பாரன் டிரம்ப் தலைக்கு ரூ.95 கோடி பரிசு!! டிரம்ப் குடும்பத்தை அதிரவைத்த ஈரான் அறிவிப்பு..!!

அமெரிக்க அதிபர் டொனால்டு டிரம்பின் இளைய மகன் பாரன் டிரம்புக்கு எதிராக ஈரான் அரசு தொலைக்காட்சியில் வெளியான அச்சுறுத்தல் வீடியோ உலக அளவில் பெரும் அதிர்வலைகளை ஏற்படுத்தியுள்ளது. சுமார் மூன்று நிமிடங்கள் நீளமுள்ள இந்த ஒளிபரப்பு, ஈரானிய இஸ்லாமிய புரட்சிக் காவல்படை (ஐஆர்ஜிசி) தொடர்புடைய ஊடகங்களால் தயாரிக்கப்பட்டு, அரசு சேனல் 3-ல் காட்டப்பட்டதாகத் தெரிகிறது. “பாரன் டிரம்ப்பை எங்கு, எப்படிக் கொல்லலாம்?” என்ற தலைப்பில் அமைந்த இந்த வீடியோவில், 20 வயதான பாரனின் நடமாட்டங்கள் முழுமையாகக் கண்காணிக்கப்படுவதாகக் கூறப்பட்டுள்ளது.

நியூயார்க் பல்கலைக்கழகத்தில் (என்ஒய்யூ) பயிலும் பாரனின் தங்கும் இடம், அவரது பல்கலைக்கழக வளாகம், ரகசிய சேவை அதிகாரிகளின் நிலைகள், பாதுகாப்பு வாகனங்கள் ஆகியவை குறித்த காட்சிகள் மற்றும் கணினி உருவாக்கப்பட்ட வரைபடங்கள் வீடியோவில் இடம்பெற்றுள்ளன. டிரம்ப் டவரும் அதில் காட்டப்பட்டுள்ளது.

மேலும், அவரது ஆன்லைன் கேமிங் கணக்குகள் (எக்ஸ்பாக்ஸ், டிஸ்கார்டு, ஃபிஃபா) மற்றும் நண்பர்களின் விவரங்களும் சேகரிக்கப்பட்டுள்ளதாகக் கூறப்படுகிறது. ஒரு பெண் ரகசிய சேவை பாதுகாப்பைத் தாண்டி அவரிடம் தனிப்பட்ட சந்திப்பு நடத்தியதாகவும், அந்தத் தகவல்கள் வீடியோ தயாரிப்பாளர்களுக்குக் கிடைத்ததாகவும் கூறப்பட்டுள்ளது. இந்தக் கூற்றுகள் எதுவும் சுயாதீனமாக உறுதிப்படுத்தப்படவில்லை.

இதையும் படிங்க: ஈரான் - அமீரகம் இடையே போர் மூளுமா? கொந்தளிக்கும் வளைகுடா... பதற்றம் உச்சம்!

வீடியோவின் முடிவில், பாரனைக் கொலை செய்பவர்களுக்கு 1 கோடி அமெரிக்க டாலர் (சுமார் ரூ.95 கோடி) பரிசு வழங்கப்படும் என்று அறிவிக்கப்பட்டுள்ளது. “பலர் இந்தப் பரிசைப் பெறக் காத்திருக்கின்றனர். இது தொடக்கமே. பாரன் டிரம்ப், எங்களுக்காகக் காத்திருங்கள்!” என்ற எச்சரிக்கையுடன் வீடியோ முடிவடைகிறது. இதற்கு முன் ஜூலையில் மெலானியா டிரம்மை இலக்கு வைத்து இதேபோன்ற வீடியோ ஒன்றும் வெளியிடப்பட்டிருந்தது.

அமெரிக்க ரகசிய சேவை இந்த வீடியோ குறித்து அறிந்திருப்பதாகவும், பாதுகாக்கப்படும் நபர்களுக்கு எதிரான அச்சுறுத்தல்களை விசாரிப்பதாகவும் அதிகாரப்பூர்வமாகத் தெரிவித்துள்ளது. பாதுகாப்பு நடவடிக்கைகள் குறித்த விரிவான விவரங்களை வெளியிட அவர்கள் மறுத்துள்ளனர்.

அமெரிக்கா-ஈரான் இடையே ஏற்கனவே நீடித்து வரும் கடுமையான பதட்டம் மற்றும் மோதல் சூழலில், டிரம்ப் குடும்ப உறுப்பினர்களை நேரடியாக இலக்கு வைக்கும் இந்த ஒளிபரப்பு, இரு நாடுகளுக்கும் இடையிலான உறவில் மேலும் பதற்றத்தை அதிகரித்துள்ளது. பாதுகாப்பு நிபுணர்கள் இதை உளவியல் போர்முறை எனக் கருதுகின்றனர்.

இதையும் படிங்க: ஈரான் அச்சுறுத்தலுக்கு மத்தியில் டிரம்பின் ரகசிய பயணம்.. ‘ஏர் ஃபோர்ஸ் ஒன்’ பின்னணி என்ன?