உலக கோப்பையில் இந்தியாவுக்கு இரட்டை மகிழ்ச்சி... ஈஷா சிங் தங்கம், மனு பாக்கர் வெண்கலம் வென்று அசத்தல்!

சர்வதேச துப்பாக்கிச்சுடுதல் உலக கோப்பை போட்டியில் இந்திய வீராங்கனைகள் சிறப்பான ஆட்டத்தை வெளிப்படுத்தி பதக்கங்களை கைப்பற்றியுள்ளனர். 25 மீட்டர் பிஸ்டல் பிரிவில் ஈஷா சிங் தங்கப் பதக்கம் வென்று சாதனை படைத்த நிலையில், ஒலிம்பிக் பதக்க வீராங்கனை மனு பாக்கர் வெண்கலப் பதக்கம் வென்று இந்தியாவுக்கு மேலும் பெருமை சேர்த்துள்ளார்.

சர்வதேச துப்பாக்கி விளையாட்டு கூட்டமைப்பு சார்பில் உலக கோப்பை துப்பாக்கிச்சுடுதல் போட்டி சீனாவின் ஹூவாங்சு நகரில் நடைபெற்று வருகிறது. உலகின் முன்னணி வீராங்கனைகள் பங்கேற்றுள்ள இந்த தொடரில் இந்திய வீராங்கனைகள் தங்களது திறமையை வெளிப்படுத்தி வருகின்றனர்.

இதன் இறுதிப்போட்டியில் 25 மீட்டர் பிஸ்டல் பிரிவில் களம் இறங்கிய இந்தியாவின் ஈஷா சிங் தொடக்கம் முதலே சிறப்பான செயல்பாட்டை வெளிப்படுத்தினார். இறுதிச்சுற்றில் அவர் 50க்கு 40 புள்ளிகள் பெற்று முதலிடத்தை பிடித்து தங்கப் பதக்கத்தை தட்டிச் சென்றார்.

இதையும் படிங்க: மீண்டும் மிரட்டிய பி.வி.சிந்து..! முதல் முறையாக ஜப்பான் ஓபன் கோப்பையை கைப்பற்றி வரலாறு படைத்தார்..!

ஈஷா சிங்குக்கு இது சர்வதேச அளவில் கிடைத்துள்ள மற்றொரு முக்கியமான வெற்றியாக பார்க்கப்படுகிறது. கடந்த சில மாதங்களுக்கு முன்பு ஜெர்மனியின் முனிச் நகரில் நடைபெற்ற உலக கோப்பை துப்பாக்கிச்சுடுதல் சாம்பியன்ஷிப் தொடரிலும் இதே 25 மீட்டர் பிஸ்டல் பிரிவில் அவர் தங்கப் பதக்கம் வென்று இருந்தார். தற்போது மீண்டும் உலக கோப்பையில் தங்கம் வென்று தனது திறமையை நிரூபித்துள்ளார்.

இதே போட்டியில் இந்தியாவின் மற்றொரு நட்சத்திர வீராங்கனையான மனு பாக்கரும் பதக்கம் வென்று அசத்தியுள்ளார். ஒலிம்பிக் போட்டியில் வெண்கலப் பதக்கம் வென்ற மனு பாக்கர், இந்த தொடரின் இறுதிப்போட்டியில் 28 புள்ளிகள் பெற்று மூன்றாவது இடத்தை பிடித்து வெண்கலப் பதக்கம் வென்றார்.

உலக அளவிலான துப்பாக்கிச்சுடுதல் போட்டிகளில் இந்திய வீராங்கனைகளின் ஆதிக்கம் தொடர்ந்து அதிகரித்து வரும் நிலையில், ஈஷா சிங் மற்றும் மனு பாக்கரின் இந்த வெற்றி இந்திய விளையாட்டு ரசிகர்களிடையே உற்சாகத்தை ஏற்படுத்தியுள்ளது.

வரும் சர்வதேச போட்டிகளிலும் இந்திய வீராங்கனைகள் தொடர்ந்து பதக்கங்களை குவிப்பார்கள் என்ற எதிர்பார்ப்பு தற்போது அதிகரித்துள்ளது.

இதையும் படிங்க: மெஸ்ஸி மேஜிக் சம்பவம்.. சுவிட்சர்லாந்தை வீழ்த்தி அரையிறுதிக்குள் பாய்ந்தது அர்ஜென்டினா!