திருவள்ளுவருக்கு காவி உடையா..?? இபிஎஸ்க்கு வலுக்கும் எதிர்ப்புகள்..!! கொந்தளித்த திருமாவளவன்..!!

பிப்ரவரி 21, உலக தாய்மொழி தினமாக உலகெங்கும் கொண்டாடப்படுகிறது. இந்நாளில் தமிழ் மொழியின் பெருமையை போற்றி, பல்வேறு அரசியல் தலைவர்கள் சமூக வலைதளங்களில் வாழ்த்து தெரிவித்து வருகின்றனர். தமிழகத்தில் இத்தினம் சிறப்பு முக்கியத்துவம் வாய்ந்ததாகக் கருதப்படுவதால், தமிழ் மொழி மற்றும் திருவள்ளுவரின் புகழை எடுத்துரைக்கும் வகையில் பல பதிவுகள் வெளியாகியுள்ளன.

இந்நிலையில், எதிர்க்கட்சித் தலைவரும் அதிமுக பொதுச்செயலாளருமான எடப்பாடி கே. பழனிசாமி, தனது எக்ஸ் (முன்னாள் ட்விட்டர்) பக்கத்தில் தமிழ் மொழிக்கு அழகிய வாழ்த்து தெரிவித்தார். "நம் உயிருக்கு நேராம், சமூகத்தின் விளைவுக்கு நீராம், உரிமைச் செம்பயிருக்கு வேராம், உயர்வுக்கு வானாம், பிறவிக்குத் தாயாம், நம் தாய்மொழியாம் தமிழ் மொழியை இந்த தாய்மொழி தினத்தில் போற்றி வணங்குகிறேன். தமிழுக்கும் தமிழருக்கும் அதிமுக என்றென்றும் அரணாக விளங்கும்" என்று அவர் குறிப்பிட்டிருந்தார். 

இதையும் படிங்க: தமிழ்நாட்டை வஞ்சிக்கும் ஓரவஞ்சனை பட்ஜெட்! நாடாளுமன்றத்தில் திருமாவளவன் கடும் சாடல்!

இதனுடன் தமிழ் மொழியின் சிறப்புகளை விளக்கும் பல புகைப்படங்களையும் இணைத்திருந்தார். ஆனால், அந்த பதிவில் இடம்பெற்ற ஒரு புகைப்படம் பெரும் சர்ச்சையை ஏற்படுத்தியது. அதில் திருவள்ளுவர் காவி நிற உடையில் சித்தரிக்கப்பட்டிருந்தது. தமிழகத்தில் திருவள்ளுவர் பொதுவாக வெள்ளை உடையில், மத அடையாளங்கள் இன்றி சித்தரிக்கப்படுவது வழக்கம். இதனால், காவி உடை அணிவிக்கப்பட்ட திருவள்ளுவர் படத்தைப் பயன்படுத்தியது "திராவிட இயக்க கொள்கைகளுக்கு எதிரானது" என்றும், "சங் பரிவார் செல்வாக்கு அதிமுகவில் அதிகரித்துவிட்டது" என்றும் பலரும் விமர்சித்தனர்.

இதையடுத்து, சமூக வலைதளங்களில் கடும் எதிர்ப்பு கிளம்பியது. விசிக தலைவர் தொல். திருமாவளவன் இதுகுறித்து கடுமையான கண்டனத்தை தெரிவித்தார். "வரும் சட்டமன்றத் தேர்தலில் அதிமுக வெற்றி பெற்றால் ஆர்.எஸ்.எஸ் தான் நாட்டை ஆளும். அண்ணா, எம்ஜிஆர், ஜெயலலிதா தலைமையிலான திராவிட இயக்கம் சங் பரிவார் கையில் சிக்கியுள்ளது. திருவள்ளுவருக்கு காவி உடை அணிவித்து எடப்பாடி பதிவிடும் நிலை வந்துவிட்டது. அதிமுக தலைவர்கள் கவனமாகவும் எச்சரிக்கையாகவும் இருக்க வேண்டும்" என்று அவர் தெரிவித்தார்.

இதேபோல், மற்ற சில அரசியல் தலைவர்களும் இதனை "பாஜகவுடனான கூட்டணியின் விளைவு" என்று சாடினர். எதிர்ப்புகள் அதிகரித்ததால், எடப்பாடி பழனிசாமி அந்த சர்ச்சைக்குரிய புகைப்படத்தை பதிவிலிருந்து நீக்கினார். பின்னர், வாழ்த்து செய்தியை மட்டும் மீண்டும் பதிவிட்டார்.

இந்த சம்பவம், தமிழக அரசியலில் அதிமுக-பாஜக கூட்டணியின் தாக்கம் குறித்த விவாதங்களை மீண்டும் தூண்டியுள்ளது. தாய்மொழி தினம் போன்ற ஒற்றுமை நிகழ்வில் ஏற்பட்ட இத்தகைய சர்ச்சை, தமிழ் மொழி மற்றும் திருவள்ளுவரின் பிம்பத்தை சுற்றியுள்ள அரசியல் போக்குகளை வெளிப்படுத்தியுள்ளது.

இதையும் படிங்க: திமுக கூட்டணியில் முற்றும் மோதல்! செல்வப்பெருந்தகையை மிகக் கடுமையாக சாடிய விசிக வன்னி அரசு!