அதிகாலை பற்றி எரிந்த வீடு! உடல்கருகி 7 பேர் பலி!! ம.பி அடுக்குமாடி குடியிருப்பில் அரங்கேறிய சோகம்!
மத்திய பிரதேசத்தில் அடுக்குமாடி குடியிருப்பில் ஒரு வீட்டில் தீ பற்றியதில் 7 பேர் உடல் கருகி உயிரிழந்தனர்.
by
இந்தூர்: மத்திய பிரதேசத்தின் இந்தூர் நகரில் உள்ள பிரிஜேஸ்வரி அனெக்ஸ் குடியிருப்புப் பகுதியில் இன்று (மார்ச் 18) அதிகாலை ஏற்பட்ட கொடிய தீ விபத்தில் 7 பேர் உடல் கருகி உயிரிழந்துள்ளனர். இந்த சம்பவம் அப்பகுதி மக்களை அதிர்ச்சிக்குள்ளாக்கியுள்ளது.
அதிகாலை 3.30 மணியளவில் பிரிஜேஸ்வரி அனெக்ஸ் காலனியில் உள்ள ஒரு வீட்டில் திடீரென தீ பற்றியது. தீ மிக வேகமாக பரவி முழு குடியிருப்பையும் சூழ்ந்தது. வீட்டின் உரிமையாளர் மனோஜ் புகாலியா என்பவர் போலிமர் வியாபாரம் செய்து வந்ததால், வீட்டில் எரியக்கூடிய இரசாயனப் பொருட்களும் இருந்ததாக தகவல்கள் தெரிவிக்கின்றன.
தீ பரவியதும், வீட்டில் தங்கியிருந்தவர்கள் தப்ப முடியாமல் சிக்கிக் கொண்டனர். தகவல் அறிந்ததும் தீயணைப்புத் துறையினரும், போலீசாரும் உடனடியாக சம்பவ இடத்திற்கு விரைந்தனர். நீண்ட நேரம் போராடிய பின்னரே தீயை முழுமையாக கட்டுப்படுத்த முடிந்தது.
இதையும் படிங்க: அமெரிக்கா உடன் பேச்சுவார்த்தையா? நெவர்! இறுமாப்பு காட்டும் ஈரான்! நீடிக்கும் போர் பதற்றம்!
மீட்புப் பணிகளில் 7 பேரின் உடல்கள் மீட்கப்பட்டன. அவர்களின் உடல்கள் முழுவதும் கருகிய நிலையில் இருந்ததால், அடையாளம் காணும் பணி தற்போது நடைபெற்று வருகிறது. மேலும் 3 பேர் உயிருடன் மீட்கப்பட்டு சிகிச்சைக்காக மருத்துவமனையில் அனுமதிக்கப்பட்டுள்ளனர்.
விசாரணையில் தெரிய வந்த அதிர்ச்சி தகவல்: வீட்டின் வெளியே நிறுத்தப்பட்டிருந்த எலக்ட்ரிக் வாகனம் (EV) சார்ஜ் செய்யப்பட்டுக் கொண்டிருந்தபோது, சார்ஜிங் பாயிண்டில் ஏற்பட்ட குறுகிய சுற்று (short circuit) காரணமாக தீ உருவானது. இதனால் வீட்டுக்குள் வைக்கப்பட்டிருந்த 10க்கும் மேற்பட்ட காஸ் சிலிண்டர்கள் வெடித்து சிதறின. இந்த வெடிப்புகளே தீயை மேலும் தீவிரமாக்கி, பலி எண்ணிக்கை அதிகரிக்க காரணமாக அமைந்தது என போலீசார் தெரிவித்துள்ளனர்.
இந்த விபத்து காரணமாக அப்பகுதியில் பெரும் பதற்றம் நிலவுகிறது. குடியிருப்பு மக்கள் பலரும் தங்கள் வீடுகளை விட்டு வெளியேறி பாதுகாப்பாக இருக்கின்றனர். தீயணைப்பு அதிகாரிகள் தீ பரவியதற்கான முழு காரணத்தை ஆராய்ந்து வருகின்றனர். மேலும், இதுபோன்ற விபத்துகளை தவிர்க்க எலக்ட்ரிக் வாகன சார்ஜிங் மற்றும் காஸ் சிலிண்டர் பாதுகாப்பு விதிகளை கடுமையாக பின்பற்ற வேண்டும் என பொதுமக்களுக்கு அறிவுறுத்தப்பட்டுள்ளது.
இதையும் படிங்க: பாக்., ஆப்கான் மோதல் உச்சக்கட்டம்! பரஸ்பர தாக்குதலால் நீடிக்கும் பதற்றம்!
