ரூ.44,300 விலையில்.. வெளியானது ரே-பான் மெட்டா ஜென் 3..!! ஸ்மார்ட் கண்ணாடியின் முழு விவரங்கள் இதோ!!
இதனால் காற்று வீசும் அல்லது இரைச்சல் மிகுந்த சூழல்களிலும் குரல் கட்டளைகளும் அழைப்புகளும் தெளிவாக இருக்கும்.
- Fri, 25 Sep 2026 12:54:16 IST
by
Shanthi M.
- #
மெட்டா பிளாட்ஃபார்ம்ஸின் வருடாந்திர மாநாடு ‘மெட்டா கனெக்ட் 2026’-இல், நிறுவனம் தனது செயற்கை நுண்ணறிவு அடிப்படையிலான அணியக்கூடிய சாதனங்களின் வரிசையை மேலும் விரிவுபடுத்தியது. இதில் மெட்டா விஆர் கண்ணாடிகளுடன் சேர்த்து, ரே-பான் மெட்டா ஜென் 3 ஸ்மார்ட் கண்ணாடிகளும் அறிமுகப்படுத்தப்பட்டன.
விஆர் மாடல்களின் இந்தியா வருகை குறித்து தெளிவான அறிவிப்பு இல்லையெனினும், மூன்றாம் தலைமுறை ரே-பான் மெட்டா கண்ணாடிகள் உடனடியாக இந்தியச் சந்தையில் கிடைக்கின்றன. முந்தைய ஜென் 2 மாடலுடன் ஒப்பிடும்போது, ஜென் 3-இல் மிக முக்கியமான மேம்பாடு பேட்டரி ஆயுளில் ஏற்பட்டுள்ளது. ஒருமுறை சார்ஜ் செய்தால் ஒன்பது மணிநேரம் வரை பயன்படுத்தலாம்; ஜென் 2-இல் இது எட்டு மணிநேரமாக இருந்தது.
சார்ஜிங் கேஸ் கூடுதலாக 50 மணிநேரம் வரை ஆதரவு தருகிறது (ஜென் 2-இல் 48 மணிநேரம்). ஆடியோ தரத்திலும் முன்னேற்றம்: ஆறு மைக்ரோபோன்கள் கொண்ட அமைப்பு, பின்னணி இரைச்சலை 90 சதவீதத்திற்கும் அதிகமாக குறைக்கிறது. இதனால் காற்று வீசும் அல்லது இரைச்சல் மிகுந்த சூழல்களிலும் குரல் கட்டளைகளும் அழைப்புகளும் தெளிவாக இருக்கும்.
இதையும் படிங்க: ஐபோன் விலைக்கே புதிய மேக் மினி? ஆப்பிளின் லேட்டஸ்ட் அப்டேட் இதோ!!
வடிவமைப்பில் புதிய பரிமாணம் சேர்க்கப்பட்டுள்ளது. பாரம்பரிய வேஃபேரர் உடன் ஏவியேட்டர் மற்றும் ஸீனா (ஜெனா) என்ற புதிய ஃபிரேம் ஸ்டைல்கள் சேர்க்கப்பட்டுள்ளன. உலகளவில் 27 வண்ண-லென்ஸ் கலவைகள் கிடைக்கின்றன; கருப்பு, ஹவானா மற்றும் பருவகால வண்ணங்கள் அடங்கும். மெட்டா ஏஐ-ஐ விரைவாக அணுக தனிப்பயனாக்கக்கூடிய செயல்பாட்டு பட்டன் சேர்க்கப்பட்டுள்ளது. கேமரா 12 மெகாபிக்சல் உடன் 3கே வீடியோ பதிவு திறனைத் தக்கவைத்துள்ளது.
டால்பி அட்மாஸ் கேப்சர் ஆதரவு இந்த ஆண்டின் பிற்பகுதியில் வரும்; இதனால் ஸ்பேஷியல் ஆடியோவுடன் வீடியோக்களைப் பதிவு செய்ய முடியும். மேலும் ஸ்லிம் வடிவமைப்பு, சரிசெய்யக்கூடிய டெம்பிள் டிப்ஸ் மற்றும் டைனமிக் போட்டோஸ் அம்சங்களும் உள்ளன. இந்தியாவில் விலை ரூ. 44,300 முதல் தொடங்குகிறது. வேஃபேரர், ஏவியேட்டர், ஸீனா வடிவமைப்புகளில் தேர்ந்தெடுக்கப்பட்ட கலவைகள் இவ்விலையில் கிடைக்கின்றன.
டிரான்சிஷன்ஸ் வேரியன்ட்கள் ரூ. 50,100, போலரைஸ்டு வேரியன்ட்கள் ரூ. 46,500. செப்டம்பர் 24, 2026 முதல் ரே-பான் இணையதளம் மற்றும் தேர்ந்தெடுக்கப்பட்ட ஆப்டிகல் கடைகளில் விற்பனை தொடங்கியுள்ளது. ஜென் 2 மாடலும் தொடர்ந்து கிடைக்கிறது என்பது குறிப்பிடத்தக்கது. இந்த அறிமுகம், ஸ்மார்ட் கண்ணாடிகள் அன்றாட வாழ்க்கையின் ஒரு பகுதியாக மாறும் திசையில் மெட்டாவின் முன்னேற்றத்தை உறுதிப்படுத்துகிறது.
இதையும் படிங்க: பைக் பிரியர்களுக்கு புதிய சாய்ஸ்.. ரூ.1.99 லட்சத்தில் ஹோண்டா CB350RS அறிமுகம்!!
