பேச்சுவார்த்தை தோல்வி அடைந்தால்!! அமெரிக்கா கடுமையான நடவடிக்கை எடுக்கக்கூடும்! ட்ரம்ப் வார்னிங்!!

அமெரிக்க அதிபர் Donald Trump, ஈரான் உடனான பேச்சுவார்த்தைகள் தோல்வியடைந்தால் அமெரிக்கா கடுமையான நடவடிக்கைகளை எடுக்கக்கூடும் என எச்சரிக்கை விடுத்துள்ளார். வாஷிங்டனில் செய்தியாளர்களிடம் பேசிய டிரம்ப், ஈரானுடனான மோதலை முடிவுக்கு கொண்டு வரும் ஒப்பந்தம் விரைவில் எட்டப்பட வேண்டும் என்றும், அதற்காக ஈரான் உடனடியாக கையெழுத்திட வேண்டும் என்றும் வலியுறுத்தினார்.

“ஈரான் கட்டாயமாக ஒப்பந்தம் செய்து கொள்ள வேண்டும். தற்போது நடைபெறும் பேச்சுவார்த்தைகள் தோல்வியடைந்தால், அமெரிக்கா புதிய தாக்குதல்களை தொடுக்க வேண்டிய சூழல் உருவாகலாம்” என்று டிரம்ப் தெரிவித்தார். மேலும், “இந்த விவகாரத்தில் நாங்கள் இறுதிக்கட்டத்தில் இருக்கிறோம். இது அமைதியாக முடிவடையலாம் அல்லது மேலும் மோசமடையலாம். சில விரும்பத்தகாத நடவடிக்கைகளை எடுக்க வேண்டிய நிலை ஏற்படலாம். ஆனால் அது நடக்காது என்று நம்புகிறேன்” என்றும் கூறினார்.

ஈரான் அணு திட்டம் மற்றும் மத்திய கிழக்கு பாதுகாப்பு தொடர்பாக அமெரிக்கா, இஸ்ரேல் மற்றும் ஈரான் இடையே கடந்த சில மாதங்களாக கடுமையான பதற்றம் நிலவி வருகிறது. குறிப்பாக கடந்த பிப்ரவரியில் அமெரிக்கா மற்றும் இஸ்ரேல் இணைந்து ஈரான் மீது தாக்குதல் நடத்தியதைத் தொடர்ந்து சூழ்நிலை மேலும் தீவிரமடைந்தது. இதற்குப் பிறகும் பல சுற்று பேச்சுவார்த்தைகள் நடந்தாலும் நிரந்தர தீர்வு எட்டப்படவில்லை.

இதையும் படிங்க: அதிபர் பதவி முடிந்ததும் இஸ்ரேல் பிரதமராக போட்டியிடுவேன்! பகீர் பற்ற வைத்த ட்ரம்ப்! நெதன்யாகு நிலை?!

இஸ்ரேல் பிரதமர் Benjamin Netanyahu குறித்து பேசிய டிரம்ப், “இந்த விவகாரத்தில் நான் சொல்வதைத்தான் நேதன்யாகு செய்வார்” என்று குறிப்பிட்டார். இந்த கருத்தும் சர்வதேச அரசியல் வட்டாரங்களில் கவனம் பெற்றுள்ளது.

இதற்கிடையில், அமெரிக்கா அல்லது இஸ்ரேல் மீண்டும் தாக்குதல் நடத்தினால், அது மத்திய கிழக்கில் பெரிய அளவிலான போராக மாறும் அபாயம் இருப்பதாக ஈரானின் புரட்சிகர பாதுகாப்புப் படை எச்சரிக்கை விடுத்துள்ளது. இதனால் உலக நாடுகள் மத்தியில் மீண்டும் பதற்றம் அதிகரித்துள்ளது.

இதையும் படிங்க: ஈரான் மீதான தாக்குதலை ஒத்தி வைத்துள்ளேன்!!! முக்கிய பேச்சுவார்த்தைகள் காரணமாக ட்ரம்ப் முடிவு!