வரலாற்று சாதனை! தமிழகம், மேற்கு வங்க வாக்காளர்களுக்கு தலைமை தேர்தல் ஆணையர் பாராட்டு!

தமிழகம் மற்றும் மேற்கு வங்க மாநிலங்களில் இன்று நடைபெற்ற சட்டமன்றத் தேர்தல்களில், இந்தியச் சுதந்திரத்திற்குப் பிந்தைய 74 ஆண்டுகால வரலாற்றில் இதுவரை கண்டிராத வகையில் மிக அதிகப்படியான வாக்குப்பதிவு பதிவாகியுள்ளது. இந்த மகத்தான ஜனநாயக எழுச்சியைப் பாராட்டி இந்தியத் தலைமைத் தேர்தல் ஆணையர் ஞானேஷ் குமார் வாக்காளர்களுக்குத் தனது வாழ்த்துகளையும் பாராட்டுகளையும் தெரிவித்துள்ளார்.

தமிழகம் மற்றும் மேற்கு வங்கத்தில் இன்று ஒரே கட்டமாகத் தேர்தல் நடைபெற்ற நிலையில், இரு மாநிலங்களுமே புதிய மைல்கற்களை எட்டியுள்ளன. மாலை 6 மணி நிலவரப்படி தோராயமாக 84.35 சதவீத வாக்குகள் பதிவாகி, 1952-ஆம் ஆண்டுக்குப் பிந்தைய அனைத்து சாதனைகளையும் முறியடித்துள்ளது. முதற்கட்டமாக 152 தொகுதிகளில் நடைபெற்ற தேர்தலில், மாலை 5 மணி நிலவரப்படியே 89.93 சதவீத வாக்குகள் பதிவாகி அதிரடி காட்டியுள்ளது.

வாக்காளர்களின் இந்த விஸ்வரூப பங்களிப்புக் குறித்து ஞானேஷ் குமார் தெரிவித்துள்ளதாவது சுதந்திரத்திற்குப் பின் தமிழகம் மற்றும் மேற்கு வங்கத்தில் இதுவரை இல்லாத அளவிற்கு அதிகபட்ச ஓட்டுப்பதிவு நடைபெற்றுள்ளது என அவர் பெருமிதத்துடன் குறிப்பிட்டுள்ளார். வெயில் மற்றும் நீண்ட வரிசையைப் பொருட்படுத்தாமல், ஜனநாயகத்தின் மீதான நம்பிக்கையுடன் வந்து தங்களது கடமையைச் செய்த வாக்காளர்களுக்கு அவர் வாழ்த்துகளைத் தெரிவித்துள்ளார்.

இதையும் படிங்க: ஜனநாயகத்தை காத்த தமிழக மக்கள்! வரலாற்று சாதனை படைத்த வாக்காளர்களுக்கு முதலமைச்சர் மு.க.ஸ்டாலின் பாராட்டு!

இவ்வளவு பெரிய அளவிலான வாக்குப்பதிவு நடைபெற்ற போதிலும், இரு மாநிலங்களிலும் தேர்தல் களம் பெரும்பாலும் அமைதியாகவே இருந்தது தேர்தல் ஆணையத்தின் சிறப்பான மேலாண்மைக்குச் சான்றாகப் பார்க்கப்படுகிறது. துணை ராணுவப் படைகளின் தீவிர கண்காணிப்பு மற்றும் சிசிடிவி கேமராக்கள் மூலம் ஒட்டுமொத்தப் பணிகளும் 'ஸ்மூத்' ஆக நடைபெற்று முடிந்துள்ளன. மாலை 6 மணிக்கு முன்னதாக வந்த அனைவருக்கும் டோக்கன் வழங்கி, ஒரு வாக்குகூட விடுபடாமல் இருப்பதைத் தேர்தல் ஆணையம் உறுதி செய்தது.

இந்தியாவின் இரண்டு பெரிய மாநிலங்களில் பதிவாகியுள்ள இந்த இமாலய வாக்குப்பதிவு சதவீதம், உலக நாடுகளின் கவனத்தைத் தற்போது இந்தியா பக்கம் திருப்பியுள்ளது. இது இந்திய ஜனநாயகத்தின் வலிமையை மீண்டும் ஒருமுறை உலகிற்குப் பறைசாற்றியுள்ளதாக அரசியல் வல்லுநர்கள் தெரிவிக்கின்றனர்.

தேர்தல் ஆணையத்தின் '100% வாக்குப்பதிவு' விழிப்புணர்வுப் பிரச்சாரத்திற்குத் தமிழக மற்றும் மேற்கு வங்க மக்கள் அளித்துள்ள இந்தத் தீர்ப்பு, வரும் மே மாதம் வெளியாகவுள்ள தேர்தல் முடிவுகளில் எத்தகைய அதிர்வுகளை ஏற்படுத்தும் என்ற எதிர்பார்ப்பு எகிறியுள்ளது.

இதையும் படிங்க: ஹார்முஸ் நீரிணை எங்கள் வசம்! ஈரானை எச்சரித்து டொனால்ட் டிரம்ப் பதிவு!