முதல்வர் விஜய் பிரச்சார நிகழ்ச்சிக்காக பனைமரங்கள் வெட்டப்பட்டதா? உள்ளூர் மக்கள் அதிர்ச்சி!!

தமிழக வெற்றிக் கழகத் தலைவரும் முதலமைச்சருமான ஜோசப் விஜய், மதுராந்தகம் மற்றும் தாராபுரம் சட்டமன்ற இடைத்தேர்தலுக்கான பிரச்சாரத்தில் நேரடியாக இறங்கியுள்ளார். அக்டோபர் 6ஆம் தேதி நடைபெறவுள்ள இந்த இடைத்தேர்தல்களில், தவெக வேட்பாளர்களை ஆதரித்து அவர் பங்கேற்கும் பொதுக்கூட்டங்களுக்கான ஏற்பாடுகள் தீவிரமாக நடைபெற்று வருகின்றன. 

மதுராந்தகத்தில் செப்டம்பர் 25ஆம் தேதியும், தாராபுரத்தில் 30ஆம் தேதியும் அவரது பரப்புரை நிகழ்ச்சிகள் திட்டமிடப்பட்டுள்ளன. மதுராந்தகத்தில் தவெக வேட்பாளர் மரகதம் குமரவேலை ஆதரித்து நடைபெறும் கூட்டத்துக்கான ஏற்பாடுகள் ஆத்தூர் சுங்கச்சாவடி அருகே மேற்கொள்ளப்பட்டு வருகின்றன. இந்த நிலையில், கூட்டம் நடைபெறவுள்ள இடத்தில் சுமார் 150 பனைமரங்கள் வேரோடு பிடுங்கப்படவுள்ளதாக வெளியான தகவல் பெரும் அதிர்ச்சியை ஏற்படுத்தியுள்ளது. 

பனைமரங்கள் தமிழ்நாட்டின் மாநில மரமாக அறிவிக்கப்பட்டுள்ளன. நீதிமன்ற உத்தரவுகளின்படியும், அரசாணைகளின்படியும் அவற்றை வெட்டவோ அழிக்கவோ கூடாது. தவிர்க்க இயலாத சூழலில் வெட்ட நேரிட்டாலும் மாவட்ட ஆட்சியரின் முன் அனுமதி கட்டாயம். இந்த உத்தரவு, பனைமரங்களை செங்கல் சூளைகளுக்கு எரிபொருளாகப் பயன்படுத்துவதையும், வணிக ரீதியாக வெட்டி விற்பதையும் தடுக்கும் நோக்கில் கொண்டு வரப்பட்டது. 

இதையும் படிங்க: பெண்களுக்கு ஹேப்பி நியூஸ்!! அக். 2-ல் ‘வெற்றிப் பயணம்’ திட்டம்.. தொடங்கி வைக்கிறார் முதல்வர் விஜய்!!

ஒரு மரம் வெட்டப்பட்டால் அதற்கு ஈடாக பத்து கன்றுகள் நட வேண்டும் என்ற விதியும் உள்ளது. சமூக ஆர்வலர் ராஜா, இந்த விவகாரத்தை தேர்தல் நடத்தும் அதிகாரி நரேந்திரரிடம் மனுவாக அளித்தார். நீதிமன்ற உத்தரவுகளை மீறி பிரச்சாரக் கூட்டத்துக்காக 150க்கும் மேற்பட்ட பனைமரங்கள் அழிக்கப்படுவதாக அதில் குறிப்பிட்டிருந்தார். இதையடுத்து மாவட்ட ஆட்சியரும் வருவாய் துறை அதிகாரிகளும் அப்பகுதியில் ஆய்வு மேற்கொண்டனர். 

இதனால் மரங்கள் அகற்றப்படுமா அல்லது பாதுகாக்கப்படுமா என்ற கேள்வி எழுந்துள்ளது. பல ஆண்டுகள் வாழும் பனைமரங்களை, சில நிமிடங்கள் பேசும் அரசியல் கூட்டத்துக்காக வெட்டுவது சரியா என்ற கடுமையான விமர்சனங்கள் சமூக வலைதளங்களிலும் பொதுமக்களிடையேயும் எழுந்துள்ளன. பனைமரங்கள் நிலத்தடி நீரைச் சேமிப்பதிலும், கடலரிப்பைத் தடுப்பதிலும் முக்கியப் பங்கு வகிக்கின்றன. 

அதேபோல் தாராபுரம்-உடுமலை சாலையில் மாருதி நகர் பகுதியில் சுமார் 54 ஏக்கர் பரப்பளவில் மற்றொரு பொதுக்கூட்டத்துக்கான மேடை, பந்தல் மற்றும் பாதுகாப்பு ஏற்பாடுகளும் நடைபெற்று வருகின்றன. சுற்றுச்சூழல் பாதுகாப்பும் அரசியல் தேவைகளும் மோதும் இந்த சூழலில், அதிகாரிகளின் இறுதி முடிவு என்னவாக இருக்கும் என்பதைப் பொறுத்திருந்துதான் பார்க்க வேண்டியுள்ளது.

இதையும் படிங்க: 41 பேரின் உயிரை வாங்கிய கூட்ட நெரிசல் சம்பவம்.. ஒரு வருஷம் ஆகிடுச்சு..!! கரூர் செல்கிறார் முதல்வர் விஜய்!!