“சேப்பாக்கத்தை அதிரவைத்த ஹைதராபாத்!” - CSK அணியை 5 விக்கெட் வித்தியாசத்தில் வீழ்த்தி SRH அபார வெற்றி!

ஐபிஎல் 2026 தொடரின் 63-ஆவது லீக் ஆட்டத்தில், சென்னை சூப்பர் கிங்ஸ் அணிக்கு எதிரான முக்கியமான போட்டியில் சன்ரைசர்ஸ் ஹைதராபாத் அணி 5 விக்கெட் வித்தியாசத்தில் மாஸ் வெற்றி பெற்றுப் பிளே-ஆஃப் சுற்றுக்கு அதிகாரப்பூர்வமாகத் தகுதி பெற்றுள்ளது.

சேப்பாக்கம் எம்.ஏ.சிதம்பரம் மைதானத்தில் நடைபெற்ற இந்த மெகா ஆட்டத்தில் டாஸ் வென்ற சென்னை சூப்பர் கிங்ஸ் அணியின் கேப்டன் ருதுராஜ் கெய்க்வாட் முதலில் பேட்டிங்கைத் தேர்வு செய்தார். அதன்படி களம் இறங்கிய சென்னை அணி, 20 ஓவர்கள் முடிவில் 7 விக்கெட் இழப்பிற்கு 180 ரன்கள் எடுத்தது. சென்னை அணி தரப்பில் அதிரடியாக ஆடிய டெவால்ட் பிரெவிஸ் 27 பந்துகளில் 44 ரன்களும், கார்த்திக் சர்மா 19 பந்துகளில் 32 ரன்களும் குவித்தனர். ஹைதராபாத் பந்துவீச்சில் கேப்டன் பேட் கம்மின்ஸ் 4 ஓவர்களில் 28 ரன்கள் மட்டுமே கொடுத்து 3 விக்கெட்டுகளை வீழ்த்தி அசத்தினார்.

இதையும் படிங்க: ஐபிஎல் 2026: ராஜஸ்தானை 5 விக்கெட் வித்தியாசத்தில் வீழ்த்தி டெல்லி கேப்பிடல்ஸ் அபார வெற்றி!

பின்னர் 181 ரன்கள் என்ற இலக்கை நோக்கி ஆடிய சன்ரைசர்ஸ் ஹைதராபாத் அணி, 19 ஓவர்களிலேயே 5 விக்கெட்டுகளை மட்டுமே இழந்து 181 ரன்கள் எடுத்து இலக்கை எட்டிப்பிடித்தது. ஹைதராபாத் அணியின் வெற்றிக்குத் தொடக்க வீரர் இஷான் கிஷன் 47 பந்துகளில் 70 ரன்கள் குவித்தும், ஹென்ரிச் கிளாசென் 26 பந்துகளில் 47 ரன்கள் விளாசியும் அசுர வேகம் காட்டினர். சென்னை தரப்பில் முகேஷ் சௌத்ரி 4 ஓவர்களில் 36 ரன்கள் கொடுத்து 2 விக்கெட்டுகளைக் கைப்பற்றினார். 

இதையும் படிங்க: ரிகெல்டன் ருத்ரதாண்டவம்: 244 ரன்கள் இலக்கு! சன்ரைசர்ஸ் பந்துவீச்சை சிதறடித்த மும்பை இந்தியன்ஸ்!