தேமுதிக விஜயபிரபாகரன் தொடர்ந்த தேர்தல் வழக்கு.. எம்பி மாணிக்கம் தாகூர் மனுவை தள்ளுபடி செய்தது உயர்நீதிமன்றம்!

விருதுநகர் நாடாளுமன்றத் தொகுதியில் காங்கிரஸ் கட்சியின் சார்பில் போட்டியிட்டு வெற்றி பெற்ற எம்பி மாணிக்கம் தாகூர், தனக்கு எதிராகத் தொடரப்பட்டுள்ள தேர்தல் வழக்கை நிராகரிக்கக் கோரி தாக்கல் செய்திருந்த இடைக்கால மனுவைச் சென்னை உயர்நீதிமன்றம் தற்பொழுது அதிரடியாகத் தள்ளுபடி செய்து உத்தரவிட்டுள்ளது."

கடந்த நாடாளுமன்றப் பொதுத்தேர்தலில் விருதுநகர் தொகுதியில் காங்கிரஸ் வேட்பாளர் மாணிக்கம் தாகூருக்கும், தேசிய முற்போக்கு திராவிட கழகத்தின் (தேமுதிக) வேட்பாளரும் மறைந்த கேப்டன் விஜயகாந்தின் மகனுமான விஜயபிரபாகரனுக்கும் இடையே மிகக் கடுமையான வாக்குச் சமர் நடைபெற்றது. இதில் மிகக் குறைந்த வாக்குகள் வித்தியாசத்தில் மாணிக்கம் தாகூர் வெற்றி பெற்றதாக அறிவிக்கப்பட்டது. இதனை எதிர்த்தும், தேர்தல் வாக்கு எண்ணிக்கையில் பல்வேறு முறைகேடுகள் நடந்துள்ளதாகவும் கூறி தேமுதிக வேட்பாளர் விஜயபிரபாகரன் சென்னை உயர்நீதிமன்றத்தில் தேர்தல் வழக்கு (Election Petition) ஒன்றைத் தாக்கல் செய்திருந்தார்.

இந்தச் சூழலில், விஜயபிரபாகரன் தன் மீது வைத்துள்ள குற்றச்சாட்டுகள் அனைத்தும் அடிப்படை ஆதாரமற்றவை என்றும், எனவே அந்தத் தேர்தல் வழக்கை ஆரம்பக்கட்டத்திலேயே நிராகரிக்க வேண்டும் என்றும், வழக்கில் கூறப்பட்டுள்ள சில குறிப்பிட்ட குற்றச்சாட்டுகளைத் தீர்ப்பில் இருந்து முழுமையாக நீக்க வேண்டும் என்றும் வலியுறுத்திக் காங்கிரஸ் எம்பி மாணிக்கம் தாகூர் தரப்பில் சென்னை உயர்நீதிமன்றத்தில் மனுக்கள் தாக்கல் செய்யப்பட்டன. இந்த மனு இன்று உயர்நீதிமன்ற நீதிபதி என்.சதீஷ்குமார் அவர்கள் முன்னிலையில் விரிவான விசாரணைக்கு வந்தது.

இதையும் படிங்க: வாக்குறுதியை நிறைவேற்றுங்க... சட்டம் ஒழுங்கை சீராக்குங்க! தேமுதிக கூட்டத்தில் நிறைவேற்றப்பட்ட அதிரடி தீர்மானங்கள்!

இருதரப்பு வாதங்களையும் கேட்ட நீதிபதி, மாணிக்கம் தாகூர் தாக்கல் செய்த மனுக்களை முழுமையாகத் தள்ளுபடி செய்ததோடு, அவர் இந்தத் தேர்தல் வழக்கை சட்டப்படி நீதிமன்றத்தில் எதிர்கொண்டுதான் தீர வேண்டும் என்று ஆணித்தரமாக உத்தரவிட்டார். மேலும், இந்த முக்கியத் தேர்தல் வழக்கின் அடுத்தகட்ட விசாரணையை வரும் ஜூலை 9-ஆம் தேதிக்கு ஒத்திவைத்து நீதிபதி என்.சதீஷ்குமார் அதிரடி உத்தரவு பிறப்பித்துள்ளார். உயர்நீதிமன்றத்தின் இந்த அதிரடி நடவடிக்கையால் விருதுநகர் தேர்தல் களம் தற்பொழுது மீண்டும் சூடுபிடித்துள்ளது.

இதையும் படிங்க: அருணை பதவியில் தொடரச் செய்வது நீதிமன்ற அவமதிப்பு - சென்னை உயர்நீதிமன்ற வளாகத்தில் சவுக்கு சங்கர் அதிரடி!