அதானி ஹாப்பி! சுமார் ரூ.2,450 கோடி லஞ்சம் அளித்ததாக புகார்! மோசடி வழக்குகளை ரத்து செய்தது அமெரிக்கா!
தொழிலதிபா் கௌதம் அதானிக்கு எதிராக அமெரிக்க நீதிமன்றத்தில் தாக்கல் செய்யப்பட்டிருந்த மோசடி வழக்குகள் அனைத்தும் ரத்து செய்யப்பட்டது.
by
தொழிலதிபர் கௌதம் அதானி மற்றும் அவரது குழுமத்துக்கு எதிராக அமெரிக்க நீதிமன்றத்தில் தொடுக்கப்பட்டிருந்த மோசடி வழக்குகள் அனைத்தும் ரத்து செய்யப்பட்டுள்ளன. இந்த முடிவு அதானி குழுமத்துக்கு பெரும் நிம்மதியை அளித்துள்ளது.
கடந்த 2024-ம் ஆண்டு அமெரிக்க நீதித்துறை, சூரிய மின்சக்தி திட்ட ஒப்பந்தங்கள் பெற இந்திய அதிகாரிகளுக்கு 265 மில்லியன் டாலர் (சுமார் ரூ.2,450 கோடி) லஞ்சம் கொடுத்ததாக குற்றம் சாட்டியது.
அமெரிக்க வங்கிகள் மற்றும் முதலீட்டாளர்களிடம் இருந்து பல ஆயிரம் கோடி ரூபாய் திரட்டியபோது லஞ்ச விவகாரத்தை மறைத்ததாகவும் குற்றப்பத்திரிகை தாக்கல் செய்யப்பட்டது. பங்கு மோசடி, தகவல் தொடர்பு மோசடி உள்ளிட்ட பல குற்றச்சாட்டுகளில் அமெரிக்க பங்குச்சந்தை ஒழுங்காற்று ஆணையம் (SEC) தனி வழக்கும் தொடுத்திருந்தது.
இதையும் படிங்க: "அரியர்ஸ் வைக்காதீங்க"..! நேரு ஸ்டேடியத்தில் அமைச்சர் ஆதவ் விளையாட்டு வீரர்களுக்கு அறிவுரை..!
கௌதம் அதானியும் அவரது உறவினர் சாகர் அதானியும் இந்த குற்றச்சாட்டுகளை முழுமையாக மறுத்து வந்தனர். அண்மையில் அதானி தரப்பில் வழக்கைத் தள்ளுபடி செய்யக் கோரி மனு தாக்கல் செய்யப்பட்டது. டொனால்ட் டிரம்ப் தலைமையிலான அமெரிக்க நீதித்துறை கடந்த வாரம் வழக்கை கைவிட ஒப்புதல் அளித்ததைத் தொடர்ந்து, நியூயார்க் மாவட்ட நீதிமன்றம் அனைத்து வழக்குகளையும் ரத்து செய்து உத்தரவிட்டுள்ளது.
இந்த வழக்கை எதிர்கொள்ள அதானி சமீபத்தில் புகழ்பெற்ற அமெரிக்க சட்ட நிறுவனமான ‘சல்லிவன் & கிராம்வெல்’ நிறுவனத்தின் இணைத் தலைவர் ராபர்ட் ஜே. ஜியுஃப்ரா ஜூனியர் தலைமையில் புதிய சட்டக் குழுவை நியமித்திருந்தார். ஜியுஃப்ரா, அரசுத் தரப்பிடம் போதுமான ஆதாரங்கள் இல்லை என வாதிட்டதாகக் கூறப்படுகிறது.
இந்த வழக்கு கைவிடப்பட்டதற்கு பின்னணியில், அமெரிக்காவில் 10 பில்லியன் டாலர் (சுமார் ரூ.85,000 கோடி) முதலீடு செய்து 15,000 வேலைவாய்ப்புகளை உருவாக்க அதானி உத்தரவாதம் அளித்ததும் ஒரு காரணமாகக் கூறப்படுகிறது.
இந்த முடிவு அதானி குழுமத்தின் சர்வதேச நற்பெயருக்கு பெரும் ஊக்கமாக அமைந்துள்ளது. உலக அளவில் பெரிய அளவிலான ஆற்றல் திட்டங்களை செயல்படுத்தி வரும் அதானி குழுமம், இந்த வழக்கு ரத்து மூலம் முழு கவனத்தையும் வியாபார விரிவாக்கத்திலும் புதிய முதலீடுகளிலும் செலுத்தும் என எதிர்பார்க்கப்படுகிறது.
இதையும் படிங்க: சட்டையை சுழற்றிய விஜய்... தமிழகம் முழுவதும் ரேஷன் கடைகளுக்கு பறந்த அதிரடி உத்தரவு...!
