நேபாளத்திற்கு 10 டன் நிவாரணப் பொருட்கள்: இந்திய விமானப்படையின் C-130J விமானம் விரைந்தது!

நேபாள நாட்டில் வரலாறு காணாத வகையில் ஏற்பட்டுள்ள பெருவெள்ளம் மற்றும் நிலச்சரிவு பேரிடரால் பாதிக்கப்பட்டுள்ள மக்களுக்கு உதவும் வகையில், சுமார் 10 டன் எடையுள்ள அவசரக்கால நிவாரணப் பொருட்களுடன் இந்திய விமானப்படைக்குச் சொந்தமான பிரம்மாண்ட C-130J சூப்பர் ஹெர்குலஸ் விமானம் தலைநகர் புதுடெல்லியில் இருந்து நேபாளத்திற்குப் புறப்பட்டுச் சென்றுள்ளது.

இமயமலைப் பகுதியில் பெய்த கனமழை மற்றும் காட்டாற்று வெள்ளம் காரணமாக நேபாளத்தின் பல்வேறு மாவட்டங்கள் கடுமையான சேதத்தைச் சந்தித்துள்ளன. லட்சக்கணக்கான மக்கள் தங்களது இருப்பிடங்களை இழந்து உணவும் மருந்துகளும் இன்றித் தவித்து வரும் சூழலில், அண்டை நாடான இந்திய அரசு உடனடியாகத் தனது மனிதாபிமான உதவிக் கரத்தை நீட்டியுள்ளது

மத்திய வெளியுறவுத்துறை அமைச்சகம் மற்றும் இந்திய விமானப்படை ஒருங்கிணைந்து முன்னெடுத்துள்ள இந்த அவசர நடவடிக்கையில், இந்திய விமானப்படையின் அதிநவீன போக்குவரத்து விமானமான C-130J விமானம் மூலம் அத்தியாவசியப் பொருட்கள் அனுப்பி வைக்கப்பட்டுள்ளன. இதில் வெள்ளத்தால் வீடுகளை இழந்த மக்களுக்குப் பயன்படும் வகையில் தற்காலிகக் கூடாரங்கள் (டெண்ட்கள்), கம்பளிகள், போர்வைகள், உடனடியாக உட்கொள்ளக்கூடிய உலர் உணவுப் பொட்டலங்கள், குடிநீர் சுத்தி செய்யும் மாத்திரைகள் மற்றும் அவசரக்கால உயிர்காக்கும் மருந்துகள் உள்ளிட்ட சுமார் 10 டன் அளவிலான நிவாரணப் பொருட்கள் முழுமையாக ஏற்றப்பட்டு நேபாளத் தலைநகர் காத்மாண்டுவிற்கு அனுப்பி வைக்கப்பட்டுள்ளன.

இதையும் படிங்க: மீட்புக் குழுக்கள் உதவி தேவையில்லை: நேபாள அரசு அதிரடி முடிவு! 

பேரிடர் காலங்களில் அண்டை நாடுகளுக்கு முன்னுரிமை அளித்து உதவும் இந்தியாவின் 'அண்டை நாடுகளுக்கு முதலிடம்' (Neighbourhood First) கொள்கையின்படி, பாதிக்கப்பட்ட நேபாள மக்களுக்குத் தேவையான அனைத்து மனிதாபிமான உதவிகளையும் இந்தியா தொடர்ந்து வழங்கும் என மத்திய அரசு வட்டாரங்கள் உறுதிபடத் தெரிவித்துள்ளன.

இதையும் படிங்க: நேபாளத்தின் இயற்கை அழகில் தமிழர்கள்.. வைரலாகும் கடைசி ஃபோட்டோ..!! வேதனையில் உறவினர்கள்!!