அதிமுக ஆட்சி அமைந்ததும் உரிய நடவடிக்கை! விளாத்திகுளம் மாணவி குடும்பத்தினருக்கு ஈபிஎஸ் உறுதி!

தூத்துக்குடி மாவட்டம் விளாத்திகுளம் அருகே படுகொலை செய்யப்பட்ட பிளஸ் 2 மாணவியின் குடும்பத்தினரைத் தொலைபேசி வாயிலாகத் தொடர்பு கொண்ட அதிமுக பொதுச்செயலாளர் எடப்பாடி கே. பழனிசாமி (ஈபிஎஸ்), அவர்களுக்குத் தனது ஆழ்ந்த இரங்கலையும் ஆறுதலையும் தெரிவித்தார்.

மாணவியின் தந்தையிடம் பேசிய ஈபிஎஸ், இந்தக் கொடூரச் செயலில் ஈடுபட்டவர்கள் யாராக இருந்தாலும் தப்பிக்க முடியாது. அதிமுக ஆட்சி அமைந்தவுடன் இந்த வழக்கில் உரிய நடவடிக்கை எடுத்து, குற்றவாளிகளுக்குக் கடுமையான தண்டனை பெற்றுத் தருவோம். அதுவரை மன உறுதியுடன் இருங்கள் என நம்பிக்கை அளித்தார்.

முன்னதாக தனது எக்ஸ் (X) தளத்தில் பதிவிட்டிருந்த அவர், திமுக ஆட்சியில் பெண்களுக்குப் பாதுகாப்பு என்பது கேள்விக்குறியாகிவிட்டது. புகார் அளிக்கச் சென்ற பெற்றோரை அலைக்கழித்த காவல்துறையின் அலட்சியமே இந்த உயிரிழப்பிற்குக் காரணம் எனச் சாடினார். மார்ச் 10-ஆம் தேதி இயற்கை உபாதைக்காகச் சென்ற 17 வயது மாணவி, மறுநாள் சடலமாக மீட்கப்பட்டார். இச்சம்பவத்தில் புகார் அளிக்க வந்த பெற்றோரைப் அலைக்கழித்ததாக விளாத்திகுளம் அனைத்து மகளிர் காவல் நிலைய ஆய்வாளர் பிரவீணா தற்போது பணியிடை நீக்கம் செய்யப்பட்டுள்ளார்.

இதையும் படிங்க: தவறுதலாக பேசிவிட்டேன்! நடிகை குறித்த சர்ச்சை பேச்சுக்கு சி.வி. சண்முகம் வருத்தம்!

இந்த வழக்கை விசாரிக்கத் தூத்துக்குடி மாவட்ட எஸ்.பி. மாதன் தலைமையில் 10 தனிப்படைகள் அமைக்கப்பட்டுள்ளன. இதுவரை 5 நாட்களாகியும் முக்கியக் குற்றவாளிகள் கைது செய்யப்படாதது அப்பகுதியில் பெரும் கொந்தளிப்பை ஏற்படுத்தியுள்ளது. தேர்தல் களம் சூடுபிடித்துள்ள நிலையில், அதிமுக பொதுச்செயலாளர் நேரடியாகப் பாதிக்கப்பட்ட குடும்பத்திற்கு ஆறுதல் கூறியிருப்பது தூத்துக்குடி மாவட்டத்தில் அரசியல் ரீதியாகவும் முக்கியத்துவம் பெற்றுள்ளது.

இதையும் படிங்க: தேர்தலில் போட்டியில்லை! அதிமுக கூட்டணியில் நிபந்தனையற்ற ஆதரவை அறிவித்தார் டிடிவி தினகரன்!