ஓபிஎஸ், சசிகலா NO! டிடிவிக்கு மறுப்பு சொல்லாத இபிஎஸ்? முக்குலத்தோர் வாக்குக்காக சைலண்ட் மோடில் எடப்பாடி!

சென்னை: 2026 சட்டமன்றத் தேர்தலை முன்னிட்டு அதிமுக கூட்டணியில் டிடிவி தினகரனின் அமமுக கட்சி சேர்க்கப்படலாம் என்ற யூகங்கள் வலுத்து வருகின்றன. அதிமுக பொதுச் செயலாளர் எடப்பாடி பழனிசாமி இதுகுறித்த கேள்விக்கு எந்தவித மறுப்பும் தெரிவிக்காதது, அவரது ஒப்புதலை சூசகமாக காட்டுவதாக அரசியல் வட்டாரங்கள் பார்க்கின்றன. இதற்கு பின்னணியில் இரு முக்கிய காரணங்கள் இருப்பதாக கூறப்படுகிறது.

ஜூலை மாதம் எடப்பாடி பழனிசாமி "மக்களை காப்போம், தமிழகத்தை மீட்போம்" என்ற பெயரில் சுற்றுப்பயணம் மேற்கொண்டிருந்தார். அப்போது ஒரு தனியார் தொலைக்காட்சிக்கு அளித்த பேட்டியில், ஓ.பி.எஸ். மற்றும் அவரது ஆதரவாளர்கள் காலில் விழுந்து மன்னிப்பு கேட்டாலும் அதிமுகவில் சேர்த்துக்கொள்ள மாட்டோம் என்று கூறினார். அதற்கான காலம் கடந்துவிட்டது என்று அவர் திட்டவட்டமாக தெரிவித்தார். ஆனால் டிடிவி தினகரன் கூட்டணியில் சேர்வாரா என்ற கேள்விக்கு, காலம் தான் பதில் சொல்லும் என்று பதிலளித்தார்.

சமீபத்தில் டெல்லியில் உள்துறை அமைச்சர் அமித் ஷாவை சந்தித்து திரும்பிய பிறகு இதே கேள்வி எழுப்பப்பட்டது. அப்போது ஓ.பி.எஸ். மற்றும் சசிகலாவுக்கான கதவுகள் மூடப்பட்டுவிட்டன என்று கூறினார். ஆனால் டிடிவி தினகரன் பற்றி கேட்டபோது, கூட்டணிக்காக அரசியல் கட்சிகளுடன் பேச்சுவார்த்தை நடத்தி வருகிறோம் என்று பதிலளித்தார். இதன் மூலம் என்டிஏ கூட்டணியில் அமமுகவை சேர்க்க அவர் சம்மதம் தெரிவித்திருப்பதாக பார்க்கப்படுகிறது.

இதையும் படிங்க: ராஜ்யசபா எம்.பி., தேர்தல்!! சட்டசபை தேர்தலுக்கு முன்னாடி இத பேசி முடிங்க!! பதவிகளை பங்கு போட காத்திருக்கும் கட்சிகள்!

இதற்கு பின்னணியில் இரு முக்கிய காரணங்கள் உள்ளன. முதலாவது, டிடிவி தினகரன் அதிமுக கூட்டணியில் சேராவிட்டால், அவர் நடிகர் விஜய்யின் தவெக கட்சியுடன் இணைந்து விடுவார் என்ற அச்சம். விஜய்யுடன் டிடிவி தினகரன் மற்றும் ஓ.பி.எஸ். இணைந்தால், தென் மாவட்டங்களில் அதிமுகவுக்கு பெரும் பின்னடைவு ஏற்படும் என்று கருதப்படுகிறது. ஏற்கனவே கடந்த லோக்சபா தேர்தலில் முக்குலத்தோர் சமூக வாக்குகள் அதிமுகவுக்கு கிடைக்கவில்லை.

இரண்டாவது காரணம், அமமுக கூட்டணியில் இருந்தால் தென் மாவட்டங்களில் வாக்குகள் அதிகரிக்கும். 2021 சட்டமன்றத் தேர்தலில் அமமுக 2.35 சதவீத வாக்குகள் மட்டுமே பெற்றாலும், 20 தொகுதிகளில் அதிமுகவின் வெற்றியை தடுத்தது. 24 தொகுதிகளில் அமமுக மூன்றாவது இடம் பிடித்தது. இதனால் எடப்பாடி பழனிசாமி எந்த ரிஸ்கும் எடுக்க விரும்பவில்லை என்று கூறப்படுகிறது.

விஜய்யுடன் கூட்டணி அமையாது என்பது உறுதியானதால், என்டிஏ கூட்டணியில் (பாஜக உட்பட) அமமுகவை சேர்க்க எடப்பாடி முடிவு செய்துள்ளதாக தெரிகிறது. இதை டிடிவி தினகரனும் உறுதிப்படுத்தும் வகையில், "தேர்தலில் எதிரி, துரோகி என்று பார்க்கத் தேவையில்லை" என்று கூறியுள்ளார்.

ஆனால் இதே டிடிவி தினகரன் இத்தனை நாட்களாக எடப்பாடியை துரோகி என்று விமர்சித்து வந்தார். இப்போது அவரது தலைமையின் கீழ் எப்படி இணைவார் என்ற கேள்வி எழுந்துள்ளது. இணைந்தாலும் அதிமுகவினர் அமமுகவுக்கு ஆதரவு தருவார்களா என்ற சந்தேகமும் உள்ளது. இந்த விவகாரம் 2026 தேர்தலில் அதிமுகவின் வியூகத்தை பெரிதும் பாதிக்கும் என்று அரசியல் நோக்கர்கள் கருதுகின்றனர்.

இதையும் படிங்க: சின்ன சங்கடம் கூட வரக்கூடாது!! அதிமுக - பாஜ தொகுதி பங்கீடு!! அமித்ஷா வகுக்கும் வியூகம்!