இடைநிலை ஆசிரியர்களின் 16 ஆண்டுகால போராட்டம்! பிறக்கும் விடிவுகாலம்?! முதல்வர் விஜய் திட்டம்?!

சென்னை: பள்ளி கல்வித்துறையில் 16 ஆண்டுகளாக ‘சம வேலைக்கு சம ஊதியம்’ கோரி போராடி வரும் இடைநிலை ஆசிரியர்களின் நீண்டகால பிரச்சினைக்கு புதிய முதல்வர் விஜய் தீர்வு காண்பாரா என்ற எதிர்பார்ப்பு எழுந்துள்ளது.

மாநிலத்தில் 6-வது ஊதியக் குழு பரிந்துரையின்படி, 2009 ஜூன் 1-ம் தேதிக்கு முன் பணியில் சேர்ந்த இடைநிலை ஆசிரியர்களுக்கு அடிப்படை சம்பளம் ரூ.8,370 நிர்ணயிக்கப்பட்டது. ஆனால், அதற்கு அடுத்த நாள் முதல் பணியில் சேர்ந்தவர்களுக்கு ரூ.5,200 மட்டுமே வழங்கப்பட்டது. ஒரே பணி, ஒரே கல்வித் தகுதி இருந்தும் ஊதியத்தில் இந்த முரண்பாடு ஏற்பட்டது. இது உச்ச நீதிமன்றத்தின் ‘சம வேலைக்கு சம ஊதியம்’ தீர்ப்புக்கு எதிரானது என்று பாதிக்கப்பட்ட சுமார் 20,000 ஆசிரியர்கள் கூறுகின்றனர்.

இந்த அநீதிக்கு எதிராக கடந்த 16 ஆண்டுகளாக தொடர் போராட்டங்கள் நடைபெற்று வருகின்றன. முந்தைய அதிமுக ஆட்சியில் எதிர்க்கட்சித் தலைவராக இருந்த மு.க.ஸ்டாலின் இந்தப் போராட்டத்தில் பங்கேற்று, திமுக ஆட்சிக்கு வந்தால் இந்தப் பிரச்சினைக்கு தீர்வு காணப்படும் என வாக்குறுதி அளித்தார். திமுக தேர்தல் அறிக்கையிலும் இடம் பெற்றது. ஆனால், திமுக ஆட்சியில் இந்த வாக்குறுதி நிறைவேற்றப்படவில்லை. மாறாக, போராட்டத்தில் ஈடுபட்ட ஆசிரியர்கள் கைது செய்யப்பட்ட சம்பவங்கள் பெரும் கொந்தளிப்பை ஏற்படுத்தின.

இதையும் படிங்க: முதல்வர் விஜய் குறித்து அவதூறு பேச்சு! திமுக எம்.எல்.ஏ அனிதா ராதாகிருஷ்ணன் மீது டிஎஸ்பியிடம் வழக்கறிஞர்கள் புகார்!

இடைநிலை பதிவு மூப்பு ஆசிரியர் இயக்கம் (SSDA) மாநில பொதுச் செயலாளர் ராபர்ட் கூறுகையில், “திமுக ஆட்சியில் இந்தப் பிரச்சினையை ஆராய மூன்று பேர் குழு அமைக்கப்பட்டது. ஆனால் அந்தக் குழு இதுவரை அறிக்கை சமர்ப்பிக்கவில்லை. 16 ஆண்டுகளாக போராட்டம் நடத்தியதால் ஆசிரியர்கள் பல ஆயிரம் ரூபாய் சம்பள இழப்பை சந்தித்துள்ளனர். நூற்றுக்கும் மேற்பட்டோர் எந்தப் பலனும் பெறாமல் ஓய்வு பெற்றுவிட்டனர். குடும்பங்கள் பெரிதும் பாதிக்கப்பட்டுள்ளன” என்றார்.

தற்போது முதல்வராக பொறுப்பேற்றுள்ள விஜய், ஆசிரியர்கள் மீது நல்ல மதிப்பு வைத்திருப்பதாக அறியப்படுகிறது. எனவே, இந்த 16 ஆண்டுகால சம்பள முரண்பாட்டுக்கு அவர் விரைவில் தீர்வு காண்பார் என்ற நம்பிக்கை ஆசிரியர் வட்டாரத்தில் எழுந்துள்ளது. இந்தப் பிரச்சினைக்கு நிரந்தர தீர்வு காணப்பட்டால், பள்ளி கல்வித்துறையில் நிலவும் அதிருப்தி குறையும் என எதிர்பார்க்கப்படுகிறது.

இடைநிலை ஆசிரியர்களின் கோரிக்கை நியாயமானது என்பதால், புதிய அரசு இந்தப் பிரச்சினையை உடனடியாகக் கவனத்தில் எடுத்து, அவர்களுக்கு நீதி வழங்கும் என்று பொதுமக்களும் ஆசிரியர் அமைப்புகளும் ஆவலுடன் எதிர்பார்த்துக் காத்திருக்கின்றனர்.
 

இதையும் படிங்க: தமிழக அரசு ஊழியர்களுக்கு ஹேப்பி நியூஸ்..!! அகவிலைப்படி 60%-ஆக உயர்வு..!! முதல்வர் விஜய் அறிவிப்பு..!!