ஞானேஷ் குமாருக்கு எதிரான வழக்குகள்..! உச்சநீதிமன்றம் அதிரடி நோட்டீஸ்.! சிக்கலில் தேர்தல் ஆணையம்..!!

உச்ச நீதிமன்றம், சிறப்பு தீவிர திருத்தம் எனப்படும் எஸ்.ஐ.ஆர். நடவடிக்கை தொடர்பாக தலைமை தேர்தல் ஆணையர் ஞானேஷ் குமாரின் செயல்பாடுகளையும் முடிவுகளையும் கேள்விக்குட்படுத்தி தொடரப்பட்ட மனுக்களை விசாரணைக்கு எடுத்துக்கொண்டு, தேர்தல் ஆணையம், மத்திய அரசு, தலைமை தேர்தல் ஆணையர் உள்ளிட்டோருக்கு நோட்டீஸ் அனுப்பியுள்ளது. இந்த மனுக்கள், இரு தேர்தல் ஆணையர்களின் ஒப்புதல் இல்லாமல் ஒருதலைப்பட்சமாக முடிவுகள் எடுக்கப்பட்டதாகக் குற்றம்சாட்டி, தலைமை தேர்தல் ஆணையரை பதவி நீக்கம் செய்யக் கோருவதோடு, அவ்வாறு எடுக்கப்பட்ட முடிவுகளுக்கு தடை விதிக்கவும் வலியுறுத்துகின்றன.வாக்காளர் பட்டியலை புதுப்பிக்கும் நோக்கில் தேர்தல் ஆணையம் மேற்கொண்டு வரும் எஸ்.ஐ.ஆர். நடவடிக்கை, பல்வேறு மாநிலங்களிலும் யூனியன் பிரதேசங்களிலும் நடைபெற்று வருகிறது.

இந்தப் பணியின் போது ஏராளமான பெயர்கள் பட்டியலிலிருந்து நீக்கப்பட்டுள்ளன என்றும், அதனால் வாக்காளர் உரிமைகள் பாதிக்கப்படும் அபாயம் உள்ளது என்றும் குற்றச்சாட்டுகள் எழுந்துள்ளன. இந்தச் சூழலில்தான், தேர்தல் ஆணையத்தின் உள்ளேயே கருத்து வேறுபாடுகள் இருப்பதாக வெளிவந்த தகவல்கள் பெரும் சர்ச்சையை ஏற்படுத்தின. மற்ற இரு தேர்தல் ஆணையர்களான சுக்பீர் சிங் சந்து மற்றும் விவேக் ஜோஷி ஆகியோர், பல முக்கிய முடிவுகள் தங்களின் அறிவுக்கோ ஒப்புதலுக்கோ வராமல் ஆணையத்தின் பெயரில் எடுக்கப்பட்டதாக எழுத்துப்பூர்வமாக ஆட்சேபனைகளைப் பதிவு செய்திருப்பதாகக் கூறப்படுகிறது. இந்த ஆட்சேபனைகள் வாக்காளர் பதிவு, பெயர் நீக்கம், மென்பொருள் மாற்றங்கள், படிவம் 6 தொடர்பான நடைமுறைகள் உள்ளிட்ட அம்சங்களை உள்ளடக்கியவை என்று மனுக்களில் சுட்டிக்காட்டப்பட்டுள்ளது.

இந்தப் பின்னணியில் உச்ச நீதிமன்றத்தில் பொதுநல மனுக்கள் தாக்கல் செய்யப்பட்டன. ஒரு மனுவில், தேர்தல் ஆணையம் பல உறுப்பினர்கள் கொண்ட அமைப்பு என்பதால், அதன் முடிவுகள் ஒருமித்த கருத்தின் அடிப்படையிலோ அல்லது பெரும்பான்மை கருத்தின் அடிப்படையிலோ எடுக்கப்பட வேண்டும் என்றும், தலைமை தேர்தல் ஆணையர் தனியாக அதிகாரத்தைப் பயன்படுத்த முடியாது என்றும் வாதிடப்பட்டுள்ளது. அவர் பதவியில் தொடர்வது தேர்தல் செயல்முறையின் நம்பகத்தன்மையைப் பாதிக்கும் என்பதால், விசாரணை முடியும் வரை அவரை இடைநீக்கம் செய்ய வேண்டும் என்றும் கோரப்பட்டுள்ளது. மற்றொரு மனுவில், எஸ்.ஐ.ஆர். தொடர்பான முடிவுகளை ரத்து செய்யக் கோருவதோடு, பெயர் நீக்கங்கள் குறித்து சிறப்பு விசாரணை குழு அல்லது நீதித்துறை விசாரணை ஆணையம் அமைக்க வேண்டும் என்றும் வலியுறுத்தப்பட்டுள்ளது. மேலும், தொடர்புடைய அதிகாரிகள் மீது சட்ட நடவடிக்கை எடுக்க வேண்டும் என்றும் கோரிக்கைகள் இடம்பெற்றுள்ளன.

இதையும் படிங்க: தலைமை தேர்தல் ஆணையர் ஞானேஷ் குமார் மீது லஞ்ச ஒழிப்பு விசாரணை! கேரளம் அரசு உத்தரவு!

தலைமை நீதிபதி சூர்யகாந்த் தலைமையிலான அமர்வு இந்த மனுக்களை விசாரித்தது. மனுதாரர்கள் தரப்பில், தேர்தல் ஆணையத்தின் நம்பகத்தன்மை கேள்விக்குள்ளாகி உள்ளதாகவும், உடனடி இடைக்கால உத்தரவு தேவை என்றும் வாதிடப்பட்டது. ஆனால் நீதிமன்றம், செய்தி அறிக்கைகளை மட்டும் அடிப்படையாகக் கொண்டு உடனடி உத்தரவு பிறப்பிக்க முடியாது என்று தெளிவுபடுத்தியது. முதலில் சம்பந்தப்பட்ட தரப்பினரின் பதிலைப் பெற வேண்டும் என்றும், அதன்பிறகுதான் முடிவுகளை ஆய்வு செய்ய முடியும் என்றும் கூறியது. தேர்தல் ஆணையம் சட்டப்படி செயல்படும் என்ற எதிர்பார்ப்பு உள்ளதாகவும், ஒருமித்த கருத்து அல்லது பெரும்பான்மை இல்லாமல் முடிவுகள் எடுக்கப்பட்டிருந்தால் அதை விளக்க வேண்டும் என்றும் நீதிபதிகள் குறிப்பிட்டனர். சட்டத்திற்கு முரணான முடிவுகள் கண்டறியப்பட்டால் அவற்றை ரத்து செய்யும் அதிகாரம் நீதிமன்றத்திற்கு உள்ளது என்பதையும் வலியுறுத்தினர்.

அதேநேரம், தலைமை தேர்தல் ஆணையரை இடைநீக்கம் செய்யும் இடைக்கால உத்தரவைப் பிறப்பிக்க மறுத்துவிட்டனர். யார் தேர்தலை நடத்துவார்கள் என்ற கேள்வியையும் எழுப்பினர்.நீதிமன்றம், மத்திய அரசு, தேர்தல் ஆணையம், தலைமை தேர்தல் ஆணையர், மற்ற இரு தேர்தல் ஆணையர்கள் உள்ளிட்டோருக்கு நோட்டீஸ் அனுப்பி, குறிப்பிட்ட காலத்திற்குள் பதிலளிக்குமாறு உத்தரவிட்டுள்ளது. தேர்தல் ஆணையத்தின் முடிவுகள் தொடர்பான ஆவணங்களையும் சமர்ப்பிக்கும்படி கோரப்பட்டுள்ளது. இந்த வழக்கு, தேர்தல் ஆணையத்தின் உள் செயல்பாடு, அதன் கூட்டு முடிவெடுக்கும் தன்மை, வாக்காளர் பட்டியல் திருத்த நடைமுறைகள் ஆகியவற்றைப் பற்றிய முக்கியமான சட்டப்பூர்வ கேள்விகளை எழுப்பியுள்ளது. 

இதையும் படிங்க: தேர்தல் ஆணையருக்கு எதிராக திரண்ட மக்கள் கூட்டம்! மும்பை சிவாஜி பூங்காவில் CJP போராட்டம்!