என்ன விஜயகாந்த் அண்ணன்னு சொன்னாரா விஜய்..! சண்முக பாண்டியன் ஆவேச பதில்..!

நேற்று மதுரையில் பிரமாண்டமாக நடைபெற்ற எழுச்சி கட்சியான தவெக-வின் இரண்டாவது ஆண்டு மாநாட்டில் நடந்த ஒரு சம்பவம், அரசியல் வட்டாரத்திலும் சமூக வலைதளத்திலும் பேசப்படும் தலைப்பாக மாறியுள்ளது. இந்த மாநாட்டில் கலந்து கொண்ட புகழ்பெற்ற நடிகரும், அரசியல் தலைவருமான விஜய், தனது உரையின் போது தேமுதிக நிறுவனரும், மறைந்த மக்கள்திலகமாக கருதப்படும் விஜயகாந்த் பற்றி “அண்ணன்” என குறிப்பிட்டார்.

இந்த ஒரு வார்த்தை அவரது பேச்சில் இடம்பெற்றதுதான், பரபரப்புக்கு காரணமாகியுள்ளது. அதேவேளை, அதிரடியாக வெளியாகியுள்ள 'கேப்டன் பிரபாகரன்' திரைப்படத்தை விஜயகாந்தின் இளைய மகன் சண்முக பாண்டியன் திரையரங்கில் சென்று நேரில் பார்த்தார். திரையரங்கில் ரசிகர்களுடன் கலந்தும், படம் பார்த்து மகிழ்ந்ததும், செய்தியாளர்களை சந்தித்த அவர், பல்வேறு கேள்விகளுக்கு தனது கருத்துக்களை பகிர்ந்துகொண்டார். அதன்படி விஜய் கூறிய "அண்ணன்" வார்த்தை குறித்து விளக்கமளித்த அவர் “ விஜய் அண்ணா அப்பாவை (விஜயகாந்தை) சிறு வயதிலிருந்தே பார்க்கிறார். அவரது பார்வையில் அப்பா ஒரு பெரியவராக இருந்தது மட்டுமல்லாமல், ஒரு வழிகாட்டியாகவும் இருந்தார். அதனால், அவரை அண்ணன் என்று கூப்பிட்டது இயல்பு தான். இதில் பெரிதாக பார்க்க எதுவும் இல்லை.. மேலும் அப்பா எப்போதும் மக்கள் சொத்து. அவருடைய வாழ்க்கை முழுவதும் மக்களுக்காகவே இருந்தது. அவர் நடிப்பிலும், அரசியலிலும், சமூக சேவையிலும் அவருடைய ஒவ்வொரு செயலும் அதற்கான சாட்சி. விஜய் அண்ணா அவர்கள் அப்பாவை அண்ணன் என்று கூறியது மரியாதையோடு இருந்தது. நாங்களும் அதை அப்படித்தான் எடுத்துக்கொண்டோம்" என்றார்.

இப்படி இருக்க 1991-ம் ஆண்டு வெளியான 'கேப்டன் பிரபாகரன்' திரைப்படம், விஜயகாந்தின் திரைப்பட வாழ்க்கையில் மிக முக்கியமான படங்களில் ஒன்றாக கருதப்படுகிறது. அரசியல் ஊடுருவல், சமூக நீதி, அதிகார வர்க்கத்தின் தவறுகளை சுட்டிக்காட்டும் இந்தப் படம், காலத்தால் அழியாத திரைப்படமாக இருந்துவந்தது. இப்போது, 33 ஆண்டுகளுக்குப் பிறகு இந்த படம் 4K தொழில்நுட்பத்தில் புதுப்பித்து திரையில் மீண்டும் வெளியிடப்பட்டது. இதன் திரை வெளியீட்டு விழாவில் சண்முக பாண்டியன் நேரில் பங்கேற்று, ரசிகர்களுடன் படம் பார்த்தார். இதனை குறித்து அவர் கூறுகையில், "இது மிக உணர்வுப்பூர்வமான தருணம். அப்பாவின் ஒரு சக்திவாய்ந்த படத்தை மீண்டும் பெரிய திரையில் பார்த்ததில் மிகுந்த மகிழ்ச்சி. ரசிகர்கள் இதுவரை அந்த படத்தை எப்படி நேசித்து வருகிறார்கள் என்பதை நேரில் பார்த்து உணர முடிந்தது. இது எங்கள் குடும்பத்திற்கும், அப்பாவின் பாரம்பரியத்திற்கும் பெரும் மரியாதை" என்றார்.

இதையும் படிங்க: விஜயகாந்தின் "கேப்டன் பிரபாகரன்" ரீ-ரிலீஸ் விழா..! கண்ணீர் மல்க பேசிய மகன்.. சோகத்தில் மூழ்கிய அரங்கம்..!

விஜயகாந்த் என்பது ஒரு பெயர் மட்டும் அல்ல, அது ஒரு இயக்கம். திரைப்படங்களில் மட்டுமல்லாது, அரசியலிலும் இவர் காட்டிய உறுதி, நேர்மை, தொண்டுநோக்கம் மக்கள் மனதில் இன்று வரை ஆழமாக பதிந்துள்ளது. பல தலைமுறைகளுக்கு அவர் ஒரு முன்மாதிரி. விஜய் போன்ற முன்னணி நடிகர்கள் கூட அவரை 'அண்ணன்' என்று அழைக்கும் நிலை உருவானதற்கு, விஜயகாந்தின் மனிதநேயமும், நேர்மையும் முக்கிய காரணமாகும். சண்முகபாண்டியனிடம் தொடர்ந்து கேட்கப்பட்ட மற்றொரு கேள்வியில்  “நீங்கள் அரசியலுக்கு வருவதற்கான திட்டம் இருக்கிறதா?” என கேட்கப்பட்டது. அதற்கு அவர் "நான் இப்போது என் திரைப்படத் துறையில் கவனம் செலுத்திக்கொண்டிருக்கிறேன். ஆனால், அப்பாவின் பாதையில் ஒருநாள் நடந்தே தீரவேண்டும் என்ற எண்ணம் மனத்தில் இருக்கிறது. அதற்கான நேரம் வரும்போது மக்களே தீர்மானிப்பார்கள்" என்றார்.

மதுரை மாநாட்டில் நிகழ்ந்த சின்ன சம்பவம் ஒன்று பெரிதாக பேசப்பட்டாலும், அதற்கான உண்மை விளக்கத்தை, மிக மென்மையாகவும் மரியாதையுடனும் சண்முக பாண்டியன் வழங்கியுள்ளதை பலரும் பாராட்டுகின்றனர்.
 

இதையும் படிங்க: மீண்டும் திரையில் 'கேப்டன் பிரபாகரன்' ரீ-ரிலீஸ்..! விஜயகாந்த் பிறந்தநாளுக்கு சர்ப்ரைஸ் கொடுத்த படக்குழு..!