ஈரான் - அமீரகம் இடையே போர் மூளுமா? கொந்தளிக்கும் வளைகுடா... பதற்றம் உச்சம்!

ஐக்கிய அரபு அமீரகம், ஈரானிடமிருந்து இரண்டு பாலிஸ்டிக் ஏவுகணைகள் தனது திசையில் ஏவப்பட்டதாகக் குற்றம்சாட்டி, ஈரானுடனான அனைத்து வர்த்தகம், வணிகப் பரிமாற்றங்கள் மற்றும் நிதி நடவடிக்கைகளையும் மேலும் அறிவிப்பு வரும் வரை நிறுத்திவிட்டது. இது இரு நாடுகளுக்கும் இடையேயான உறவில் புதிய பதற்றத்தை உருவாக்கியுள்ளது.

நேற்று மாலை அமீரக பாதுகாப்பு அமைச்சகம் வெளியிட்ட அறிக்கையில், ஈரானிலிருந்து ஏவப்பட்ட இரண்டு பாலிஸ்டிக் ஏவுகணைகளை தனது வான் பாதுகாப்பு அமைப்புகள் கண்டறிந்ததாகத் தெரிவிக்கப்பட்டது. ஒரு ஏவுகணை அமீரகத்தின் கடல் எல்லைக்கு வெளியே விழுந்தது; மற்றொன்று நாட்டின் பிராந்திய நீர்ப்பகுதியில் விழுந்தது. இரு ஏவுகணைகளும் கடலில் விழுந்ததால் உயிரிழப்போ பெரிய சேதமோ ஏற்படவில்லை. மதிப்பீடுகளின்படி இவை கடல் போக்குவரத்தை இலக்கு வைத்ததாக அமைச்சகம் கூறியது. 

இதையடுத்து பொதுமக்களுக்கு செல்போன் மூலம் அவசர எச்சரிக்கை அனுப்பப்பட்டு, பாதுகாப்பான இடங்களுக்குச் செல்ல அறிவுறுத்தப்பட்டது. பின்னர் நிலைமை பாதுகாப்பானது என உறுதிப்படுத்தப்பட்டது. மே மாதத்திற்குப் பிறகு அமீரகத்தை நோக்கிய இத்தகைய சம்பவம் இதுவே முதல் முறையாகும். இந்த சம்பவத்தைத் தொடர்ந்து அமீரக வெளியுறவு அமைச்சகம் இன்று அதிகாலையில் அறிவித்தது. 

இதையும் படிங்க: ஈரான் அச்சுறுத்தலுக்கு மத்தியில் டிரம்பின் ரகசிய பயணம்.. ‘ஏர் ஃபோர்ஸ் ஒன்’ பின்னணி என்ன?

பிராந்தியத்தில் அமைதி மற்றும் பாதுகாப்பைக் குலைக்கும் வகையில் ஏற்பட்டுள்ள பதற்றத்தின் காரணமாக ஈரானுடனான அனைத்து வர்த்தகம், வணிகப் பரிமாற்றங்கள் மற்றும் நிதி பரிவர்த்தனைகளும் மேலும் அறிவிப்பு வரும் வரை நிறுத்தப்பட்டுள்ளதாக அதன் மூலோபாய தொடர்புகள் இயக்குநர் அப்ரா அல் ஹமேலி தெரிவித்தார். அதேநேரம் உரையாடல் மற்றும் பிராந்திய ஒத்துழைப்புக்கு அமீரகம் உறுதியாக இருப்பதாகவும் அவர் குறிப்பிட்டார்.

ஈரான் இந்தக் குற்றச்சாட்டை முற்றிலும் மறுத்துள்ளது. வெளியுறவு அமைச்சக செய்தித் தொடர்பாளர் எஸ்மாயில் பகாயி இதை “அடிப்படை இல்லாதது” என விவரித்து, பிராந்திய நாடுகள் அத்தகைய குற்றச்சாட்டுகளைத் தவிர்க்க வேண்டும் எனக் கோரியுள்ளார். இதற்கு முன்னர் ஆகஸ்ட் 13 அன்று ஹார்முஸ் ஜலசந்தியில் அபுதாபி தேசிய எண்ணெய் நிறுவனம் (ADNOC) தொடர்பான இரண்டு கப்பல்கள் தாக்கப்பட்டதாக அமீரகம் குற்றம்சாட்டியிருந்தது. அதற்கு முன்னும் இதுபோன்ற சம்பவங்கள் நடந்தன. 

உயிரிழப்புகள் இல்லாவிட்டாலும் சர்வதேச கப்பல் போக்குவரத்துக்கு இவை அச்சுறுத்தலாக அமைந்துள்ளன. துபாய் நீண்டகாலமாக ஈரானுக்கான முக்கிய வர்த்தக மையமாக இருந்த நிலையில், இந்த முடக்கம் இரு நாடுகளின் பொருளாதார உறவுகளில் பெரும் தாக்கத்தை ஏற்படுத்தும் என எதிர்பார்க்கப்படுகிறது.

பிப்ரவரி முதல் அமெரிக்கா-இஸ்ரேல் மற்றும் ஈரான் இடையேயான மோதல் பின்னணியில் வளைகுடாவில் பதற்றம் தொடர்ந்து வருகிறது. நேரடி போர் வெடிக்கும் அபாயம் குறித்த அச்சம் நிலவுகிறது. அடுத்த சில நாட்கள் முக்கியமானதாகக் கருதப்படுகிறது. தாக்குதல்கள் தொடர்ந்தால் நிலைமை மேலும் மோசமடைய வாய்ப்புள்ளது.
 

இதையும் படிங்க: உலக நலனுக்காக.. ஈரான் மீது திட்டமிட்ட ராணுவத் தாக்குதல் நிறுத்தம்..!! டிரம்ப் அதிரடி அறிவிப்பு..!!