வணிகர்களுக்கு நிம்மதி..! ஜிஎஸ்டி கைது நடவடிக்கைகளுக்கு கட்டுப்பாடு விதித்து நிர்மலா சீதாராமன் அறிவிப்பு!

மத்திய நிதியமைச்சர் நிர்மலா சீதாராமன் தலைமையில் டெல்லியில் இன்று நடைபெற்ற 57-வது ஜிஎஸ்டி கவுன்சில் கூட்டத்தில், வணிகர்கள் மற்றும் வரி செலுத்துவோர் நலனைக் கருத்தில் கொண்டு பல்வேறு முக்கிய மற்றும் வரலாற்றுச் சிறப்புமிக்க முடிவுகள் எடுக்கப்பட்டுள்ளன.

குறிப்பாக, வணிகர்களை அச்சுறுத்தும் வகையில் இருந்த வரி அதிகாரிகளின் கைது நடவடிக்கைகளுக்குக் கட்டுப்பாடுகள் விதிக்கப்பட்டுள்ளதுடன், குற்றவியல் வழக்கு தொடர்வதற்கான குறைந்தபட்ச வரி ஏய்ப்பு வரம்பு ரூ.1 கோடியிலிருந்து ரூ.5 கோடியாக உயர்த்தப்பட்டுள்ளது.

வரி ஏய்ப்பு விவகாரங்களில் அதிகாரிகளுக்கு வழங்கப்பட்டிருந்த உடனடி கைது நடவடிக்கைக் குறைக்கப்பட்டுள்ளது. கைது செய்வதற்குப் பதிலாக வரி, வட்டி மற்றும் உரிய அபராதங்களை வசூலிக்கும் சிவில் நடைமுறைகள் மூலம் தீர்வுகாண முன்னுரிமை வழங்கப்படும். அதிக அளவிலான நிதி மோசடிகளுக்கு மட்டுமே கடுமையான சட்ட நடவடிக்கைகள் தொடரும்.

இதையும் படிங்க: வியாபாரிகளுக்கு குட் நியூஸ் வருமா? இன்று கூடுகிறது 57வது ஜிஎஸ்டி கவுன்சில்..!!

ஏற்றுமதியாளர்கள் மற்றும் வர்த்தகர்களின் பணப்புழக்கத்தை அதிகரிக்கும் வகையில், ரீஃபண்ட் கோரிக்கைகளை ஏற்பதற்கான கால அவகாசம் 15 நாட்களில் இருந்து 10 நாட்களாகக் குறைக்கப்பட்டுள்ளது. மேலும், இடர் மதிப்பீட்டின் அடிப்படையில் கோரப்படும் ரீஃபண்ட் தொகையில் 90% தொகை தானியங்கி முறையில் 3 வேலை நாட்களுக்குள் விடுவிக்கப்படும்.

நிறுவனங்கள் தங்களது ஊழியர்களுக்காகச் செலுத்தும் ஆயுள் மற்றும் மருத்துவக் காப்பீட்டுத் தொகையின் ஜிஎஸ்டிக்கு உள்ளீட்டு வரி விலக்கு (ITC) பெற அனுமதி அளிக்கப்பட்டுள்ளது. பதிவு செய்யப்படாத டெலிவரி சேவை நிறுவனங்களுக்கான ஜிஎஸ்டி வரி 18 சதவீதத்தில் இருந்து 5 சதவீதமாகக் குறைக்கப்பட்டுள்ளது.

தேவையற்ற சிறிய நோட்டீஸ்கள் அனுப்பப்படுவதைத் தவிர்க்கும் வகையில், ரூ.10,000-க்குக் குறைவான தொகைகளுக்கான நோட்டீஸ்களுக்கு வரம்பு நிர்ணயிக்கப்பட்டுள்ளது. மத்திய நிதி அமைச்சகத்தின் இந்த நடைமுறைச் சீர்திருத்தங்கள் அனைத்தும் வரும் 2027 ஏப்ரல் 1 முதல் முழுமையாக அமலுக்கு வரவுள்ளதாகத் தெரிவிக்கப்பட்டுள்ளது.

இதையும் படிங்க: வணிகர்களுக்கு செம ஜாக்பாட்! GST 2.0-வில் வரப்போகும் முக்கிய மாற்றம்! தளர்கிறதா கட்டுப்பாடுகள்?