அமெரிக்காவில் சீன அதிபர் ஜி ஜின்பிங்..!! பிரம்மாண்ட வரவேற்புடன் தொடங்கிய உயர்மட்ட பயணம்!! அசத்திய டிரம்ப்!!

சீன அதிபர் ஜி ஜின்பிங் தனது மூன்று நாள் அரசுமுறை பயணத்திற்காக அமெரிக்காவுக்கு வந்துள்ளார். செப்டம்பர் 23 ஆம் தேதி மாலை, வாஷிங்டனுக்கு அருகே உள்ள ஜாயிண்ட் பேஸ் ஆண்ட்ரூஸ் விமானத் தளத்தில் அவரது விமானம் தரையிறங்கியது. அங்கு அமெரிக்க அதிபர் டொனால்டு டிரம்ப் நேரில் சென்று வரவேற்றார். 

இது 1962 ஆம் ஆண்டுக்குப் பிறகு ஒரு அமெரிக்க அதிபர் வெளிநாட்டுத் தலைவரை விமான நிலையத்தில் நேரடியாக வரவேற்ற முதல் நிகழ்வாகும். அப்போது ஜான் எஃப். கென்னடி பிரிட்டிஷ் பிரதமர் ஹரோல்டு மேக்மில்லனை அவ்வாறு வரவேற்றார். டிரம்ப் தனது மனைவி மெலானியாவுடன் சேர்ந்து விமானப் படிகளுக்கு அருகே காத்திருந்தார். ஜி ஜின்பிங் மற்றும் அவரது மனைவி பெங் லியுவான் விமானத்திலிருந்து இறங்கியதும் இரு தம்பதிகளும் கைகுலுக்கி வாழ்த்துகள் பரிமாறிக் கொண்டனர். 

சுமார் 100 அடி நீளமுள்ள சிவப்புக் கம்பளம் விரிக்கப்பட்டிருந்தது. 21 பேர் கொண்ட மரியாதை அணிவகுப்பு, பீரங்கி மரியாதை, அமெரிக்க மற்றும் சீனக் கொடிகளை ஏந்திய குழுக்கள், பல்வேறு ராணுவப் பிரிவுகளின் படைப்பிரிவுகள் ஆகியவை இடம்பெற்றன. அமெரிக்க விமானப்படை இசைக்குழு தேசிய கீதங்களை இசைத்தது. இரண்டு பி-1 குண்டுவீச்சு விமானங்கள் பறந்து மரியாதை செலுத்தின. ஓடுபாதையில் ஆறு எப்-22 போர் விமானங்களும் ஆறு எப்-16 விமானங்களும் அணிவகுத்து நிறுத்தப்பட்டிருந்தன. இது அமெரிக்க ராணுவப் பலத்தை வெளிப்படுத்தும் விதமாக அமைந்தது.

இதையும் படிங்க: வெள்ளத்தால் உருக்குலைந்த நேபாளம்..!! உதவிக்கரம் நீட்டிய அமெரிக்கா!! ரூ.310 கோடி நிதியுதவியாம்!!

கடந்த மே மாதம் டிரம்ப் சீனாவுக்குச் சென்றபோது அவருக்கு அளிக்கப்பட்ட பிரமாண்ட வரவேற்புக்கு ஈடாக இந்த உயர்மட்ட மரியாதை அமைந்துள்ளது. பொதுவாக வெளிநாட்டுத் தலைவர்களை வெள்ளை மாளிகையில் வரவேற்கும் வழக்கத்தை மாற்றி, விமானத் தளத்துக்கு நேரில் சென்றது அரிய நிகழ்வாகக் கருதப்படுகிறது. வரவேற்பு முடிந்ததும் ஜி ஜின்பிங் அங்கிருந்து புறப்பட்டார். டிரம்ப் ஹெலிகாப்டர் மூலம் வெள்ளை மாளிகைக்குத் திரும்பினார்.

இன்று வெள்ளை மாளிகையில் அதிகாரப்பூர்வ வரவேற்பு மற்றும் அணிவகுப்பு மரியாதை நடைபெறும். அதைத் தொடர்ந்து இரு தலைவர்களும் இருதரப்பு பேச்சுவார்த்தை நடத்துவார்கள். வர்த்தகம், இறக்குமதி வரிகள், தொழில்நுட்பம், செயற்கை நுண்ணறிவு, ராணுவ உறவுகள், தைவான் விவகாரம், ஈரான் போர் மற்றும் ரஷியா-உக்ரைன் போர் உள்ளிட்ட முக்கியப் பிரச்சினைகள் குறித்து ஆலோசனை நடைபெறும். வர்த்தகப் போர்நிறுத்தம் ஜனவரி 10 வரை நீட்டிக்கப்பட்டுள்ளதாக அமெரிக்க கருவூலச் செயலர் அறிவித்துள்ளார். 

இரவு விருந்தில் எலான் மஸ்க் உள்ளிட்ட தொழில் அதிபர்கள் கலந்துகொள்வார்கள்.நாளை ஜி ஜின்பிங் மற்றும் பெங் லியுவான் வெள்ளை மாளிகையில் டிரம்ப் குடும்பத்தினருடன் தனிப்பட்ட தேநீர் விருந்தில் பங்கேற்கின்றனர்.

பின்னர் தேசிய ஆவணக் காப்பகத்தைப் பார்வையிடுவார்கள். வரவேற்பு நிகழ்ச்சியில் ஜி ஜின்பிங் அளித்த செய்தியில், “சீனாவும் அமெரிக்காவும் சிறந்த நாடுகள். இரு நாட்டு மக்களும் சிறந்தவர்கள். போட்டியாளர்களாக அல்லாமல் கூட்டாளிகளாக இருக்க வேண்டும். புதிய சகாப்தத்தில் இரு நாடுகளும் இணைந்து செயல்படும் வழியைக் கண்டறிய வேண்டும்” என்று குறிப்பிட்டார். 

வரி விதிப்பு உள்ளிட்ட கருத்து வேறுபாடுகள் இருந்தாலும், இரு வல்லரசுத் தலைவர்களின் இந்த சந்திப்பு உலக அரசியலில் முக்கியத்துவம் வாய்ந்ததாகப் பார்க்கப்படுகிறது.
 

இதையும் படிங்க: எச்-1பி விசா கட்டண உயர்வு தொடரும்.. மேலும் ஓராண்டுக்கு நீட்டித்த அமெரிக்கா..!! டிரம்ப் அதிரடி!!