அமெரிக்க மண்ணில் தரமான சம்பவம்! வரலாறு படைத்த தமிழக வீரர்! ரூ.1.90 கோடி பரிசுடன் சாம்பியனான பிரக்ஞானந்தா!

சென்னை: அமெரிக்காவில் நடைபெற்ற கிராண்ட் செஸ் டூர் தொடரின் இறுதிப் போட்டியில் சாம்பியன் பட்டம் வென்று தமிழகத்தைச் சேர்ந்த கிராண்ட்மாஸ்டர் ஆர். பிரக்ஞானந்தா வரலாற்று சாதனை படைத்துள்ளார். இந்தத் தொடரில் சாம்பியன் பட்டம் வென்ற முதல் இந்தியர் என்ற பெருமையையும் அவர் பெற்றுள்ளார்.

உலகின் முன்னணி செஸ் தொடர்களில் ஒன்றாகக் கருதப்படும் கிராண்ட் செஸ் டூரில் உலகின் தலைசிறந்த கிராண்ட்மாஸ்டர்கள் மட்டுமே பங்கேற்பார்கள். இந்த ஆண்டுக்கான தொடரின் இறுதிப் போட்டி அமெரிக்காவின் செயிண்ட் லூயிஸ் நகரில் நடைபெற்றது. இதில் இந்தியாவின் பிரக்ஞானந்தாவும், அமெரிக்காவின் கரானாவும் நேருக்கு நேர் மோதினர்.

இறுதிப்போட்டியின் தொடக்கமே பிரக்ஞானந்தாவுக்கு சவாலாக அமைந்தது. முதல் இரண்டு கிளாசிக்கல் சுற்று ஆட்டங்களுக்குப் பிறகு, அமெரிக்க வீரர் கரானாவிடம் பிரக்ஞானந்தா 9-3 என்ற புள்ளிகள் கணக்கில் பின்தங்கியிருந்தார். இதனால் போட்டியில் பிரக்ஞானந்தாவின் வெற்றி கேள்விக்குறியாகும் சூழல் ஏற்பட்டது.

இதையும் படிங்க: பிரக்ஞானந்தாவுக்கு மீண்டும் பின்னடைவு! 5½ மணி நேரம் போராடியும் டிரா! கைநழுவுமா கிராண்ட் செஸ் டூர் பட்டம்?

ஆனால் அடுத்தடுத்த ராபிட் சுற்று ஆட்டங்களில் பிரக்ஞானந்தா தனது ஆட்டத்தை முற்றிலும் மாற்றினார். மிகுந்த நிதானத்துடனும், துல்லியமான நகர்வுகளுடனும் விளையாடிய அவர், கரானாவுக்கு எதிராக முக்கியமான புள்ளிகளைப் பெற்று முன்னிலை பெற்றார்.

இதன் பின்னர் நடைபெற்ற பிளிட்ஸ் ஆட்டங்கள் இருவருக்கும் இடையே டிராவில் முடிந்தன. இதனால் இரு வீரர்களுக்கும் புள்ளிகள் பகிர்ந்தளிக்கப்பட்டன. இறுதியில் 15-13 என்ற புள்ளிகள் கணக்கில் பிரக்ஞானந்தா சாம்பியன் பட்டத்தை கைப்பற்றினார்.

9-3 என ஆரம்பத்தில் பின்தங்கியிருந்த நிலையில் இருந்து போட்டியைத் தனது பக்கம் திருப்பி வெற்றி பெற்றிருப்பது பிரக்ஞானந்தாவின் மனஉறுதியையும், அழுத்தமான சூழலிலும் சிறப்பாக விளையாடும் திறனையும் வெளிப்படுத்துவதாக அமைந்துள்ளது.

இந்த வெற்றியின் மூலம் கிராண்ட் செஸ் டூர் தொடரில் சாம்பியன் பட்டம் வென்ற முதல் இந்தியர் என்ற வரலாற்றை பிரக்ஞானந்தா எழுதியுள்ளார். மேலும், சாம்பியன் பட்டத்துடன் சுமார் ரூ.1.90 கோடி பரிசுத்தொகையையும் அவர் பெற்றுள்ளார்.

தமிழகத்தைச் சேர்ந்த இளம் செஸ் வீரர் உலகின் முன்னணி வீரர்கள் பங்கேற்கும் தொடரில் இந்த அளவுக்கு பெரிய வெற்றியைப் பதிவு செய்திருப்பது இந்திய செஸ் ரசிகர்களிடையே பெரும் உற்சாகத்தை ஏற்படுத்தியுள்ளது. குறிப்பாக, போட்டியின் தொடக்கத்தில் ஏற்பட்ட பின்னடைவைப் பொருட்படுத்தாமல் கடைசி வரை போராடி பட்டத்தை வென்ற விதம் பிரக்ஞானந்தாவின் இந்த வெற்றியை மேலும் சிறப்பானதாக மாற்றியுள்ளது.

இதையும் படிங்க: அமெரிக்காவில் அசத்திய பிரக்ஞானந்தா! கடைசி சுற்றே தேவையில்லை! ஒரு ஆட்டம் மீதமிருக்கும்போதே சாம்பியன்!