ட்ரம்ப் அமைதி திட்டத்திற்கு விழுந்த அடி! காசாவில் 53 பேர் படுகொலை! இஸ்ரேல் செயலால் பின்னடைவு!

காசாவில் இஸ்ரேலின் வான்வழித் தாக்குதல்கள் மற்றும் துப்பாக்கிச் சூட்டில் குறைந்தது 53 பேர் உயிரிழந்துள்ளனர். பாதுகாப்பான மண்டலமாக அறிவிக்கப்பட்ட தெற்கு அல்-மவாசி உட்பட காசா முழுவதும் நேற்று (அக்டோபர் 2) இஸ்ரேல் ராணுவம் வான் மற்றும் தரைவழித் தாக்குதல்களை நடத்தியது. இதில் அப்பாவிகள், குழந்தைகள் உட்பட பலர் பாதிக்கப்பட்டுள்ளனர். 

இதே நேரத்தில், அமெரிக்க அதிபர் டிரம்ப் முன்னெடுத்த 20 அம்ச போர் நிறுத்த திட்டத்தை இஸ்ரேல் ஏற்றுக்கொண்ட நிலையில், ஹமாஸ் ஒப்புதல் அளிக்கலாம் என வெள்ளை மாளிகை எதிர்பார்க்கிறது. ஆனால், நேற்றைய தாக்குதல்கள் போர் நிறுத்த முயற்சிகளுக்கு பின்னடைவாக அமைந்துள்ளன.

தெற்கு அல்-மவாசியில் உணவகம் ஒன்றை இலக்காகக் கொண்ட இஸ்ரேலிய தாக்குதலில், ஒரு முதியவர், அவரது நான்கு மகன்கள் மற்றும் பேரன் உட்பட 9 பேர் உயிரிழந்தனர். மத்திய காசாவின் அல்-புரேஜ் அகதிகள் முகாமில் விறகு சேகரித்துக் கொண்டிருந்த ஒரே குடும்பத்தைச் சேர்ந்த நால்வர் கொல்லப்பட்டனர். 

இதையும் படிங்க: 72 மணி நேரம் தான் டைம்! ஹமாஸுக்கு ட்ரம்ப் கெடு! போரை நிறுத்த 20 அம்ச திட்டம்!

டெய்ர் அல்-பாலா பகுதியில் ஒரு வீட்டின் மீது நடந்த தாக்குதலில் பெண்கள் உட்பட 9 பேர் உயிரிழந்தனர். இஸ்ரேல் ராணுவம், "இந்த தாக்குதல்கள் ஹமாஸ் இலக்குகளை நோக்கியவை" எனக் கூறுகிறது, ஆனால் பாலஸ்தீன சுகாதாரத் துறை, அப்பாவிகள் அதிகம் பாதிக்கப்பட்டதாகத் தெரிவிக்கிறது.

முன்னதாக, புதன்கிழமை (அக்டோபர் 1) இஸ்ரேல், மக்களை தங்கள் பகுதிகளை விட்டு வெளியேறுமாறு எச்சரித்து, தெற்கிலிருந்து வடக்கு காசாவுக்குச் செல்லும் வழிகளை அடைத்தது. 

இஸ்ரேலிய பாதுகாப்பு அமைச்சர் இஸ்ரேல் காட்ஸ், "இஸ்ரேல் படைகள் காசா நகரை சுற்றிவளைக்கும் நிலைக்கு நெருங்கியுள்ளன. அங்கு எஞ்சியிருக்கும் எவரும் பயங்கரவாதிகள் அல்லது ஆதரவாளர்களாக கருதப்படுவார்கள்" என எச்சரித்தார். இது காசாவில் மேலும் பதற்றத்தை ஏற்படுத்தியுள்ளது.

கடந்த திங்கள்கிழமை (அக்டோபர் 1), அமெரிக்கா விரைந்து இஸ்ரேல் பிரதமர் பெஞ்சமின் நெதன்யாகுவுடன் விவாதித்து, 20 அம்ச போர் நிறுத்த திட்டத்தை அறிவித்தது. இதில், ஹமாஸ் ஆயுதங்களை கைவிட்டு, 48 பணியக்கைதிகளை விடுவித்து, அரசியலில் இருந்து வெளியேற வேண்டும். 

பதிலாக, இஸ்ரேல் 2,000 பாலஸ்தீனிய கைதிகளை விடுவித்து, அமைதி காக்கும் படையை அமைத்த பிறகு படிப்படியாக படைகளை வாபஸ் பெறும். அமெரிக்க அதிபர் டிரம்ப், ஹமாஸ் மீது அழுத்தம் கொடுத்து வருகிறார். 

வெள்ளை மாளிகை செய்தித்தொடர்பாளர் கரோலின் லீவிட், "ஹமாஸ் இந்த திட்டத்தை ஏற்கும்" என வியாழக்கிழமை (அக்டோபர் 2) தெரிவித்தார். ஹமாஸ் உள் கலந்தாலோசனையில் உள்ள நிலையில், நேற்றைய தாக்குதல்கள் போர் நிறுத்த வாய்ப்புகளை சிக்கலாக்கியுள்ளன.

காசா போர், அக்டோபர் 2023 முதல் தொடர்கிறது. இஸ்ரேல், ஹமாஸ் தலைமையினரை இலக்காகக் கொண்டு தாக்குதல்களை தீவிரப்படுத்தியுள்ளது. பாலஸ்தீன சுகாதாரத் துறை, காசாவில் 66,000-க்கும் மேல் உயிரிழப்புகளை பதிவு செய்துள்ளது. ஐ.நா. மற்றும் உலக நாடுகள், அப்பாவி உயிரிழப்புகளை கண்டித்துள்ளன. போர் நிறுத்த திட்டம் ஏற்கப்பட்டால், காசாவில் நிவாரண உதவிகள் அதிகரிக்கும் என எதிர்பார்க்கப்படுகிறது.

இந்த தாக்குதல்கள், மத்திய கிழக்கு அரசியலில் பதற்றத்தை மேலும் அதிகரித்துள்ளன. ஹமாஸ், இஸ்ரேல் தாக்குதல்களை "அரசியல் சதி" எனக் குற்றம் சாட்டியுள்ளது.

இதையும் படிங்க: காசா மக்களுக்கு சற்றே ஆறுதல்! ட்ரம்ப் நிபந்தனைகளுக்கு தலை ஆட்டிய இஸ்ரேல்!