எரிவாயு தட்டுப்பாடு - பாக்.-ல் 2 வாரம் ஸ்கூல் லீவு..!! அரசு ஊழியர்களுக்கு வாரம் 4 நாள் தான் வேலை..!!

மத்திய கிழக்கில் ஏற்பட்டுள்ள போர் காரணமாக உலக அளவில் எரிபொருள் விநியோகம் பெரிதும் பாதிக்கப்பட்டுள்ளது. இதனால் எண்ணெய் விலைகள் கடுமையாக உயர்ந்து, பல நாடுகள் தீவிர நெருக்கடியை எதிர்கொண்டுள்ளன. பாகிஸ்தான், எரிபொருள் இறக்குமதியை மிகவும் சார்ந்திருப்பதால், இந்த நெருக்கடி அந்நாட்டில் கடுமையான தாக்கத்தை ஏற்படுத்தியுள்ளது.

அங்கு ஏற்கனவே எரிவாயு மற்றும் பெட்ரோல் தட்டுப்பாடு நிலவி வரும் நிலையில், எரிபொருள் விலை உயர்வு மக்களின் அன்றாட வாழ்க்கையை பாதித்து வருகிறது. இந்த சூழலில், பாகிஸ்தான் பிரதமர் ஷெபாஸ் ஷெரீப் தேசத்திற்கு உரையாற்றியபோது, எரிபொருள் பயன்பாட்டைக் கட்டுப்படுத்துவதற்காக பல கடுமையான நடவடிக்கைகளை அறிவித்துள்ளார். இவை அரசு செலவினங்களைக் குறைப்பதோடு, நாட்டின் பொருளாதார நிலைத்தன்மையைப் பாதுகாக்கும் நோக்கில் எடுக்கப்பட்டுள்ளன.

மிக முக்கியமாக, அனைத்து பள்ளிகளுக்கும் இரண்டு வார கால விடுமுறை அறிவிக்கப்பட்டுள்ளது. இதனால் மாணவர்கள் வீட்டிலிருந்து பயணம் செய்ய வேண்டிய அவசியம் இல்லாமல் போகும். அதேநேரம், கல்லூரிகள் மற்றும் பல்கலைக்கழகங்கள் உட்பட உயர்கல்வி நிறுவனங்கள் அனைத்தும் ஆன்லைன் வகுப்புகளுக்கு மாற்ற உத்தரவிடப்பட்டுள்ளது. இதன்மூலம் மாணவர்கள் மற்றும் ஆசிரியர்களின் பயணம் குறைந்து, எரிபொருள் சேமிப்பு அதிகரிக்கும் என எதிர்பார்க்கப்படுகிறது.

இதையும் படிங்க: பாகிஸ்தானில் எகிறிய பெட்ரோல் விலை..!! அப்போ இந்தியாவில்..?? கதிகலங்கி நிற்கும் மக்கள்..!!

அரசு அதிகாரிகளுக்கான எரிபொருள் ஒதுக்கீடு 50 சதவீதமாகக் குறைக்கப்பட்டுள்ளது. இது அடுத்த இரண்டு மாதங்களுக்கு அமலில் இருக்கும். மேலும், அமைச்சர்கள் மற்றும் உயர் அதிகாரிகளின் பாதுகாப்பு வாகனங்கள் எண்ணிக்கை பாதியாகக் குறைக்கப்பட்டுள்ளது. அத்தியாவசிய சேவைகளைத் தவிர்த்து, பெரும்பாலான அரசு வாகனங்கள் பயன்பாட்டிலிருந்து தற்காலிகமாக நீக்கப்பட உள்ளன. அரசு அலுவலகங்கள் (வங்கிகளைத் தவிர) வாரத்தில் 4 நாட்கள் மட்டுமே செயல்பட உத்தரவிடப்பட்டுள்ளது.

மேலும், அலுவலகங்களில் 50 சதவீத ஊழியர்கள் மட்டுமே நேரடியாக பணியாற்ற வேண்டும்; மீதமுள்ளவர்கள் வீட்டிலிருந்து பணியாற்றும் (வொர்க் ஃப்ரம் ஹோம்) முறைக்கு மாற்றப்பட வேண்டும் என அறிவிக்கப்பட்டுள்ளது. இதனால் போக்குவரத்து செலவு மற்றும் எரிபொருள் நுகர்வு கணிசமாகக் குறையும். பிரதமர் ஷெபாஸ் ஷெரீப் இந்த நடவடிக்கைகள் தற்காலிகமானவை என்றும், மத்திய கிழக்கு நிலைமை சீரடையும் வரை இவை தொடரும் என்றும் தெரிவித்துள்ளார். 

மக்கள் இந்த கடினமான காலகட்டத்தில் ஒத்துழைப்பு அளிக்க வேண்டும் எனவும் அவர் வலியுறுத்தியுள்ளார். இதேபோல், அத்தியாவசிய பொருட்களை வைத்திருப்பவர்கள் விலை உயர்வு செய்யக்கூடாது என வணிகர்களுக்கு எச்சரிக்கை விடுக்கப்பட்டுள்ளது. இந்த நெருக்கடி பாகிஸ்தானின் பொருளாதாரத்தை மேலும் சவாலுக்கு உள்ளாக்கியுள்ள நிலையில், அரசு இத்தகைய தீவிர நடவடிக்கைகளை எடுத்துள்ளது. மக்களிடையே இது கல்வி மற்றும் அன்றாட வாழ்க்கையை பாதிக்கும் என்பதால் பல்வேறு விவாதங்களை ஏற்படுத்தியுள்ளது.

இதையும் படிங்க: கராச்சி அமெரிக்க தூதரகம் மீது தாக்குதல்... துப்பாக்கிச்சூட்டில் 8 பேர் பலி! பாகிஸ்தானில் போர் பதற்றம்!