ரஷிய கச்சா எண்ணெய் இறக்குமதியில் இந்தியா புதிய உச்சம்: ஜூலையில் 50.8% அதிகரிப்பு!!
2022-க்குப் பிறகு ரஷ்யாவின் தள்ளுபடி விலை எண்ணெய் இந்தியாவின் முதன்மை ஆதாரமாக மாறியது.
- Sat, 15 Aug 2026 10:56:10 IST
by
Shanthi M.
- #
இந்தியாவின் கச்சா எண்ணெய் இறக்குமதியில் ரஷ்யாவின் பங்கு ஜூலை மாதத்தில் 50.83 சதவீதத்தை எட்டி வரலாற்று உச்சத்தைப் பதிவு செய்துள்ளது. உலகின் மூன்றாவது பெரிய எண்ணெய் நுகர்வோரும் இறக்குமதியாளருமான இந்தியா, அந்த மாதத்தில் மட்டும் நாளொன்றுக்கு சராசரியாக 24.7 லட்சம் முதல் 28 லட்சம் பேரல்கள் வரை ரஷ்ய கச்சா எண்ணெயை வாங்கியுள்ளது. இது கடந்த ஆண்டு ஜூலையுடன் ஒப்பிடும்போது 62.4 சதவீத அதிகரிப்பாகும்.
ஒரு தனி நாடு இந்தியாவின் மாத எண்ணெய் தேவையில் பாதிக்கும் மேல் வழங்குவது இதுவே முதல்முறை. முந்தைய மாதங்களில் அமெரிக்காவுடனான வர்த்தகப் பேச்சுவார்த்தைகள் மற்றும் சாத்தியமான சுங்கவரி அச்சுறுத்தல்கள் காரணமாக இந்திய சுத்திகரிப்பு நிறுவனங்கள் ரஷ்ய எண்ணெய் கொள்முதலை ஓரளவு குறைத்திருந்தன. ஆனால் மத்திய கிழக்கில் தீவிரமடைந்த மோதல் சூழல், ஹார்முஸ் ஜலசந்தி மற்றும் பாப் அல்-மந்தெப் போன்ற முக்கிய கடல் வழித்தடங்களில் தடைகளை ஏற்படுத்தியது.
இதனால் பாரம்பரிய வளைகுடா நாடுகளிடமிருந்து எண்ணெய் வரத்து பாதிக்கப்பட்டது. உள்நாட்டு சுத்திகரிப்பு ஆலைகளின் உற்பத்தியைத் தொடர, மலிவு விலையில் கிடைக்கும் ரஷ்ய ‘யூரல்ஸ்’ கச்சா எண்ணெயை மீண்டும் அதிக அளவில் வாங்கத் தொடங்கின இந்திய நிறுவனங்கள். ஏப்ரல் முதல் ஜூலை வரையிலான காலத்தில் சவுதி அரேபியா மற்றும் ஈராக் உள்ளிட்ட மத்திய கிழக்கு நாடுகளின் கூட்டுப் பங்கு 43 சதவீதத்திலிருந்து சுமார் 30 சதவீதமாகச் சுருங்கியுள்ளது.
இதையும் படிங்க: சர்வதேச வழக்கில் புதிய திருப்பம்.. டி.ஒய். சந்திரசூட்டை மத்தியஸ்தராக நியமித்த ரஷ்யா..!!
அதே நேரத்தில் லத்தீன் அமெரிக்க நாடுகளிலிருந்து வரும் எண்ணெயின் பங்கும் உயர்ந்துள்ளது. இந்தியா தனது கச்சா எண்ணெய் தேவையில் 90 சதவீதத்திற்கும் மேல் இறக்குமதியைச் சார்ந்திருப்பதால், உலகளாவிய விநியோகச் சங்கிலி இடையூறுகளுக்கு எளிதில் பாதிக்கப்படக்கூடிய நிலையில் உள்ளது. 2022-க்குப் பிறகு ரஷ்யாவின் தள்ளுபடி விலை எண்ணெய் இந்தியாவின் முதன்மை ஆதாரமாக மாறியது.
இந்த அதிகரிப்பு அமெரிக்காவின் கவலையை மேலும் தீவிரப்படுத்தியுள்ளது. ரஷ்ய கச்சா எண்ணெயை வாங்கும் நாடுகள் மற்றும் நிறுவனங்கள் மீது 100 சதவீதம் வரை சுங்கவரி விதிக்கும் மசோதாவுக்கு அமெரிக்க மேலவை சமீபத்தில் ஒப்புதல் அளித்துள்ளது. இது பிரதிநிதிகள் சபையின் ஒப்புதலையும் பெற வேண்டும்.
வரவிருக்கும் மாதங்களில் இந்திய சுத்திகரிப்பு ஆலைகள் கூடுதல் கட்டுப்பாடுகளை எதிர்கொள்ளலாம் அல்லது கொள்முதல் உத்திகளை மாற்ற வேண்டிய நிலை ஏற்படலாம் என வர்த்தக வல்லுநர்கள் எச்சரிக்கின்றனர். ஆற்றல் பாதுகாப்பை உறுதி செய்யும் அதே வேளையில், புவிசார் அரசியல் அழுத்தங்களையும் சமன் செய்ய வேண்டிய சவாலை இந்தியா எதிர்கொள்கிறது.
இதையும் படிங்க: ரஷ்யா மீது வன்மத்தை கக்கும் உக்ரைன்.. தொடர் டிரோன் தாக்குதல்.. 7 பேர் பரிதாப பலி..!!
