இனி புக் பண்ணா 10 நிமிஷத்துல.. வீடு தேடி வரும் சிலிண்டர்..!! HPCL உடன் கைகோர்த்த இன்ஸ்டாமார்ட்..!!

ஆன்லைன் தளங்கள் மூலம் விரைவான வீட்டு விநியோக சேவையை வழங்கி வரும் ஸ்விக்கியின் இன்ஸ்டாமார்ட் சேவை, தற்போது சமையல் எரிவாயு சிலிண்டர்களையும் வாடிக்கையாளர்களின் வீடுகளுக்கு கொண்டு சேர்க்கும் புதிய முயற்சியை தொடங்கியுள்ளது. இதற்காக இந்துஸ்தான் பெட்ரோலியம் கார்ப்பரேஷன் லிமிடெட் (HPCL) நிறுவனத்துடன் இணைந்து செயல்படுவதாக ஸ்விக்கி அறிவித்துள்ளது.

முதற்கட்டமாக இந்த புதிய சேவை கர்நாடக மாநிலத்தின் பெங்களூருவில் அறிமுகப்படுத்தப்பட்டுள்ளது. அங்குள்ள வாடிக்கையாளர்களின் வரவேற்பு மற்றும் பயன்பாட்டை மதிப்பீடு செய்த பிறகு, சென்னை உள்ளிட்ட நாட்டின் பிற முக்கிய நகரங்களிலும் இந்த சேவையை விரிவுபடுத்த நிறுவனம் திட்டமிட்டுள்ளது. மளிகைப் பொருட்கள், வீட்டு உபயோகப் பொருட்கள் மற்றும் அழகு சாதனப் பொருட்களை குறுகிய நேரத்தில் வழங்கி வந்த இன்ஸ்டாமார்ட், தற்போது சமையல் எரிவாயு விநியோகத்தையும் தனது சேவையில் இணைத்திருப்பது குறிப்பிடத்தக்க முன்னேற்றமாக பார்க்கப்படுகிறது.

இந்த சேவையின் மூலம் 10 கிலோ எடையுள்ள HP Navya காம்போசிட் சிலிண்டர் மற்றும் சிறிய தேவைகளுக்கான 5 கிலோ எடையுள்ள வழக்கமான மெட்டல் எல்பிஜி சிலிண்டர் ஆகிய இரு வகைகளும் கிடைக்கும். குறிப்பாக, இந்த சிலிண்டர்களை வாங்குவதற்கு ஏற்கனவே எல்பிஜி இணைப்பு வைத்திருக்க வேண்டும் என்ற கட்டாயம் இல்லை என்று நிறுவனம் தெரிவித்துள்ளது. இதனால் புதிய பயனாளர்களும் எளிதாக இந்த சேவையைப் பயன்படுத்த முடியும்.

இதையும் படிங்க: பிரச்சனை தீர்ந்தாச்சு..!! ஆனாலும் விலை குறையாத சிலிண்டர்..!! வணிகர்கள் கவலை..!!

மேலும், முதல் முறையாக சிலிண்டர் வாங்கும் போது காலி சிலிண்டரை ஒப்படைக்க வேண்டிய அவசியமில்லை. அதன் பிறகு நடைபெறும் மாற்று சிலிண்டர் விநியோகங்களில் மட்டும் காலி சிலிண்டரை வழங்கி புதிய சிலிண்டரை பெற்றுக் கொள்ளலாம் என்ற நடைமுறையும் அறிமுகப்படுத்தப்பட்டுள்ளது. இந்த வசதி, குறிப்பாக மாணவர்கள், வேலைக்காக வேறு நகரங்களில் வசிக்கும் இளைஞர்கள், வாடகை வீடுகளில் தங்கியிருப்போர் மற்றும் சிறிய குடும்பங்களுக்கு மிகவும் பயனுள்ளதாக இருக்கும் என எதிர்பார்க்கப்படுகிறது.

பாதுகாப்பு அம்சங்களுக்கு முன்னுரிமை அளிக்கும் வகையில், இந்துஸ்தான் பெட்ரோலியத்தின் அங்கீகரிக்கப்பட்ட விநியோகஸ்தர்கள் மற்றும் உரிய பயிற்சி பெற்ற பணியாளர்கள் மூலமாகவே சிலிண்டர்கள் வீடுகளுக்கு பாதுகாப்பாக விநியோகிக்கப்படும் என்று நிறுவனங்கள் உறுதியளித்துள்ளன. விரைவான டெலிவரி, எளிய ஆர்டர் நடைமுறை மற்றும் பாதுகாப்பான சேவை ஆகியவற்றின் மூலம் நகர்ப்புற மக்களுக்கு மேலும் ஒரு வசதியான சமையல் எரிவாயு விநியோக மாற்றாக இந்த புதிய சேவை அமையும் என்று எதிர்பார்க்கப்படுகிறது.

இதையும் படிங்க: பிரச்சனை தீர்ந்தாச்சு..!! ஆனாலும் விலை குறையாத சிலிண்டர்..!! வணிகர்கள் கவலை..!!