சிஎஸ்கே அதிரடி வெற்றி! மும்பையை வீழ்த்தி ருதுராஜ் கெய்க்வாட் படை அபார சாதனை!

ஐபிஎல் 2026 சீசனின் இன்றைய விறுவிறுப்பான ஆட்டத்தில், பரம எதிரிகளான மும்பை இந்தியன்ஸ் அணியைச் சென்னை சூப்பர் கிங்ஸ் அணி 8 விக்கெட்டுகள் வித்தியாசத்தில் வீழ்த்தி அபார வெற்றி பெற்றது. சேப்பாக்கம் மைதானத்தில் நடைபெற்ற இந்தப் போட்டியில், சென்னை அணி தனது சிறப்பான பந்துவீச்சு மற்றும் பேட்டிங் மூலம் மும்பை அணியை நிலைகுலையச் செய்தது.

இப்போட்டியில் டாஸ் வென்ற மும்பை இந்தியன்ஸ் அணியின் கேப்டன் ஹர்திக் பாண்ட்யா முதலில் பேட்டிங் செய்வதாக அறிவித்தார். முதலில் பேட்டிங் செய்த மும்பை அணி, 20 ஓவர்கள் முடிவில் 7 விக்கெட்டுகள் இழப்பிற்கு 159 ரன்கள் எடுத்தது. அந்த அணியில் அதிகபட்சமாக நமன் தீர் 37 பந்துகளில் 57 ரன்களும், ரியான் ரிகல்டன் 37 ரன்களும் எடுத்தனர்.

சென்னை அணியின் சார்பில் அன்ஷுல் கம்போஜ் சிறப்பாகப் பந்துவீசி 4 ஓவர்களில் 32 ரன்கள் கொடுத்து 3 விக்கெட்டுகளை வீழ்த்தினார். நுார் அகமது 2 விக்கெட்டுகளையும், ஓவர்டன் ஒரு விக்கெட்டையும் கைப்பற்றினர். 160 ரன்கள் எடுத்தால் வெற்றி என்ற இலக்குடன் சென்னை அணி தனது இன்னிங்ஸைத் தொடங்கியது.

இதையும் படிங்க: வான்கடேவில் ரன் மழை! கிளாசன் மற்றும் டிராவிஸ் ஹெட்டின் ருத்ரதாண்டவத்தால் மும்பையை வீழ்த்தியது சன்ரைசர்ஸ்!

கேப்டன் ருதுராஜ் கெய்க்வாட் (67*) மற்றும் கார்த்திக் சர்மா (54*) ஆகிய இருவரும் பொறுப்புடன் விளையாடி அரைசதங்கள் கடந்து அணியை வெற்றிப் பாதைக்கு அழைத்துச் சென்றனர். சென்னை அணி 18.1 ஓவர்களிலேயே 2 விக்கெட்டுகளை மட்டுமே இழந்து இலக்கை எட்டிப் பிடித்தது. இந்த சீசனில் மும்பை இந்தியன்ஸ் அணியைச் சென்னை அணி வீழ்த்துவது இது இரண்டாவது முறையாகும்.

இந்தத் தோல்வியின் மூலம் மும்பை இந்தியன்ஸ் அணி தொடரிலிருந்து வெளியேறும் நிலைக்குத் தள்ளப்பட்டுள்ளது. அதே வேளையில், சேப்பாக்கம் மைதானத்தின் தன்மையைத் துல்லியமாகக் கணித்து விளையாடிய சென்னை அணி, தனது 4-வது வெற்றியைப் பதிவு செய்து புள்ளிப் பட்டியலில் முன்னேறியுள்ளது.

இதையும் படிங்க: சஞ்சு சாம்சன் அதிரடி சதம்! மும்பைக்கு எதிராக 207 ரன்கள் குவித்தது சென்னை சூப்பர் கிங்ஸ்!