ஊத்தங்கரையில் மாயமான 7ஆம் வகுப்பு மாணவன் சென்னையில் மீட்பு?! விசாரணையில் வெளியான தகவல்!

கிருஷ்ணகிரி மாவட்டம், ஊத்தங்கரை அருகே டியூஷனுக்குச் செல்வதாகக் கூறிவிட்டு வீட்டிலிருந்து சென்ற 12 வயது பள்ளி மாணவன், சென்னையில் மீட்கப்பட்ட சம்பவம் பரபரப்பை ஏற்படுத்தியுள்ளது. பெற்றோரிடம் கோபித்துக்கொண்டு சென்னைக்கு வந்ததாக அந்தச் சிறுவன் போலீஸாரிடம் தெரிவித்துள்ளான். தற்போது சிறுவனைப் பெற்றோரிடம் ஒப்படைப்பதற்கான நடவடிக்கைகள் மேற்கொள்ளப்பட்டு வருகின்றன.

கிருஷ்ணகிரி மாவட்டம், ஊத்தங்கரை அருகே உள்ள சிங்காரப்பேட்டை இந்தியன் வங்கி தெருவைச் சேர்ந்தவர் திருநாவுக்கரசு. இவர் அப்பகுதியில் பேக்கரி நடத்தி வருகிறார். இவரது 12 வயது மகன் சஞ்சய், ஊத்தங்கரையில் உள்ள தனியார் பள்ளியில் ஏழாம் வகுப்பு படித்து வருகிறார்.

இந்த நிலையில், கடந்த வெள்ளிக்கிழமை மாலை பள்ளி முடிந்து வீட்டுக்குத் திரும்பிய சஞ்சய், டியூஷனுக்குச் செல்வதாகக் கூறிவிட்டு வீட்டிலிருந்து புறப்பட்டுச் சென்றுள்ளார். ஆனால், நீண்ட நேரமாகியும் அவர் வீடு திரும்பவில்லை. இதனால் பதற்றமடைந்த பெற்றோர், உறவினர்கள் மற்றும் தெரிந்த இடங்களில் தேடியுள்ளனர். சிறுவனைப் பற்றிய தகவல் கிடைக்காததால், சிங்காரப்பேட்டை காவல் நிலையத்தில் புகார் அளித்தனர்.

இதையும் படிங்க: வங்கக்கடலில் நாளை உருவாகிறது அர்னாப் புயல்? 9 துறைமுகங்களில் எச்சரிக்கை கூண்டு ஏற்றம்!

இதையடுத்து, போலீஸார் வழக்குப் பதிவு செய்து சிறுவனைத் தேடும் பணியில் ஈடுபட்டனர். விசாரணையின் ஒரு பகுதியாக, அப்பகுதியில் பொருத்தப்பட்டிருந்த கண்காணிப்பு கேமராக்களின் பதிவுகளை ஆய்வு செய்தனர். அப்போது, சஞ்சய் அந்த வழியாக வந்த இருசக்கர வாகனத்தில் லிப்ட் கேட்டு செல்வது போன்ற காட்சி பதிவாகியிருந்ததாகக் கூறப்படுகிறது.

இதனால் சிறுவன் யாருடன் சென்றார், அவர் கடத்தப்பட்டாரா அல்லது வேறு காரணத்தால் வீட்டை விட்டு வெளியேறினாரா என்பது குறித்து போலீஸார் விசாரணை மேற்கொண்டனர்.

இதற்கிடையே, காணாமல் போன சஞ்சய் சென்னையின் புளியந்தோப்பு பகுதியில் மீட்கப்பட்டுள்ளார். அங்கிருந்து சென்னை சென்ட்ரல் ரயில் நிலையத்துக்குச் செல்வதற்காகச் சிறுவன் ஆட்டோவில் ஏறியபோது, அவரது நடவடிக்கைகளில் சந்தேகமடைந்த ஓட்டுநர் அவரை காவல் நிலையத்தில் ஒப்படைத்ததாகத் தெரிகிறது.

போலீஸாரிடம் விசாரித்தபோது, பெற்றோரிடம் கோபித்துக்கொண்டு சென்னைக்கு வந்ததாகச் சிறுவன் தெரிவித்துள்ளான். இதையடுத்து, சிறுவனைப் பாதுகாப்பாகப் பெற்றோரிடம் ஒப்படைப்பதற்கான நடவடிக்கைகள் மேற்கொள்ளப்பட்டு வருகின்றன. இந்தச் சம்பவம் சிங்காரப்பேட்டை மற்றும் ஊத்தங்கரை பகுதிகளில் கவனத்தை ஈர்த்துள்ளது.

இதையும் படிங்க: உதயநிதி இல்லத்துக்கு அருகிலேயே புது வீட்டிற்கு மாறும் முதல்வர் விஜய்?! ரெடியாகும் பிரமாண்ட பங்களா?!