5 மாதங்களாக நடந்த டார்ச்சர்!! மனம் நொந்து உயிரை மாய்த்த பெண்! குடும்பத்தினரையும் மிரட்டிய டிஜிட்டல் கைது கும்பல்!
உத்தர பிரதேசத்தின் பிஜ்னோர் மாவட்டத்தில், நிகழ்ந்து இருக்கும் தொழில்நுட்ப ரீதியிலான ஒரு மோசடி, இளம் பெண்ணின் உயிரையே பறித்து, ஒட்டுமொத்த குடும்பத்தையும் நிலைகுலைய வைத்துள்ளது.
by
உத்தர பிரதேசம் பிஜ்னோர் மாவட்டத்தில் நடந்த டிஜிட்டல் மோசடி ஒரு இளம் பெண்ணின் உயிரைப் பறித்து, முழு குடும்பத்தையும் சோகத்தில் ஆழ்த்தியுள்ளது. 28 வயதான மோனிகா என்ற இளம் பெண், கணவர் மற்றும் இரு மகள்களுடன் மகிழ்ச்சியாக வாழ்ந்து வந்தார். ஆனால், ‘டிஜிட்டல் கைது’ என்ற பெயரில் நடைபெற்ற தொழில்நுட்ப மோசடி அவரது வாழ்க்கையை முற்றிலுமாக அழித்தது.
கடந்த ஐந்து மாதங்களுக்கும் மேலாக மோனிகா இந்த மோசடி கும்பலின் மிரட்டலுக்கு ஆளானார். ஆள் கடத்தல் உள்ளிட்ட கடுமையான குற்றங்களில் தொடர்பு இருப்பதாகக் கூறி, வீடியோ அழைப்புகள் மூலம் அவரை தொடர்ந்து மிரட்டினர்.
“வீடியோவில் இருக்க வேண்டும், யாரிடமும் பேசக் கூடாது” என எச்சரித்து அவரது இயல்பு வாழ்க்கையை முழுவதுமாக முடக்கினர். குடும்பத்துக்கு ஆபத்து வரும் என பயந்த மோனிகா, தன் மன உளைச்சலை யாரிடமும் பகிராமல் தனியாக தாங்கினார். இறுதியில் தாங்க முடியாத அளவுக்கு மன உளைச்சலுக்கு ஆளான அவர், தற்கொலை செய்து கொண்டார்.
இதையும் படிங்க: டேட்டிங் செயலி 500 பெண்களை ஏமாற்றிய கயவன்! விதம் விதமாய் ரீல் சுற்றி ரூ.2 கோடி வரை மோசடி!
மோனிகாவின் உடல் தகனம் செய்யப்பட்டுக் கொண்டிருந்த சோகமான நேரத்திலும் அவரது மொபைல் போன் அலறியது. உறவினர்கள் அழைப்பை எடுத்தபோது, போலீஸ் உயரதிகாரி போல உடை அணிந்த மோசடியாளர் பேசினார். “மோனிகா இறந்துவிட்டார்” என உறவினர்கள் கூறியும் அந்த நபர் சிறிதும் பதிலில்லாமல் மோனிகாவின் கணவரை மிரட்டத் தொடங்கினார். இந்த சம்பவம் குடும்பத்தினரை அதிர்ச்சியில் உறைய வைத்தது.
பின்னர் மோனிகா எழுதி வைத்த டைரியை குடும்பத்தினர் கண்டுபிடித்தனர். அதில் ஐந்து மாதங்களாக தான் பட்ட வேதனையை அவர் கண்ணீருடன் பதிவு செய்திருந்தார். மோசடியாளர்களின் தொல்லை தாங்க முடியாமல் தற்கொலை செய்ததாக டைரியில் தெரிவித்திருந்தார். இதைப் படித்த கணவர் உடனடியாக போலீசில் புகார் அளித்துள்ளார். மோசடி கும்பலை கைது செய்து தண்டிக்க வேண்டும் என கோரிக்கை வைத்துள்ளார்.
டிஜிட்டல் கைது, ஆன்லைன் மிரட்டல் போன்ற மோசடிகள் இன்று பலரையும் பாதித்து வருகின்றன. சைபர் குற்றங்களுக்கு எதிராக உடனடியாக 1930 என்ற எண்ணுக்கு புகார் அளிக்க அறிவுறுத்தப்படுகிறது. மன உளைச்சல் ஏற்பட்டால் 104 என்ற உதவி எண்ணை தொடர்பு கொள்ளலாம். தற்கொலை எந்த பிரச்சனைக்கும் தீர்வல்ல என்பதை மோனிகாவின் சோக முடிவு நினைவூட்டுகிறது.
இதையும் படிங்க: அட கொடுமையே..! படகுக்குள் தண்ணீர் வந்த பிறகுதான் லைஃப் ஜாக்கெட் குடுப்பாங்களா..? அதிர்ச்சி காட்சிகள்..!!
