பள்ளி மாணவர்கள் கண்முன்னே ஆசிரியைக்கு நேர்ந்த கொடூரம்! முன்னாள் காதலன் வெறிச்செயல்! விபரீத முடிவு!

உத்தரப் பிரதேச மாநிலம் லக்கிம்பூர் கேரியில் உள்ள தனியார் பள்ளி வளாகத்தில் ஆசிரியையை அவரது முன்னாள் காதலன் துப்பாக்கியால் சுட்டுக் கொன்றதாக கூறப்படும் சம்பவம் பெரும் அதிர்ச்சியை ஏற்படுத்தியுள்ளது. மாணவர்கள் மற்றும் சக ஆசிரியர்கள் முன்னிலையில் நடந்த இந்த சம்பவம் தொடர்பாக போலீசார் தீவிர விசாரணை நடத்தி வருகின்றனர்.

லக்கிம்பூர் கேரியில் செயல்பட்டு வரும் சில்ட்ரன்ஸ் அகாடமி பள்ளியில் 26 வயதான நிஷாத் பாத்திமா ஆசிரியையாக பணியாற்றி வந்ததாக கூறப்படுகிறது. அதே பகுதியைச் சேர்ந்த 27 வயதான முகமது சவுத் என்பவருடன் அவர் சில காலமாக பழகி வந்ததாகவும், பின்னர் ஏற்பட்ட கருத்து வேறுபாடுகளைத் தொடர்ந்து இருவரும் பிரிந்ததாகவும் போலீஸ் தரப்பில் தெரிவிக்கப்பட்டுள்ளது.

இந்த நிலையில், சம்பவத்தன்று காலை சுமார் 11.30 மணியளவில் முகமது சவுத் பள்ளி வளாகத்துக்குள் சென்றதாக கூறப்படுகிறது. அவர் தன்னுடன் துப்பாக்கியை கொண்டு வந்ததாகவும், நிஷாத் பாத்திமாவை பள்ளியின் மேல் தளத்திற்கு அழைத்துச் சென்றதாகவும் விசாரணையில் தெரியவந்துள்ளது.

இதையும் படிங்க: நேபாளத்தில் இருந்து அடித்து வரப்பட்ட 5 உடல்கள்! கண்டக் ஆற்றில் கரை ஒதுங்கியதால் அதிர்ச்சி! இந்திய எல்லையில் சோகக் காட்சி!

அங்கு இருவருக்கும் இடையே வாக்குவாதம் ஏற்பட்டதாக கூறப்படுகிறது. அப்போது சவுத் தன்னிடம் இருந்த துப்பாக்கியால் பாத்திமாவை சுட்டதாக போலீசார் தெரிவித்துள்ளனர். துப்பாக்கிச் சத்தம் கேட்டதும் பள்ளியில் இருந்த மாணவர்கள் மற்றும் ஆசிரியர்கள் அதிர்ச்சியடைந்தனர்.

பின்னர் பாத்திமா ரத்த வெள்ளத்தில் கிடந்ததாகவும், அவரை சுட்ட பிறகு சவுத் அதே துப்பாக்கியால் தன்னைத்தானே சுட்டுக் கொண்டதாகவும் கூறப்படுகிறது. இதில் இருவரும் சம்பவ இடத்திலேயே உயிரிழந்ததாக போலீசார் தெரிவித்துள்ளனர்.

தகவல் கிடைத்ததும் சம்பவ இடத்துக்கு விரைந்த போலீசார், இருவரின் உடல்களையும் மீட்டு பிரேதப் பரிசோதனைக்காக அனுப்பி வைத்தனர். மேலும், பள்ளியில் பொருத்தப்பட்டிருந்த கண்காணிப்பு கேமரா காட்சிகளையும் போலீசார் ஆய்வு செய்து வருகின்றனர்.

இதில், சவுத் பாத்திமாவை பள்ளி வளாகத்தில் அழைத்துச் செல்லும் காட்சிகள் பதிவாகியுள்ளதாக போலீஸ் விசாரணையில் தெரியவந்ததாக கூறப்படுகிறது. சம்பவம் தொடர்பாக வழக்குப் பதிவு செய்யப்பட்டுள்ள நிலையில், துப்பாக்கி பள்ளிக்குள் எவ்வாறு கொண்டு வரப்பட்டது, இருவருக்கும் இடையே ஏற்பட்ட தகராறுக்கான முழுமையான காரணம் என்ன என்பது உள்ளிட்ட பல்வேறு கோணங்களில் விசாரணை நடைபெற்று வருகிறது.

பட்டப்பகலில் பள்ளி வளாகத்துக்குள்ளேயே நடைபெற்ற இந்த துப்பாக்கிச்சூடு சம்பவம், அப்பகுதியில் பெரும் பரபரப்பையும் அதிர்ச்சியையும் ஏற்படுத்தியுள்ளது. சம்பவத்தின்போது பள்ளியில் இருந்த மாணவர்களின் பாதுகாப்பு குறித்தும் தற்போது கவனம் செலுத்தப்பட்டு வருகிறது.

இதையும் படிங்க: 8-ம் வகுப்பு மாணவி பலி?! உத்தரப் பிரதேசத்தில் பள்ளி ஆசிரியர்கள் மீது வழக்கு! 2 பேர் சஸ்பெண்ட்!