ஈரானுடன் சமரசமா? போர் நிறுத்தம் குறித்து அமெரிக்க அதிபர் டிரம்ப் அதிரடி அறிவிப்பு!

வாஷிங்டன்: அமெரிக்கா–ஈரான் இடையேயான போர் நீடித்து வரும் நிலையில், போர் நிறுத்த பேச்சுவார்த்தைக்கு ஈரான் வருவதற்கு எந்த காலக்கெடுவும் விதிக்கப்படவில்லை என்று அமெரிக்க அதிபர் டொனால்டு டிரம்ப் தெரிவித்துள்ளார். ஈரானுடன் பேச்சுவார்த்தை நடத்துவதில் தனக்கு எந்த அவசரமும் இல்லை என்றும் அவர் கூறியிருப்பது சர்வதேச அளவில் கவனத்தை ஈர்த்துள்ளது.

அமெரிக்கா மற்றும் ஈரான் இடையே தொடங்கியுள்ள போருக்கு விரைவில் 6 மாதங்கள் நிறைவடைய உள்ளதாக கூறப்படுகிறது. இந்நிலையில், இரு நாடுகளுக்கும் இடையே இதுவரை உறுதியான போர் நிறுத்த ஒப்பந்தம் ஏற்படவில்லை. போரை முடிவுக்கு கொண்டு வருவதற்கான முயற்சிகள் தொடர்ந்து நடைபெற்று வருகின்றன.

இரு நாடுகளுக்கும் இடையே சமரசத்தை ஏற்படுத்த கத்தார் மற்றும் பாகிஸ்தான் மத்தியஸ்த முயற்சிகளில் ஈடுபட்டுள்ளன. பேச்சுவார்த்தைக்கு சாதகமான சூழலை உருவாக்கும் நோக்கில் கத்தார் பிரதமர் முகமது பின் அப்துல் ரஹ்மான் பின் ஜாசிம் அல் தானி, டெஹ்ரானுக்குப் பயணம் மேற்கொள்ள உள்ளதாக தெரிவிக்கப்பட்டுள்ளது.

இதையும் படிங்க: மீண்டும் வெடித்தது வர்த்தகப் போர்! கனடா பொருட்களுக்கு 50% வரி! அமெரிக்க அதிபர் டிரம்புக்கு மார்க் கார்னி பதிலடி!

இந்த சூழலில் செய்தியாளர்களிடம் பேசிய டிரம்ப், ஈரானுடன் போர் நிறுத்தம் தொடர்பாக தனக்கு எந்த அவசரமும் இல்லை என்று தெரிவித்தார். பேச்சுவார்த்தைக்கு ஈரான் வருவதற்கு எந்த காலக்கெடுவும் அமெரிக்கா சார்பில் விதிக்கப்படவில்லை என்றும் அவர் தெளிவுபடுத்தினார்.

ஈரான் எவ்வளவு காலம் எடுத்துக்கொண்டாலும் தனக்கு பிரச்சினையில்லை என்றும் டிரம்ப் குறிப்பிட்டார். மேலும், தற்போதைய போரில் அமெரிக்கா மிகப்பெரிய வெற்றியை பெற்றுள்ளதாக அவர் கூறினார்.

ஈரான் கடுமையான பணவீக்கத்தை எதிர்கொண்டு வருவதாகவும், அந்நாட்டின் பொருளாதாரம் நிலைகுலைந்துள்ளதாகவும் டிரம்ப் விமர்சித்தார். மேலும், ஈரான் தனது மக்களை மோசமாக நடத்துவதாகவும், போராடும் மக்களுக்கு எதிராக கடுமையான நடவடிக்கைகள் மேற்கொள்ளப்படுவதாகவும் அவர் குற்றம்சாட்டினார்.

இதற்கிடையே, போரை முடிவுக்கு கொண்டு வருவதற்கான மத்தியஸ்த முயற்சிகள் தீவிரமடைந்துள்ளன. கத்தார் பிரதமரின் டெஹ்ரான் பயணம் முக்கியத்துவம் பெற்றுள்ள நிலையில், ஈரான் தரப்பின் அடுத்தகட்ட முடிவு என்னவாக இருக்கும் என்ற எதிர்பார்ப்பு எழுந்துள்ளது.

போர் நீடிக்கும் நிலையில், பேச்சுவார்த்தைக்கு அவசர காலக்கெடு இல்லை என்ற டிரம்பின் நிலைப்பாடு, அமெரிக்கா–ஈரான் இடையேயான பதற்றம் உடனடியாக முடிவுக்கு வருமா என்ற கேள்வியையும் எழுப்பியுள்ளது. மத்தியஸ்த நாடுகளின் முயற்சிகள் எந்த அளவுக்கு பலனளிக்கும் என்பது அடுத்தகட்ட நகர்வுகளில்தான் தெரியவரும்.

இதையும் படிங்க: கடன் சுமையில் அமெரிக்கா! வரலாறு காணாத அளவுக்கு உயர்ந்த பொதுக்கடன்… டிரம்புக்கு புதிய சிக்கல்!