பாகிஸ்தானில் பயங்கரம்... கொத்தாய் மண்ணில் புதைந்த 32 பேர் பலி... நிலத்தடியில் போராடுபவர்களின் நிலை என்ன?

பாகிஸ்தானின் பலுசிஸ்தான் மாகாணத்தில் உள்ள நிலக்கரிச் சுரங்கத்தில் ஏற்பட்ட சக்திவாய்ந்த வெடிவிபத்தில் குறைந்தது 32 சுரங்கத் தொழிலாளர்கள் உயிரிழந்துள்ளனர். மேலும், 10 பேர் சுரங்கத்திற்குள் சிக்கியிருப்பதாகவும், அவர்களை மீட்கும் பணிகள் தீவிரமாக நடைபெற்று வருவதாகவும் அதிகாரிகள் தெரிவித்துள்ளனர்.

பலுசிஸ்தான் மாகாணத் தலைநகரான குவெட்டாவின் புறநகர்ப் பகுதியில் அமைந்துள்ள நிலக்கரிச் சுரங்கத்தில் இந்த விபத்து நிகழ்ந்துள்ளது. சுரங்கத்திற்குள் மீத்தேன் வாயு அதிகளவில் தேங்கியதே வெடிவிபத்துக்கு காரணமாக இருக்கலாம் என அரசு சுரங்க ஆய்வாளர் கனி பலோச் தெரிவித்துள்ளார்.

வெடிவிபத்து ஏற்பட்ட சில மணி நேரங்களிலேயே மீட்புக் குழுவினர் ஏழு உடல்களை மீட்டனர். பின்னர் நடைபெற்ற தேடுதல் பணியில் மேலும் 25 பேரின் உடல்கள் கண்டெடுக்கப்பட்டன. இன்னும் சிக்கியிருக்கும் தொழிலாளர்களை மீட்கும் பணியில் அவசரகால மீட்புக் குழுவினர் தொடர்ந்து ஈடுபட்டு வருகின்றனர்.

இதையும் படிங்க: "இந்தியர்களைப் போல எதிரிகள்!".. ரத்தக்களரி ஆகும் POK!! பாக்., பாதுகாப்பு அமைச்சர் சர்ச்சை பேச்சு!

சுரங்கத்தில் சிக்கியுள்ள அனைவரும் மீட்கப்படும் வரை பணிகள் இடையறாது தொடரும் என்று கனி பலோச் தெரிவித்தார். அதேவேளை, உயிரிழப்புகளின் எண்ணிக்கை மேலும் அதிகரிக்கக்கூடும் என்ற அச்சத்தையும் அவர் வெளிப்படுத்தினார்.

மீத்தேன் வாயு வெடிப்புக்குப் பிறகு சுரங்கத்திற்குள் ஆக்சிஜன் அளவு மிகவும் குறைந்துவிடுவதால், உயிருடன் இருப்பவர்களை கண்டுபிடிக்கும் வாய்ப்பு குறைவாக இருப்பதாகவும், அதனால் மீட்புப் பணிகள் மிகுந்த எச்சரிக்கையுடன் மேற்கொள்ளப்பட்டு வருவதாகவும் அதிகாரிகள் தெரிவித்துள்ளனர்.

பலுசிஸ்தான் சுரங்கங்கள் மற்றும் கனிம வளத் துறை அமைச்சர் ஷோயப் நொஷர்வானி, மிகவும் சவாலான சூழ்நிலைகளிலும் மீட்புக் குழுவினர் பணியாற்றி வருவதாக கூறியதுடன், உயிரிழந்த தொழிலாளர்களின் குடும்பங்களுக்கு ஆழ்ந்த இரங்கலைத் தெரிவித்தார்.

மேலும், உயிரிழந்த ஒவ்வொரு தொழிலாளரின் குடும்பத்திற்கும் மாகாண அரசு தலா 5 லட்சம் பாகிஸ்தானி ரூபாய் இழப்பீடு வழங்கும் என்றும், வெடிவிபத்திற்கான காரணம் குறித்து விரிவான விசாரணைக்கு உத்தரவிடப்பட்டுள்ளதாகவும் அவர் தெரிவித்தார்.

இதற்கிடையில், பாதுகாப்பு நடைமுறைகளில் ஏற்பட்ட அலட்சியமே இந்த விபத்துக்குக் காரணமாக இருக்கலாம் என்று பாகிஸ்தான் மத்திய சுரங்கத் தொழிலாளர் கூட்டமைப்பு குற்றம்சாட்டியுள்ளது.

இந்த சம்பவம் தொடர்பாக வெளியிட்டுள்ள அறிக்கையில், சுரங்கங்களில் பாதுகாப்பு விதிமுறைகளை கடுமையாக அமல்படுத்த வேண்டும் என்றும், பாதுகாப்பு நடைமுறைகளை மீறும் நிறுவனங்கள் மீது கடுமையான நடவடிக்கை எடுக்க வேண்டும் என்றும் அரசை தொழிலாளர் சங்கம் வலியுறுத்தியுள்ளது.

இதையும் படிங்க: "பாகிஸ்தான் ஆக்கிரமிப்பு காஷ்மீர் இந்தியாவின் பிரிக்க முடியாத பகுதி!" – ஐ.நா.வில் இந்தியா கடும் பதிலடி