ரூ.8,000 கோடிக்கு ஹெலிகாப்டர் பராமரிப்பு ஒப்பந்தம்!! அமெரிக்காவுடன் இந்தியா செம டீல்!
நம் கடற்படையில் இயங்கும் அமெரிக்க தயாரிப்பான, 'எம்.எச்., 60ஆர்' கண்காணிப்பு ஹெலிகாப்டர்களை அடுத்த ஐந்து ஆண்டுகளுக்கு பராமரிப்பதற்காக அந்நாட்டுடன் நம் ராணுவ அமைச்சகம், 7,995 கோடி ரூபாய்க்கு ஒப்பந்தம் செய்துள்ளது.
by
புது டெல்லி: இந்தியக் கடற்படையின் கண்களாகவும் காதுகளாகவும் செயல்படும் அமெரிக்க தயாரிப்பு MH-60R ‘ரோமியோ’ ஹெலிகாப்டர்களை அடுத்த ஐந்து ஆண்டுகளுக்கு இந்தியாவிலேயே முழுமையாகப் பராமரிக்கும் வகையில் ரூ.7,995 கோடி மதிப்பிலான மாபெரும் ஒப்பந்தம் அமெரிக்காவுடன் கையெழுத்தாகியுள்ளது.
இதுவரை வெளிநாட்டு ஆயுதங்களை வாங்கிவிட்டு, பராமரிப்புக்காக அமெரிக்காவை நம்பியிருந்த நிலை மாறுகிறது; இனி எல்லாமும் நம் நாட்டுக்குள் நடக்கும் என்று ராணுவ அமைச்சகம் பெருமிதம் தெரிவித்துள்ளது.
உலகின் அதி நவீன கடல் ரோந்து ஹெலிகாப்டர்களில் ஒன்றான MH-60R ரோமியோவை அமெரிக்காவின் லாக்ஹீட் மார்ட்டின் நிறுவனம் தயாரிக்கிறது. மழையிலும், புயலிலும், நள்ளிரவிலும் பறக்கக் கூடிய இந்த ஹெலிகாப்டர் எதிரி நீர்மூழ்கிக் கப்பல்களை நூற்றுக்கணக்கான கிலோமீட்டர் தொலைவில் கண்டறிந்து டார்பிடோவால் தாக்கும், கடற்கொள்ளையர்களை விரட்டும், கப்பல் மீது ஏவுகணை தாக்கினால் உடனடியாக மீட்புப் பணியில் இறங்கும்.
இதையும் படிங்க: ட்ரம்ப் மிரட்டலுக்கு பணிந்தது ரிலையன்ஸ்..!! ரஷ்யா கச்சா எண்ணெய் இறக்குமதி நிறுத்தம்.. அமெரிக்கா வரவேற்பு..!!!
இந்தியக் கடற்படைக்கு 2020-ல் 24 ரோமியோக்களை வழங்க ஒப்பந்தம் போட்டோம். 2021 முதல் கொச்சி, மும்பை, விசாகப்பட்டினம் தளங்களில் இவை பறக்கத் தொடங்கின. இப்போது அவற்றை 2030 வரை பராமரிக்கும் பொறுப்பை இந்தியாவே ஏற்றுள்ளது.
இந்த ஒப்பந்தத்தில் என்னென்ன இருக்கிறது என்பதை ராணுவ அமைச்சகம் விளக்கமாகச் சொல்கிறது. உதிரிபாகங்களை உடனுக்குடன் வழங்குவது, இந்திய வீர்களுக்கே பயிற்சி அளிப்பது, பெரிய அளவிலான பழுதுபார்க்கும் மையங்களை (MRO) நம் நாட்டிலேயே அமைப்பது, தொழில்நுட்ப ரகசியங்களைப் பகிர்ந்து கொள்வது என எல்லாம் இதில் அடங்கும். அதாவது, இனி ஒரு ஸ்க்ரூ கூட அமெரிக்காவுக்கு அனுப்ப வேண்டிய அவசியமில்லை; எல்லாம் இந்திய மண்ணிலேயே நடக்கும்.
இதன் மிகப் பெரிய பலன் என்னவென்றால், அமெரிக்காவை முழுக்க முழுக்க சார்ந்திருக்க வேண்டிய நிலை படிப்படியாகக் குறையும். அதோடு நடுத்தர, சிறிய இந்திய நிறுவனங்கள் இந்தப் பராமரிப்புப் பணியில் பங்கேற்று பல்லாயிரம் கோடி வருமானமும், லட்சக்கணக்கான வேலைவாய்ப்பும் பெறும். “மேக் இன் இந்தியா” என்று சொல்வதோடு நிறுத்தாமல், “சர்வீஸ் இன் இந்தியா” என்ற புதிய அத்தியாயத்தை இந்த ஒப்பந்தம் தொடங்கி வைத்துள்ளது.
சீன கடற்படையின் ஆக்ரமிப்பு நடவடிக்கைகள் நாளுக்கு நாள் அதிகரித்து வரும் நிலையில், இந்த ரோமியோ ஹெலிகாப்டர்கள் இந்தியப் பெருங்கடலில் நமது மிகப் பெரிய கண்களாகச் செயல்படுகின்றன. இவற்றை இந்தியாவிலேயே பராமரிப்பதால், எப்போது வேண்டுமானாலும் 100 சதவீதம் தயார் நிலையில் வைத்திருக்க முடியும். இது இந்தியக் கடற்படையின் போர் திறனை பல மடங்கு உயர்த்தும் என்று ராணுவ வல்லுநர்கள் கருதுகின்றனர்.
ஒரே வாரத்தில் இரண்டு பெரிய பாதுகாப்பு ஒப்பந்தங்களை இந்தியா முடித்திருப்பது குறிப்பிடத்தக்கது. இதற்கு முன் 26 MRASAM ஏவுகணை அமைப்புகளையும் இந்தியாவிலேயே தயாரிக்கும் ஒப்பந்தம் போடப்பட்டது. இப்போது ரோமியோ பராமரிப்பு ஒப்பந்தம். இந்தியா வெறும் ஆயுதம் வாங்கும் நாடு அல்ல, ஆயுதங்களை உருவாக்கி பராமரிக்கும் சக்தியாகவும் மாறிக் கொண்டிருக்கிறது என்பதற்கு இவை மிகப் பெரிய சான்றுகள்.
இதையும் படிங்க: பாக்., வாலை ஒட்ட நறுக்க..!! இந்தியாவுக்கு அமெரிக்கா தரும் 2 அஸ்திரம்!! களமிறங்கும் அசூரன்கள்!
