3 கிரிக்கெட் ஜாம்பவான்களின் பெயர்.. சேப்பாக்கத்தில் புதிய கேலரிகள்!! மிகப்பெரிய கௌரவம்..!!
இந்த மூன்று மாடங்களும் தமிழக கிரிக்கெட்டின் பொற்காலத்தை என்றென்றும் நினைவுபடுத்தும்.
- Wed, 30 Sep 2026 12:07:50 IST
by
Shanthi M.
- #
சென்னை எம்.ஏ.சிதம்பரம் மைதானம், தமிழக கிரிக்கெட் வரலாற்றில் புதிய அத்தியாயத்தை எழுதத் தயாராகிறது. தமிழ்நாடு கிரிக்கெட் சங்கம் (டிஎன்சிஏ) தனது ஆண்டுப் பொதுக்குழு கூட்டத்தில், சேப்பாக்கம் மைதானத்தின் மூன்று பார்வையாளர் மாடங்களுக்கு தமிழகத்தின் மூன்று புகழ்பெற்ற கிரிக்கெட் ஜாம்பவான்களான எஸ்.வெங்கடராகவன், கே.ஸ்ரீகாந்த் மற்றும் ஆர்.அஸ்வின் ஆகியோரின் பெயர்களைச் சூட்ட அதிகாரப்பூர்வ முடிவு எடுத்துள்ளது.
இந்த முடிவு, வெவ்வேறு காலகட்டங்களில் இந்திய மற்றும் தமிழக கிரிக்கெட்டிற்கு அழியாப் புகழ் சேர்த்த மூன்று தலைமுறை வீரர்களுக்கு உரிய மரியாதை செலுத்தும் வரலாற்றுச் சிறப்புமிக்க நடவடிக்கையாகப் பார்க்கப்படுகிறது. டிசம்பர் 12 ஆம் தேதி சேப்பாக்கத்தில் நடைபெறும் பிக் பேஷ் லீக் தொடரின் தொடக்கப் போட்டியில் பெர்த் ஸ்கார்ச்சர்ஸ் மற்றும் மெல்போர்ன் ரெனிகேட்ஸ் அணிகள் மோதுகின்றன.
அந்தப் போட்டி தொடங்குவதற்கு முன்பாகவே, மூன்று ஜாம்பவான்களின் முன்னிலையில் அவர்களின் பெயர் பொறிக்கப்பட்ட மாடங்கள் அதிகாரப்பூர்வமாகத் திறந்து வைக்கப்படும். ஆஸ்திரேலியாவுக்கு வெளியே முதன்முறையாக பிபிஎல் போட்டி நடைபெறும் இந்த நிகழ்வு, சேப்பாக்கத்திற்கு கூடுதல் சிறப்பைச் சேர்க்கிறது. எஸ்.வெங்கடராகவன் 1970களின் புகழ்பெற்ற இந்தியச் சுழற்பந்து குவார்டெட்டில் முக்கிய உறுப்பினராகத் திகழ்ந்தார்.
இதையும் படிங்க: மேடையில் நக்வி..!! ட்ராஃபி வாங்க மறுத்த இந்திய வீராங்கனைகள்..! திட்டவட்டம்..!!
1975 மற்றும் 1979 உலகக்கோப்பைகளில் இந்திய அணியை வழிநடத்திய அவர், ஆட்டக்காரர், கேப்டன், பயிற்சியாளர், தேர்வுக்குழு உறுப்பினர், சர்வதேச நடுவர் மற்றும் போட்டி நடுவர் என கிரிக்கெட்டின் பல பரிமாணங்களில் முத்திரை பதித்த அரிய சாதனையாளர். டெஸ்ட் போட்டிகளில் 156 விக்கெட்டுகளை வீழ்த்திய அவரது பங்களிப்பு இன்றும் நினைவுகூரப்படுகிறது. கே.ஸ்ரீகாந்த் 1983 உலகக்கோப்பை வெற்றியில் இந்திய அணியின் அதிரடி தொடக்க ஆட்டக்காரராக முக்கியப் பங்காற்றினார்.
இறுதிப் போட்டியில் அதிக ரன்கள் எடுத்த அவர், பின்னர் இந்திய அணியின் கேப்டனாகவும், 2011 உலகக்கோப்பை வெற்றியின் போது தேர்வுக்குழுத் தலைவராகவும் பணியாற்றினார். அவரது தைரியமான ஸ்டைல் அன்றைய கிரிக்கெட்டை மாற்றியமைத்தது. நவீன காலத்தின் சுழற்பந்து வீச்சு மேதை ஆர்.அஸ்வின், டெஸ்ட் போட்டிகளில் 537 விக்கெட்டுகளை வீழ்த்தி இந்திய அளவில் இரண்டாவது இடத்தைப் பிடித்துள்ளார்.
2024இல் சர்வதேச கிரிக்கெட்டிலிருந்து ஓய்வு பெற்ற அவர், சென்னை சூப்பர் கிங்ஸ் மற்றும் தமிழக அணிக்காக எண்ணற்ற வெற்றிகளைப் பெற்றுத் தந்தார். பத்மஸ்ரீ விருதும் பெற்ற அவரது சாதனைகள் தொடர்ந்து பேசப்படுகின்றன. இந்த மூன்று மாடங்களும் தமிழக கிரிக்கெட்டின் பொற்காலத்தை என்றென்றும் நினைவுபடுத்தும். விளையாட்டு ரசிகர்கள் இதை பெரும் வரவேற்புடன் கொண்டாடுகின்றனர்.
இதையும் படிங்க: தெற்கு vs கிழக்கு! நாளை துலீப் டிராபி இறுதிப்போட்டி..!! வெற்றி கோப்பை யாருக்கு..??
