இந்தியாவில் ஸ்டார்லிங்கை தடுப்பது யார்? நீங்களே யூகித்துக்கொள்ளுங்கள்! எலான் மஸ்க்கின் பதிவால் பரபரப்பு!

இந்தியாவில் செயற்கைக்கோள் மூலம் இணைய சேவையை வழங்கும் முயற்சியில் ஈடுபட்டுள்ள எலான் மஸ்க்கின் ஸ்டார்லிங்க் நிறுவனம் தொடர்பாக தற்போது புதிய சர்ச்சை உருவாகியுள்ளது. இந்தியாவில் ஸ்டார்லிங்க் சேவை தொடங்குவதற்கான பணிகள் நடைபெற்று வரும் நிலையில், சில பணக்காரர்கள் தனது நிறுவனத்தின் செயல்பாட்டை தடுக்க முயற்சிப்பதாக எலான் மஸ்க் எக்ஸ் தளத்தில் குற்றம்சாட்டியுள்ளார்.

மொபைல் போன் சிக்னல் மற்றும் பாரம்பரிய இணைய வசதி குறைவாக உள்ள தொலைதூர பகுதிகளுக்கும் செயற்கைக்கோள் வழியாக இணைய சேவையை வழங்குவது ஸ்டார்லிங்கின் முக்கிய திட்டமாகும். இந்தியாவில் ஸ்டார்லிங்க் சேவையை தொடங்குவதற்கான சில முக்கிய அனுமதிகளை நிறுவனம் பெற்றுள்ள நிலையில், பாதுகாப்பு ஒப்புதல் உள்ளிட்ட சில நடைமுறைகள் இன்னும் முழுமையாக நிறைவடைய வேண்டியுள்ளது.

இந்த நிலையில், எக்ஸ் தளத்தில் ஒரு பயனர் இந்தியாவுக்கு ஸ்டார்லிங்க் தேவை என பதிவிட்டிருந்தார். இந்தியாவில் 11,256 கிராமங்களில் 4ஜி சேவை கிடைப்பதில் இன்னும் சிக்கல் இருப்பதாக அந்த பதிவில் குறிப்பிடப்பட்டிருந்தது. தொலைதூர பகுதிகளுக்கு செயற்கைக்கோள் இணையம் கூடுதல் வாய்ப்பை வழங்கக்கூடும் என்றும் அதில் தெரிவிக்கப்பட்டிருந்தது.

இதையும் படிங்க: நரேந்திர மோடி மைதானத்தை குறிவைத்து வெடிகுண்டு மிரட்டல்! அகமதாபாத்தில் பரபரப்பை ஏற்படுத்திய இ-மெயில்!

இந்த பதிவுக்கு பதிலளித்த எலான் மஸ்க், இந்திய மக்களிடையே ஏகபோக ஆதிக்கத்தை தொடர விரும்பும் சில பணக்காரர்கள் ஸ்டார்லிங்க் இந்தியாவுக்குள் வருவதை தடுக்கின்றனர் என்று குற்றம்சாட்டினார்.

அவர்கள் யார் என்பதை பொதுமக்களே யூகித்துக்கொள்ளலாம் என்றும், இது இந்திய மக்களுக்கு எதிரான குற்றம் என்றும் அவர் பதிவிட்டார். எனினும், தனது பதிவில் குறிப்பிட்ட நபர்களின் பெயர்களை மஸ்க் வெளியிடவில்லை.

மஸ்க்கின் இந்த குற்றச்சாட்டுக்கு மத்திய அரசு மறுப்பு தெரிவித்துள்ளது. இந்தியாவில் செயற்கைக்கோள் இணைய சேவைக்கான அனுமதி நடைமுறை அனைத்து நிறுவனங்களுக்கும் ஒரே மாதிரியாக இருப்பதாகவும், ஸ்டார்லிங்க் உள்ளிட்ட நிறுவனங்கள் ஒரே மாதிரியான ஒழுங்குமுறை நிலையில் இருப்பதாகவும் அரசு தெரிவித்துள்ளது. எனவே, நடைமுறை பாரபட்சமானது என்ற குற்றச்சாட்டு ஆதாரமற்றது என்றும் மத்திய அரசு கூறியுள்ளது.

இதனால், இந்தியாவில் ஸ்டார்லிங்க் சேவை தொடங்குவது தொடர்பான விவகாரம் தற்போது புதிய விவாதத்தை ஏற்படுத்தியுள்ளது. தொலைதூர கிராமங்களுக்கு இணைய வசதியை விரிவுபடுத்துவது ஒருபுறம் இருக்க, பாதுகாப்பு, ஸ்பெக்ட்ரம் ஒதுக்கீடு மற்றும் ஒழுங்குமுறை அனுமதிகள் மறுபுறம் முக்கிய காரணிகளாக உள்ளன.

இதையும் படிங்க: இந்தியாவை குறிவைக்கும் புதிய பயங்கரவாத அலை? இஸ்ரேல் தூதர் விடுத்த அதிர்ச்சி எச்சரிக்கை!