8 கோடி பேருக்கு வேலை..! பைக் டாக்சியை அனுமதிக்கணும்.. நிதின் கட்கரி வேண்டுகோள்..!!
பைக் டாக்ஸியை அனுமதிக்க வேண்டும் என்று நிதின் கட்கரி வலியுறுத்தினார்.
by
மத்திய சாலைப் போக்குவரத்து மற்றும் நெடுஞ்சாலைத் துறை அமைச்சர் நிதின் கட்கரி, நாடு முழுவதும் பைக் டாக்சி சேவைகளை அனுமதிக்க அனைத்து மாநில அரசுகளையும் வலியுறுத்தியுள்ளார். இதன் மூலம் சுமார் எட்டு கோடி பேருக்கு வேலைவாய்ப்பு கிடைக்கும் என்றும் அவர் தெரிவித்துள்ளார். குறிப்பாக கிராமப்புறங்களில் உள்ள இளைஞர்களுக்கு இது ஒரு முக்கியமான வருமான ஆதாரமாக அமையும் என அவர் சுட்டிக்காட்டியுள்ளார்.
போக்குவரத்து என்பது மாநிலப் பட்டியலின் கீழ் வருவதால், மத்திய அரசு இந்த சேவைக்கு அனுமதி அளித்திருந்தாலும் சில மாநிலங்கள் இன்னும் அதனை செயல்படுத்தவில்லை. தனியார் இருசக்கர வாகனங்களைப் பயன்படுத்தி பயணிகளை ஏற்றிச் செல்லும் இந்த முறைக்கு மத்திய அரசு வழிவகுத்துள்ள நிலையில், மாநிலங்களின் ஒப்புதல் இல்லாமல் அது முழுமையாக அமலுக்கு வர முடியாது. இதனால் பலர் இழந்த வருமான வாய்ப்பை மீண்டும் பெற முடியவில்லை என கட்கரி கவலை தெரிவித்துள்ளார்.இந்த சேவை அனுமதிக்கப்பட்டால், தங்களிடம் உள்ள இருசக்கர வாகனங்களைப் பயன்படுத்தி பலர் சுயதொழில் செய்ய முடியும்.
குறிப்பாக வேலைவாய்ப்பு குறைவாக உள்ள கிராமப்புறப் பகுதிகளில் இது பெரும் மாற்றத்தை ஏற்படுத்தும். நகரங்களில் உள்ள நெரிசலைக் குறைப்பதற்கும், குறைந்த செலவில் பயண வசதியை அளிப்பதற்கும் பைக் டாக்சிகள் உதவும். ஏற்கனவே சில மாநிலங்களில் இந்த சேவை இயங்கி வருகிறது. அங்கு பல இளைஞர்கள் மாதம் இருபத்தைந்தாயிரம் ரூபாய் வரை சம்பாதிக்கிறார்கள் என்ற தகவல்களும் உள்ளன.கட்கரி இந்த கருத்தை ‘சுரக்ஷா’ என்ற பைலட் திட்டத்தை தொடங்கி வைத்த போது வெளிப்படுத்தினார். இந்தத் திட்டம் நெடுஞ்சாலைகள் மற்றும் சுரங்கப் பகுதிகளில் பணிபுரியும் ஓட்டுநர்கள் மற்றும் தொழிலாளர்களுக்கு இலவச மருத்துவ பரிசோதனை மற்றும் ஆலோசனை அளிக்கும் நோக்கில் அமைந்துள்ளது.
இதையும் படிங்க: கொட்டிக் கொடுத்தும் பத்தலையா?... டாஸ்மாக் கடைகளில் 10 ரூபாய் வசூல் வேட்டை படுஜோரு... அமைச்சர் விக்னேஷுக்கு புது தலைவலி...!
மகாராஷ்டிராவின் நாக்பூர்-காம்ப்டி மற்றும் சந்திரபூர் பகுதிகளில் முதற்கட்டமாக இது செயல்படுத்தப்படும்.பைக் டாக்சி சேவைக்கு அனுமதி அளிப்பதுடன் சாலைப் பாதுகாப்பை மேம்படுத்தும் நடவடிக்கைகளையும் அமைச்சர் வலியுறுத்தியுள்ளார். மோட்டார் வாகனச் சட்டத்தில் திருத்தம் கொண்டு வந்து, போக்குவரத்து விதிகளை மீறும் ஓட்டுநர்களுக்கு எதிர்மறை புள்ளி முறையை அறிமுகப்படுத்தும் திட்டம் உள்ளது. தொடர்ந்து விதிமீறல்கள் செய்பவர்களின் உரிமம் தற்காலிகமாக நிறுத்தப்படும் அல்லது ரத்து செய்யப்படும். இதன் மூலம் பொறுப்பான ஓட்டுநர் நடத்தை ஊக்குவிக்கப்படும் என அவர் நம்பிக்கை தெரிவித்துள்ளார்.
