பலாத்கார வழக்கில் ட்ரம்பிற்கு ‘இடி’..!! சுப்ரீம் கோர்ட் கொடுத்த அதிர்ச்சி!!

அமெரிக்க உச்ச நீதிமன்றம், அதிபர் டொனால்ட் ட்ரம்ப் மீதான பாலியல் துன்புறுத்தல் மற்றும் அவதூறு வழக்கில் இரண்டாவது முறையாக அவருக்கு எதிரான முடிவை உறுதிப்படுத்தியுள்ளது. எழுத்தாளர் இ. ஜீன் கரோல் தொடர்ந்த வழக்கில் 2023-இல் வழங்கப்பட்ட ஐந்து மில்லியன் டாலர் நஷ்டஈட்டுத் தீர்ப்பை மறுஆய்வு செய்யக் கோரி ட்ரம்ப் தாக்கல் செய்த மனுவை நீதிபதிகள் நிராகரித்தனர். இதனால் அந்தத் தீர்ப்பு இனி எந்த நீதிமன்றத்திலும் சவால் செய்ய முடியாத இறுதி நிலையை அடைந்துள்ளது.

கரோல், 82 வயதான பிரபல பத்திரிகையாளர். 1996-இல் நியூயார்க் நகரின் பெர்க்டோர்ஃப் குட்மேன் துணிக்கடையின் ஆடை மாற்றும் அறையில் ட்ரம்ப் தன்னை பாலியல் ரீதியாகத் தாக்கியதாக அவர் குற்றம் சாட்டினார். 2019-இல் தனது புத்தகத்தில் இதை வெளிப்படுத்தியதும், ட்ரம்ப் அதை முழுமையாக மறுத்து, கரோலை பொய்யர் என்றும், புகழைக் கெடுக்கும் நோக்கத்தில் செயல்படுபவர் என்றும் பகிரங்கமாக விமர்சித்தார். 

இதையடுத்து கரோல் அவதூறு வழக்கு தொடர்ந்தார். 2023 மே மாதம் நியூயார்க் நடுவர் மன்றம், ட்ரம்ப் பாலியல் துன்புறுத்தலில் ஈடுபட்டதும் அவதூறு செய்ததும் உண்மை எனத் தீர்ப்பளித்து சுமார் ஐந்து மில்லியன் டாலர் நஷ்டஈடு வழங்க உத்தரவிட்டது. வட்டியுடன் சேர்த்து சுமார் 5.6 மில்லியன் டாலர் தொகையை ட்ரம்ப் தரப்பு செலுத்தியது. மேல்முறையீட்டு நீதிமன்றமும் இந்தத் தீர்ப்பை உறுதிப்படுத்திய பின்னர், உச்ச நீதிமன்றத்தை அணுகிய ட்ரம்ப், கடந்த ஜூன் மாதம் முதல் மனுவை நிராகரிக்கப்பட்டார். 

இதையும் படிங்க: “குண்டு மழை பொழியும்... சின்னாபின்னமாகிடுவீங்க...” - ஓமானுக்கு பகிரங்க எச்சரிக்கை விடுத்த டிரம்ப்...!

அதை மறுபரிசீலனை செய்யக் கோரி இரண்டாவது மனு தாக்கல் செய்யப்பட்டது. ஆகஸ்ட் 17 அன்று உச்ச நீதிமன்றம் எந்த விளக்கமும் இல்லாமல் அதைத் தள்ளுபடி செய்தது. கரோலின் வழக்கறிஞர் ரொபேர்ட்டா காப்லான், “இந்தத் தீர்ப்பு இனி எந்த நீதிமன்றத்திலும் சவால் செய்ய முடியாது” என அறிவித்தார். இதற்கிடையே, 2019-இல் அதிபராக இருந்தபோது கரோல் குறித்து பேசிய அவதூறு கருத்துக்களுக்காக தனியாகத் தொடரப்பட்ட வழக்கில் 83.3 மில்லியன் டாலர் நஷ்டஈடு வழங்க உத்தரவிடப்பட்டுள்ளது. 

அதிபர் பதவியின் சட்டப் பாதுகாப்பு உண்டு எனக் கூறி ட்ரம்ப் அதற்கும் உச்ச நீதிமன்றத்தில் மேல்முறையீடு செய்துள்ளார். அந்த மனுவின் விசாரணை குறித்து இன்னும் முடிவு எதுவும் அறிவிக்கப்படவில்லை. இந்த இரண்டு வழக்குகளும் சர்வதேச அளவில் ட்ரம்ப்க்கு பெரும் சட்டப் பின்னடைவாகப் பார்க்கப்படுகின்றன.
 

இதையும் படிங்க: ஈரான் அச்சுறுத்தலுக்கு மத்தியில் டிரம்பின் ரகசிய பயணம்.. ‘ஏர் ஃபோர்ஸ் ஒன்’ பின்னணி என்ன?