ஜெய்சங்கர்–ஜெலன்ஸ்கி சந்திப்பில் என்ன பேசப்பட்டது? உக்ரைன் அதிபர் வெளியிட்ட தகவல்!

கீவ்: ரஷ்யா–உக்ரைன் இடையேயான போரை முடிவுக்கு கொண்டு வந்து அமைதியை ஏற்படுத்துவதில் இந்தியா கொண்டுள்ள உறுதிப்பாட்டுக்கு நன்றி தெரிவிப்பதாக உக்ரைன் அதிபர் வோலோடிமிர் ஜெலன்ஸ்கி தெரிவித்துள்ளார். இந்திய வெளியுறவுத்துறை அமைச்சர் எஸ். ஜெய்சங்கரை சந்தித்த பின்னர் அவர் வெளியிட்ட பதிவில், இரு நாடுகளுக்கு இடையேயான முக்கிய விவகாரங்கள் குறித்து பேசியதாக குறிப்பிட்டுள்ளார்.

ஜெலன்ஸ்கி தனது பதிவில், உக்ரைனுக்கு எதிரான போரை முடிவுக்கு கொண்டு வருவதற்கு இந்தியா வெளிப்படுத்தி வரும் நிலைப்பாட்டை வரவேற்றுள்ளார். இது போருக்கான நேரம் அல்ல என்றும், அமைதியே தற்போது மிகவும் அவசியம் என்றும் அவர் குறிப்பிட்டுள்ளார். அமைதிக்கான இந்தியாவின் நிலைப்பாடு தெளிவாக இருப்பதாகவும் அவர் தெரிவித்துள்ளார்.

இதற்கிடையே, ஜெய்சங்கர் கீவ் நகரில் இருந்தபோதும் ரஷ்யா ட்ரோன் தாக்குதலை நடத்தியதாக ஜெலன்ஸ்கி கூறியுள்ளார். தாக்குதலின்போது ஏவப்பட்ட ட்ரோன்களில் பெரும்பாலானவற்றை உக்ரைன் விமானப்படை சுட்டு வீழ்த்தியதாகவும் அவர் தெரிவித்துள்ளார். ட்ரோன்கள் தொடர்பாக ஈரானின் உதவி இருப்பதாகவும் தனது பதிவில் ஜெலன்ஸ்கி குறிப்பிட்டுள்ளார்.

இதையும் படிங்க: இந்தியாவின் உரப் பிரச்னையை தீர்ப்போம்! பிரதமர் மோடிக்கு ரஷ்ய அதிபர் புடின் கொடுத்த முக்கிய உறுதி!

ரஷ்யா–உக்ரைன் போரை முடிவுக்கு கொண்டு வர உலகின் பிற முக்கிய நாடுகளும் தெளிவான நிலைப்பாட்டை எடுக்க வேண்டும் என உக்ரைன் அதிபர் வலியுறுத்தியுள்ளார். பேச்சுவார்த்தை மற்றும் அமைதிக்கான முயற்சிகள் தொடர்ந்து முன்னெடுக்கப்பட வேண்டும் என்பதே உக்ரைனின் எதிர்பார்ப்பாக இருப்பதாக அவரது கருத்துகள் வெளிப்படுத்துகின்றன.

ஜெய்சங்கர் உடனான சந்திப்பில் கருங்கடல் பகுதியில் நிலவும் சூழ்நிலை குறித்தும் விவாதிக்கப்பட்டதாக ஜெலன்ஸ்கி தெரிவித்துள்ளார். குறிப்பாக, அப்பகுதியில் சிவில் கப்பல் போக்குவரத்துக்கு ஏற்படும் அச்சுறுத்தல்கள் குறித்தும் ஆலோசிக்கப்பட்டதாக கூறியுள்ளார்.

உணவுப் பொருட்களை கடல் வழியாக கொண்டு செல்வது பல நாடுகளுக்கும் மக்களுக்கும் முக்கியமானதாக இருப்பதாக அவர் குறிப்பிட்டுள்ளார். துறைமுகங்கள் மற்றும் உணவு விநியோகத்தை பாதிக்கும் நடவடிக்கைகள் உலகளாவிய அளவில் பாதிப்புகளை ஏற்படுத்தும் என்றும் எச்சரித்துள்ளார்.

இதனால், கருங்கடல் பகுதியில் பாதுகாப்பான கப்பல் போக்குவரத்தை உறுதி செய்வது தொடர்பாக சர்வதேச நாடுகள் ஒன்றிணைந்து செயல்பட வேண்டும் என ஜெலன்ஸ்கி வலியுறுத்தியுள்ளார். ஜெய்சங்கர்–ஜெலன்ஸ்கி சந்திப்பு, ரஷ்யா–உக்ரைன் போர் சூழலில் இந்தியாவின் பங்கு மீண்டும் சர்வதேச கவனத்தை பெற்றுள்ள நிலையில் முக்கியத்துவம் பெற்றுள்ளது.

இதையும் படிங்க: நேபாளத்தை புரட்டிப்போட்ட பெருவெள்ளம்: ரூ.24,250 கோடி இழப்பு! காத்திருக்கும் மிகப்பெரிய சவால்!