கடைசி ஓவரில் கைநழுவிய வெற்றி! 10 ரன்கள் வித்தியாசத்தில் சென்னை சூப்பர் கிங்ஸ் தோல்வி!

ராஜீவ் காந்தி சர்வதேச மைதானத்தில் இன்று நடைபெற்ற ஐபிஎல் 2026-ன் அனல் பறக்கும் லீக் ஆட்டத்தில், சென்னை சூப்பர் கிங்ஸ் (CSK) அணியை 10 ரன்கள் வித்தியாசத்தில் வீழ்த்தி சன்ரைசர்ஸ் ஹைதராபாத் (SRH) திரில் வெற்றி பெற்றது. 195 ரன்கள் என்ற இலக்கை நோக்கி ஆடிய சிஎஸ்கே, கடைசி வரை போராடியும் இலக்கை எட்ட முடியாமல் சொதப்பியது.

முதலில் பேட்டிங் செய்த சன்ரைசர்ஸ் அணிக்குத் தொடக்க வீரர் அபிஷேக் சர்மா ருத்ரதாண்டவம் ஆடினார். வெறும் 15 பந்துகளில் அரைசதம் கடந்து ஐபிஎல் 2026-ன் அதிவேக அரைசத சாதனையை (வைபவ் சூர்யவன்ஷியுடன் இணைந்து) சமன் செய்தார். மறுபுறம் ஹென்ரிச் கிளாசன் அதிரடியாக ஆடி 39 பந்துகளில் 59 ரன்கள் குவிக்க, எஸ்ஆர்ஹெச் 20 ஓவர்களில் 9 விக்கெட் இழப்பிற்கு 194 ரன்கள் என்ற வலுவான ஸ்கோரை எட்டியது. சிஎஸ்கே தரப்பில் ஜேமி ஓவர்டன் மற்றும் அன்ஷுல் கம்போஜ் தலா 3 விக்கெட்டுகளை வீழ்த்தினர்.

195 ரன்கள் என்ற இலக்கை துரத்திய சிஎஸ்கே அணிக்குத் தொடக்கம் அபாரமாக அமைந்தது. முதல் 6 ஓவர்களில் சிஎஸ்கே 76 ரன்கள் குவித்து மிரட்டியது. ஆனால் நடுத்தர ஓவர்களில் ஈஷன் மலிங்கா (Eshan Malinga) தனது துல்லியமான பந்துவீச்சால் ஆட்டத்தைத் தலைகீழாக மாற்றினார். 3 முக்கிய விக்கெட்டுகளை வீழ்த்தி சிஎஸ்கே-வின் ரன் வேகத்திற்கு முட்டுக்கட்டை போட்டார்.

இதையும் படிங்க: பெங்களூருவின் கோட்டையை தகர்த்த டெல்லி! சின்னசாமி மைதானத்தில் ஆர்சிபி முதல் தோல்வி!

கடைசி ஓவரில் சிஎஸ்கே வெற்றி பெற 18 ரன்கள் தேவைப்பட்டது. களத்தில் ஜேமி ஓவர்டன் மற்றும் அன்ஷுல் கம்போஜ் இருந்தனர். எஸ்ஆர்ஹெச் பந்துவீச்சாளர் ஹிஞ்ச் (Hinge) வீசிய அந்த ஓவரில், 4-வது பந்தில் ஓவர்டன் ஆட்டமிழந்தார். கடைசி இரண்டு பந்துகளில் சிக்ஸர்கள் அடிக்க வேண்டிய இக்கட்டான சூழலில், சிஎஸ்கே வீரர்கள் தோல்வியைத் தழுவினர். இறுதியில் சிஎஸ்கே 20 ஓவர்களில் 184/8 ரன்கள் மட்டுமே எடுத்து 10 ரன்கள் வித்தியாசத்தில் தோல்வியடைந்தது.

இந்தத் திரில் வெற்றியின் மூலம் சன்ரைசர்ஸ் ஹைதராபாத் அணி தனது சொந்த மைதானத்தில் மீண்டும் தனது பலத்தை நிரூபித்துள்ளது. சிஎஸ்கே அணிக்கு இது இந்த சீசனில் ஒரு கடினமான தோல்வியாக அமைந்துள்ளது. அபிஷேக் ஷர்மாவின் இந்த மிரட்டலான பேட்டிங் மற்றும் ஈஷான் மலிங்காவின் துல்லியமான பந்துவீச்சு ஹைதராபாத் ரசிகர்களை உற்சாகக் கடலில் ஆழ்த்தியுள்ளது.

இதையும் படிங்க: CSK அணிக்கு முக்கிய பின்னடைவு..!! IPL தொடரிலிருந்து விலகும் கலீல் அகமது..!! காரணம் இதுதானாம்..!!