காலதாமதம் என்றாலும் வரவேற்கிறேன்! கே.என். நேரு மீதான வழக்கு குறித்து வானதி சீனிவாசன் அறிக்கை!

கடந்த திமுக ஆட்சிக் காலத்தில் நகராட்சி நிர்வாகம் மற்றும் குடிநீர் வழங்கல் துறை அமைச்சராக இருந்த கே.என். நேரு அவர்கள் மீது, லஞ்ச ஒழிப்புத்துறை (DVAC) வழக்குப் பதிவு செய்துள்ளதாக வெளியாகி இருக்கும் செய்தி அரசியல் வட்டாரத்தில் பெரும் பரபரப்பை ஏற்படுத்தியுள்ளது. இச்சம்பவம் குறித்துப் பாரதிய ஜனதா கட்சியின் மூத்த தலைவரும், சட்டமன்ற உறுப்பினருமான வானதி சீனிவாசன் அவர்கள் தனது முக்கியக் கருத்தை அறிக்கையாக வெளியிட்டுள்ளார்.

அவர் வெளியிட்டுள்ள அறிக்கையில், கடந்த திமுக ஆட்சிக் காலத்தில் நகராட்சி நிர்வாகம் மற்றும் குடிநீர் வழங்கல் துறை அமைச்சராக இருந்த கே.என். நேரு அவர்கள், அதிகாரிகள் பணி நியமனத்தில் பெரும் முறைகேட்டில் ஈடுபட்டதாகக் குற்றம் சாட்டப்பட்டது. இந்நிலையில், தற்போது அவர் மீது லஞ்ச ஒழிப்புத்துறை வழக்குப் பதிவு செய்திருப்பதாகக் கூறப்படும் செய்தி சற்றே ஆறுதல் அளிக்கிறது. மத்திய அமலாக்கத்துறை (ED) மற்றும் நீதிமன்றத்தின் தொடர் தலையீட்டிற்குப் பிறகே லஞ்ச ஒழிப்புத்துறை இந்த அதிரடி நடவடிக்கையை மேற்கொண்டிருக்கிறது. இது மிகவும் காலதாமதமான நடவடிக்கை என்றாலும், இதனை நான் வரவேற்கிறேன் என்று குறிப்பிட்டுள்ளார்.

மேலும், லஞ்ச ஒழிப்புத்துறை வெறும் வழக்குப் பதிவு செய்ததோடு மட்டும் தனது கடமையை நிறுத்திக் கொள்ளக் கூடாது. இந்த ஊழல் குறித்து உரிய விசாரணையை மிக விரைவில் மேற்கொண்டு, அதிகார துஷ்பிரயோகம் மற்றும் முறைகேட்டில் சம்பந்தப்பட்ட அனைவரையும் சட்டத்தின் முன் கொண்டு வந்து நிறுத்த வேண்டும் என லஞ்ச ஒழிப்புத் துறையை வலியுறுத்துகிறேன்" என்றும் வானதி சீனிவாசன் தனது அறிக்கையில் சுட்டிக்காட்டியுள்ளார். தமிழகத் தேர்தல் முடிந்து அரசியல் களம் அடுத்தகட்ட நகர்வுகளை நோக்கிச் சென்று கொண்டிருக்கும் வேளையில், முன்னாள் அமைச்சர் மீதான இந்த ஊழல் வழக்கு விசாரணை மீண்டும் சூடுபிடித்திருப்பது திமுக வட்டாரத்தில் பெரும் அதிர்வலைகளை ஏற்படுத்தியுள்ளது.

இதையும் படிங்க: கோட்டையில் இருப்பது தலைமை செயலகமா? தவெக ஆபீஸா? வானதி சீனிவாசன் அனல் பறக்கும் குற்றச்சாட்டு!

இதையும் படிங்க: காவலர்களுக்கே பாதுகாப்பில்லாத ஆட்சியா? தவெகவினர் அராஜகத்திற்கு வானதி சீனிவாசன்  கண்டனம்!