பிரதமர் மோடி மன்னிப்பு கேட்க வேண்டும்..! மாணவர்களை வஞ்சிக்கும் பாஜக அரசு... ராகுல் காந்தி காட்டம்..!!

டெல்லியில் போராட்டத்தில் ஈடுபட்ட ஆயிரக்கணக்கான மாணவர்கள் மீது போலீஸார் நடத்திய கொடூர தடியடி மற்றும் தாக்குதலுக்கு பிரதமர் நரேந்திர மோடி மாணவர்களிடம் மன்னிப்பு கேட்க வேண்டும் என்று காங்கிரஸ் தலைவர் மற்றும் எதிர்க்கட்சித் தலைவர் ராகுல் காந்தி வலியுறுத்தியுள்ளார். மாணவர்களின் கோரிக்கைகளை அரசு நிறைவேற்ற வேண்டும் என்று வலியுறுத்திய ராகுல் காந்தி, கல்வி அமைச்சர் தர்மேந்திர பிரதானை உடனடியாக பதவி நீக்கம் செய்ய வேண்டும் என்றும், தாக்குதலில் ஈடுபட்டவர்களுக்கு உரிய தண்டனை வழங்க வேண்டும் என்றும் கோரிக்கை விடுத்தார்.

இது தொடர்பாக டெல்லியில் செய்தியாளர்களிடம் பேசிய அவர், மாணவர்களின் எதிர்காலத்தோடு மத்திய அரசு விளையாடுவதாகக் குற்றம் சாட்டினார். ஜூலை 20 அன்று டெல்லியில் நடைபெற்ற மாணவர்கள் போராட்டத்தின்போது போலீஸார் மற்றும் பாதுகாப்புப் படையினர் மாணவர்கள் மீது தடியடி நடத்தியதாகவும், கண்ணீர் புகை குண்டுகள் பயன்படுத்தியதாகவும் ராகுல் காந்தி குற்றம் சாட்டினார்.

போராட்டத்தில் ஈடுபட்ட மாணவர்கள் அமைதியாகப் போராடிய நிலையில் அவர்கள் மீது நடத்தப்பட்ட இந்தத் தாக்குதல் கொடூரமானது என்று அவர் விமர்சித்தார்.ராகுல் காந்தி தலைமையில் காங்கிரஸ் தொண்டர்கள் மற்றும் எதிர்க்கட்சியினர் நாடாளுமன்ற வளாகத்தில் கருப்பு உடை அணிந்து போராட்டம் நடத்தினர். பின்னர் பிரதமர் இல்லத்திற்கு அருகே நடைபெற்ற பேரணியிலும் மாணவர்கள் மீதான தாக்குதலை கண்டித்து குரல் எழுப்பப்பட்டது.

இதையும் படிங்க: பறிபோன 21 இளம் உயிர்கள்... அரசின் பெரும் தோல்வி..! தர்மேந்திர பிரதான் பதவி விலக மாணிக்கம் தாகூர் வலியுறுத்தல்..!!

மாணவர்களின் பிரச்னைகளை முன்வைத்து ராகுல் காந்தி செய்தியாளர் சந்திப்பில் பேசியபோது, “இளைஞர்களை இப்படி நடத்தக்கூடாது. அவர்களின் குரலை அடக்க முடியாது. மாணவர்களுக்கு பேச உரிமை உண்டு, அரசு கேட்க வேண்டும்” என்று தெரிவித்தார். கடந்த பத்தாண்டுகளில் நாடு முழுவதும் 152க்கும் மேற்பட்ட தேர்வு வினாத்தாள் கசிவு சம்பவங்கள் நடைபெற்றுள்ளதாகவும், இதனால் சுமார் 7.5 கோடி மாணவர்கள் பாதிக்கப்பட்டுள்ளதாகவும் அவர் சுட்டிக்காட்டினார். எந்த ஒரு சம்பவத்திலும் உரிய நடவடிக்கை எடுக்கப்படவில்லை என்பதும் அவரது வாதம்.

மாணவர்களின் எதிர்காலத்தை பாதுகாக்க வேண்டிய அரசு அவர்களை ஒடுக்குவது ஏற்புடையதல்ல என்று விமர்சித்த ராகுல் காந்தி, மூன்று முக்கிய கோரிக்கைகளை முன்வைத்தார். பிரதமர் மோடி மாணவர்களிடம் மன்னிப்பு கேட்பது, கல்வி அமைச்சர் தர்மேந்திர பிரதானை பதவி நீக்கம் செய்வது மற்றும் தாக்குதலுக்குக் காரணமானவர்களுக்கு தண்டனை வழங்குவது ஆகியவை அந்தக் கோரிக்கைகள்.இந்த சம்பவம் தொடர்பாக அரசியல் களத்தில் பெரும் பரபரப்பு ஏற்பட்டுள்ளது.

இதையும் படிங்க: 12 வருடங்களாக கல்வியை சீரழித்த பாஜக அரசு... தொடரும் போராட்டங்கள்...! மல்லிகார்ஜுன கார்கே குற்றச்சாட்டு..!