ஜூன் 5 வரை கொட்டப்போகும் கனமழை! ஆரஞ்ச், எல்லோ அலர்ட்டால் திணறும் கேரளா!

கேரளாவில் அடுத்த சில நாட்களுக்கு கனமழை தொடரும் என இந்திய வானிலை ஆய்வு மையம் எச்சரிக்கை விடுத்துள்ளது. இதையடுத்து மாநிலத்தின் பல மாவட்டங்களுக்கு ஆரஞ்ச் மற்றும் எல்லோ அலர்ட்கள் அறிவிக்கப்பட்டுள்ளன. ஜூன் 5 வரை நீடிக்கும் இந்த எச்சரிக்கை காரணமாக, பொதுமக்கள் தேவையற்ற பயணங்களை தவிர்க்கவும், பாதுகாப்பு நடவடிக்கைகளை கடைப்பிடிக்கவும் அதிகாரிகள் அறிவுறுத்தியுள்ளனர்.

கடந்த ஆண்டு தென்மேற்கு பருவமழை வழக்கத்தை விட முன்கூட்டியே மே 24-ஆம் தேதி கேரளாவில் தொடங்கியது. இந்த ஆண்டும் மாநிலத்தின் பல பகுதிகளில் மழை பெய்து வரும் நிலையில், பருவமழை அதிகாரப்பூர்வமாக தொடங்கியதாக இந்திய வானிலை ஆய்வு மையம் இன்னும் அறிவிக்கவில்லை. இருப்பினும், அடுத்த சில நாட்களில் மழை தீவிரமடையும் என கணிக்கப்பட்டுள்ளது.

ஜூன் 3-ஆம் தேதி ஆலப்புழா, கோட்டயம், எர்ணாகுளம் மற்றும் திருச்சூர் மாவட்டங்களுக்கு ஆரஞ்ச் அலர்ட் விடுக்கப்பட்டுள்ளது. ஜூன் 4-ஆம் தேதி திருவனந்தபுரம், கொல்லம், பத்தனம்திட்டா, ஆலப்புழா, கோட்டயம், இடுக்கி, எர்ணாகுளம் மற்றும் திருச்சூர் மாவட்டங்களில் கனமழை பெய்யக்கூடும் என எச்சரிக்கப்பட்டுள்ளது. ஜூன் 5-ஆம் தேதி இடுக்கி, எர்ணாகுளம், திருச்சூர், பாலக்காடு, மலப்புரம் மற்றும் கோழிக்கோடு மாவட்டங்களுக்கு ஆரஞ்ச் அலர்ட் தொடர்கிறது.

இதையும் படிங்க: சுத்துப்போட்ட வளிமண்டல சுழற்சி! இன்று முதல் 3 நாட்களுக்கு கொட்டப்போகும் கனமழை! வெதர் அப்டேட்!

இதேநேரத்தில், பல்வேறு மாவட்டங்களுக்கு எல்லோ அலர்ட்டும் அறிவிக்கப்பட்டுள்ளது. மழையின் தீவிரம் மற்றும் நிலைமையை தொடர்ந்து கண்காணித்து வரும் அதிகாரிகள், மலைப்பகுதிகள் மற்றும் வெள்ள அபாயம் உள்ள பகுதிகளில் வசிக்கும் மக்கள் கூடுதல் எச்சரிக்கையுடன் இருக்குமாறு கேட்டுக்கொண்டுள்ளனர்.

வானிலை ஆய்வு மையத்தின் கணிப்பின்படி, ஆரஞ்ச் அலர்ட் விடுக்கப்பட்ட மாவட்டங்களில் 24 மணி நேரத்தில் 115.6 மில்லிமீட்டர் முதல் 204.4 மில்லிமீட்டர் வரை மழை பதிவாகலாம். எல்லோ அலர்ட் பகுதிகளில் 64.5 மில்லிமீட்டர் முதல் 115.5 மில்லிமீட்டர் வரை மழை பெய்ய வாய்ப்புள்ளது.

இதன் காரணமாக மாநில பேரிடர் மேலாண்மை ஆணையம் பல்வேறு முன்னெச்சரிக்கை நடவடிக்கைகளை மேற்கொண்டுள்ளது. பள்ளத்தாக்கு பகுதிகள், ஆற்றங்கரைகள் மற்றும் மலைப்பகுதிகளில் வசிப்பவர்கள் பாதுகாப்பாக இருக்க வேண்டும் என்றும், அதிகாரப்பூர்வ அறிவிப்புகளை தொடர்ந்து கவனிக்க வேண்டும் என்றும் அறிவுறுத்தப்பட்டுள்ளது. கேரளாவில் பருவமழை தீவிரமடையும் சூழல் உருவாகியுள்ளதால், அடுத்த சில நாட்கள் மிகவும் முக்கியமானதாக கருதப்படுகின்றன.

இதையும் படிங்க: 5 நாட்களில் துவங்குகிறது தென்மேற்கு பருவமழை!! நாளை 17 மாவட்டங்களில் கனமழை! வெதர் அப்டேட்!