தங்கம் வாங்காதீங்க.. பிரதமர் மோடியின் மக்கள் தியாக வேண்டுகோள்..!! ராகுல் காந்தி கடும் எதிர்ப்பு..!!

மேற்காசியப் பகுதியில் நிலவும் போர் நெருக்கடியால் அந்நிய செலாவணி இருப்பைப் பாதுகாக்கும் நோக்கில், பிரதமர் நரேந்திர மோடி மக்களுக்கு சிக்கன நடவடிக்கைகளை வலியுறுத்தியுள்ளார். குறிப்பாக, திருமணங்களுக்காக ஒரு ஆண்டு காலம் தங்கம் வாங்க வேண்டாம் என்றும், எரிபொருட்களை மிகுந்த சிக்கனத்துடன் பயன்படுத்த வேண்டும் என்றும் அவர் அறிவுறுத்தியுள்ளது பெரும் விவாதத்தை ஏற்படுத்தியுள்ளது.

பிரதமர் மோடி தனது உரையில், தேசத்தின் பொருளாதார நிலையை உறுதிப்படுத்த மக்கள் சில தியாகங்களை மேற்கொள்ள வேண்டிய கட்டாயம் ஏற்பட்டுள்ளதாகக் குறிப்பிட்டார். வெளிநாட்டுப் பயணங்களைக் குறைத்தல், பெட்ரோல் மற்றும் டீசல் பயன்பாட்டை மட்டுப்படுத்தல், உரம் மற்றும் சமையல் எண்ணெய் போன்ற அத்தியாவசியப் பொருட்களின் நுகர்வைக் குறைத்தல், மெட்ரோ ரயில்களைப் பயன்படுத்தி பயணம் செய்தல் மற்றும் வீட்டிலிருந்து வேலை செய்யும் பழக்கத்தை ஊக்குவித்தல் உள்ளிட்ட பல்வேறு நடவடிக்கைகளை அவர் பரிந்துரை செய்தார்.

இந்த நெருக்கடி மத்திய கிழக்கு பகுதியில் தொடரும் பதற்றத்தால் ஏற்பட்ட அந்நிய செலாவணி அழுத்தத்தைச் சமாளிக்க உதவும் என்று அரசு வட்டாரங்கள் தெரிவிக்கின்றன. எதிர்க்கட்சி தரப்பில் இந்த அறிவுரைக்கு கடும் எதிர்ப்பு எழுந்துள்ளது. பாராளுமன்ற மக்களவை எதிர்க்கட்சித் தலைவர் ராகுல் காந்தி தனது எக்ஸ் (முன்பு ட்விட்டர்) பக்கத்தில் இதற்கு தீவிரமான கண்டனம் தெரிவித்துள்ளார். “நேற்று மோடி அவர்கள் மக்களிடம் தியாகம் செய்யுமாறு கேட்டுக்கொண்டார். 

இதையும் படிங்க: தமிழக முதல்வர் விஜய்யின் அடுத்த பிளான்..!! பிரதமர் மோடி, சோனியாவை சந்திக்க திட்டம்..!!

தங்கம் வாங்காதீர்கள், வெளிநாடு செல்லாதீர்கள், பெட்ரோல் பயன்பாட்டைக் குறையுங்கள், உரம் மற்றும் சமையல் எண்ணெய் பயன்பாட்டைக் குறைத்துக் கொள்ளுங்கள், மெட்ரோவில் பயணியுங்கள், வீட்டிலிருந்தே வேலை செய்யுங்கள் என்று கூறினார்” என ராகுல் காந்தி தனது பதிவில் எடுத்துக் காட்டினார். இது வெறும் அறிவுரை அல்ல, 12 ஆண்டுகால ஆட்சியின் தோல்வியை ஒப்புக்கொள்வதற்கான சான்று என்று அவர் விமர்சித்தார். “நாட்டை இந்த நிலைக்கு கொண்டு வந்த பிறகு, மக்கள் என்ன வாங்கலாம், என்ன வாங்கக் கூடாது, எங்கே செல்லலாம், எங்கே செல்லக் கூடாது என்று சொல்லும் நிலை உருவாகியுள்ளது” என்று ராகுல் காந்தி குறிப்பிட்டார்.

ஒவ்வொரு முறையும் பொருளாதாரப் பிரச்னைகளின் பொறுப்பை மக்கள் மீது சுமத்திவிட்டு, தாங்கள் தப்பித்துக் கொள்ளும் அரசின் மனநிலையை இது வெளிப்படுத்துவதாகவும் அவர் தெரிவித்தார். நாட்டை நடத்தும் பொறுப்பை சமரச அரசியலுக்கு அப்பாற்பட்டு திறம்படச் செய்ய முடியாத நிலை ஏற்பட்டுவிட்டதாகவும், இத்தகைய அணுகுமுறை நாட்டின் வளர்ச்சியை பாதிப்பதாகவும் எதிர்க்கட்சித் தலைவர் சாடினார்.

இந்த விவகாரம் அரசியல் களத்தில் பெரும் பரபரப்பை ஏற்படுத்தியுள்ளது. பொருளாதார நிபுணர்கள், தங்க இறக்குமதியைக் குறைப்பதன் மூலம் அந்நிய செலாவணி செலவை மிச்சப்படுத்த முடியும் என்றாலும், மக்களின் அன்றாட வாழ்க்கை மற்றும் திருமணப் பழக்கவழக்கங்களில் ஏற்படும் தாக்கம் குறித்து கவலை தெரிவிக்கின்றனர். இந்த சூழலில், அரசு தரப்பில் மேலும் விரிவான விளக்கங்கள் மற்றும் மாற்று ஏற்பாடுகள் குறித்த அறிவிப்புகள் எதிர்பார்க்கப்படுகின்றன.

இதையும் படிங்க: 75வது ஆண்டு நிறைவு விழா: சோமநாதர் கோயில் அமுதப் பெருவிழா கோலாகலம்.. பிரதமர் மோடி சாமி தரிசனம்..!!