எரிபொருள் விலை உயர்வுக்கு ஈரான் போர் காரணமல்ல!! உக்ரைன்தான் காரணம்!! அதிபர் ட்ரம்ப் குற்றச்சாட்டு!

அமெரிக்காவில் தொடர்ந்து அதிகரித்து வரும் எரிபொருள் விலை குறித்து அதிபர் டொனால்டு டிரம்ப் புதிய விளக்கம் அளித்துள்ளார். ஈரானுடனான போர்தான் விலை உயர்வுக்கு முக்கிய காரணம் என்ற விமர்சனத்தை மறுத்துள்ள அவர், ரஷ்யாவின் எண்ணெய் சுத்திகரிப்பு நிலையங்கள் மீது உக்ரைன் நடத்தி வரும் தாக்குதல்களும், அமெரிக்காவில் சில சுத்திகரிப்பு நிலையங்கள் மூடப்பட்டிருப்பதும் முக்கிய காரணங்கள் என்று குற்றம்சாட்டியுள்ளார்.

அமெரிக்காவில் இடைக்கால தேர்தல் நெருங்கி வரும் நிலையில், எரிபொருள் விலை உயர்வு அரசியல் ரீதியாகவும் முக்கிய விவாதமாக மாறியுள்ளது. இந்த சூழலில் டிரம்ப் தனது சமூக வலைதளப் பதிவில், ஹார்முஸ் ஜலசந்தி வழியாக கச்சா எண்ணெய் விநியோகம் மீண்டும் அதிகரித்து வருவதாக குறிப்பிட்டுள்ளார். இதனால் அந்த வழித்தடத்தில் ஏற்பட்ட விநியோகப் பாதிப்பு முன்பை விட குறைந்துள்ளதாக அவர் தெரிவித்துள்ளார்.

எனவே, தற்போதைய எரிபொருள் விலை உயர்வுக்கு ஹார்முஸ் ஜலசந்தி பிரச்சினையை மட்டும் காரணமாக கூற முடியாது என்பது டிரம்பின் வாதமாக உள்ளது. குறிப்பாக ரஷ்ய எண்ணெய் சுத்திகரிப்பு நிலையங்கள் மீது உக்ரைன் நடத்தும் தாக்குதல்கள் எரிபொருள் சந்தையில் தாக்கத்தை ஏற்படுத்துவதாக அவர் தெரிவித்துள்ளார்.

இதையும் படிங்க: ரஷ்யாவில் Plague அச்சம்!! புடினுடன் விரைவில் பேசுவேன்! டிரம்ப் வெளியிட்ட பரபரப்பு தகவல்!

உக்ரைன் தாக்குதல்களால் ரஷ்யாவின் எரிபொருள் உற்பத்தி பாதிக்கப்பட்டு, குறிப்பாக டீசல் சந்தையில் அழுத்தம் ஏற்பட்டுள்ளதாகவும் தகவல்கள் வெளியாகியுள்ளன.

இதனுடன், ஜனநாயகக் கட்சி ஆளும் மாகாணங்களில் சுத்திகரிப்பு நிலையங்கள் மூடப்பட்டிருப்பதாகவும் டிரம்ப் குற்றம்சாட்டியுள்ளார். கலிபோர்னியா உள்ளிட்ட பகுதிகளை அவர் தனது பதிவில் குறிப்பிட்டுள்ளார். இதனால் உள்நாட்டு உற்பத்தி மற்றும் விநியோகத்திலும் பாதிப்பு ஏற்பட்டுள்ளதாக அவர் தெரிவித்துள்ளார்.

எனினும், சர்வதேச எரிபொருள் விலை உயர்வுக்கு பல்வேறு காரணிகள் இருப்பதாக சந்தை ஆய்வுகள் தெரிவிக்கின்றன. ஈரான் போர், ஹார்முஸ் ஜலசந்தி வழியாக எண்ணெய் போக்குவரத்தில் ஏற்பட்ட பாதிப்பு, ரஷ்யா-உக்ரைன் மோதல் மற்றும் சுத்திகரிப்பு திறன் தொடர்பான பிரச்சினைகள் என பல காரணிகள் ஒன்றாக தாக்கத்தை ஏற்படுத்தி வருகின்றன.

இதையும் படிங்க: பிளைதுபாய் விமானத்தில் கத்திக்குத்து! எங்களுக்கு எந்த சம்பந்தமும் இல்லை! ஈரான் திட்டவட்டமாக மறுப்பு!