தில் மத்திய உள்துறை அமைச்சகம் மீண்டும் தடையை ஐந்தாண்டுகளுக்கு நீட்டித்து அறிவிப்பு வெளியிட்டது.

இதைத் தொடர்ந்து, இந்தத் தடை நீட்டிப்பை உறுதி செய்யும் வகையில் UAPA-யின் கீழ் அமைக்கப்பட்ட தீர்ப்பாயம் 2012 நவம்பர் மாதத்தில் தீர்ப்பளித்தது. இந்தத் தீர்ப்பாய உத்தரவை எதிர்த்தே வைகோ உள்ளிட்டோர் நீதிமன்றத்தில் வழக்கு தொடர்ந்தனர். வைகோ தனது மனுவில், விடுதலைப் புலிகள் இயக்கம் ஈழத் தமிழர்களின் சுயநிர்ணய உரிமைக்காகப் போராடிய ஒரு இயக்கம் என்றும், இந்தியாவில் அது எந்த வன்முறை நடவடிக்கையிலும் ஈடுபடவில்லை என்றும் வாதிட்டார்.

இதையும் படிங்க: தனிச் சின்னத்தில் போட்டி... ராஜ்ய சபா சீட்..! திமுகவிற்கு ஹை டிமாண்ட் வைக்கும் மதிமுக...!!

மேலும், தடை உத்தரவு இயற்கை நீதிக் கோட்பாடுகளுக்கு எதிரானது, போதிய ஆதாரங்கள் இல்லாமல் விதிக்கப்பட்டது என்றும் குற்றம்சாட்டினார். இந்த வழக்கு சென்னை உயர் நீதிமன்றத்தில் விசாரணைக்கு எடுத்துக்கொள்ளப்பட்டது. இந்த வழக்கில் வைகோ ஆஜராகி வாதாடியிருந்தார். இந்த நிலையில் வைகோ தொடர்ந்த வழக்கு தள்ளுபடி செய்யப்பட்டுள்ளது.

2024 ஆம் ஆண்டு உத்தரவு அமலில் உள்ள நிலையில் 2014ல் பிறப்பிக்கப்பட்ட உத்தரவை எதிர்த்த வழக்கு செல்லத்தக்கதல்ல என்ற நீதிமன்றம் தெரிவித்துள்ளது. வைகோ பாதிக்கப்பட்ட நபர் அல்ல என்றும் அடுத்தடுத்த அறிவிப்புகள் வெளியான நிலையில் அதனை எதிர்க்கவில்லை எனவும் மத்திய அரசு தரப்பில் தெரிவிக்கப்பட்டது. மத்திய அரசு தரப்பு மற்றும் வைகோ தரப்பு வாதங்களை கேட்ட நீதிபதிகள் வைகோவின் மனு செல்லத்தக்கதல்ல என கூறி தள்ளுபடி செய்தனர். 

இதையும் படிங்க: கதர் சட்டையை கிழிக்காமல் விடமாட்டாரு போலயே... மீண்டும் காங்கிரஸை சீண்டிய வைகோ... கூட்டணி ஆட்சி பற்றி ‘நச்’ பதிலடி...!