காஷ்மீரில் அதிரடி என்கவுண்டர்! லஷ்கர் தளபதி யாசிர் சுட்டுக்கொலை! பாதுகாப்புப் படையினர் ஆபரேஷன் சக்சஸ்!

ஜம்மு-காஷ்மீரில் பாதுகாப்புப் படையினர் நடத்திய தீவிர தேடுதல் வேட்டையின்போது, லஷ்கர்-இ-தொய்பா அமைப்புடன் தொடர்புடையதாக கூறப்படும் முக்கிய தளபதி யாசிர் சுட்டுக்கொல்லப்பட்டதாக தகவல் வெளியாகியுள்ளது. மத்திய காஷ்மீரின் புட்காம் மாவட்டத்தில் உள்ள யூஸ்மார்க் மலைப்பகுதியில் இந்த என்கவுண்டர் நடைபெற்றதாக கூறப்படுகிறது.

பாதுகாப்பு அமைப்புகளுக்கு கிடைத்த உளவுத்துறை தகவலின்படி, யூஸ்மார்க் பகுதியில் யாசிரின் நடமாட்டம் சமீபகாலமாக அதிகரித்திருந்ததாக தெரிகிறது. இதையடுத்து இந்திய ராணுவத்தின் சிறப்புப் படையினர் மற்றும் ராஷ்ட்ரீய ரைபிள்ஸ் வீரர்கள் இணைந்து அப்பகுதியில் தீவிர தேடுதல் நடவடிக்கையில் ஈடுபட்டனர்.

தேடுதல் வேட்டை நடைபெற்றபோது, பாதுகாப்புப் படையினருக்கும் பயங்கரவாதிகள் என சந்தேகிக்கப்படும் நபர்களுக்கும் இடையே துப்பாக்கிச் சண்டை ஏற்பட்டதாக கூறப்படுகிறது. இந்த மோதலின் முடிவில் யாசிர் சுட்டுக்கொல்லப்பட்டதாக பாதுகாப்பு தரப்பில் தெரிவிக்கப்பட்டுள்ளது. சம்பவம் நடைபெற்ற பகுதியில் தொடர்ந்து பாதுகாப்பு நடவடிக்கைகள் மேற்கொள்ளப்பட்டதாகவும் தகவல் வெளியாகியுள்ளது.

இதையும் படிங்க: ஆக்கிரமிப்பு காஷ்மீரில் போராட்டம்... திடீரென பல்டி அடித்த பாகிஸ்தான்? இந்திய ஆதரவாளர்கள் என குற்றச்சாட்டு!

யாசிர் யார் என்ற கேள்வி தற்போது முக்கியத்துவம் பெற்றுள்ளது. 2025-ம் ஆண்டு பஹல்காமில் நடைபெற்ற பயங்கரவாதத் தாக்குதலுடன் தொடர்புடைய முக்கிய நபராக பாதுகாப்பு அமைப்புகளால் கருதப்பட்டதாக கூறப்படும் சுலைமான் மூசா என்ற ஹாஷிம் மூசாவின் குழுவில் யாசிர் இருந்ததாக தகவல்கள் தெரிவிக்கின்றன.

சுலைமான் மூசா லஷ்கர்-இ-தொய்பாவின் முக்கிய தளபதியாக செயல்பட்டதாக கூறப்பட்ட நிலையில், பின்னர் ஸ்ரீநகரின் டாச்சிகாம் வனப்பகுதியில் பாதுகாப்புப் படையினர் நடத்திய நடவடிக்கையில் அவர் கொல்லப்பட்டதாக தெரிவிக்கப்பட்டுள்ளது. இதன்பிறகு யாசிர் அந்தக் குழுவிலிருந்து பிரிந்து, தனியாக செயல்பட்டு வந்ததாக பாதுகாப்பு வட்டாரங்கள் கூறுகின்றன.

கடந்த சில காலமாக காஷ்மீரில் பயங்கரவாத எதிர்ப்பு நடவடிக்கைகள் தீவிரப்படுத்தப்பட்டுள்ள நிலையில், யாசிரின் என்கவுண்டர் பாதுகாப்பு அமைப்புகளுக்கு முக்கிய வெற்றியாக பார்க்கப்படுகிறது. இருப்பினும், அவர் சமீபத்திய பயங்கரவாத சம்பவங்களில் எந்த அளவுக்கு தொடர்பு கொண்டிருந்தார் என்பது குறித்து விசாரணை தொடர்ந்து நடைபெற்று வருகிறது.

மேலும், யாசிருடன் தொடர்பில் இருந்ததாக சந்தேகிக்கப்படும் பிற நபர்கள் குறித்தும் பாதுகாப்பு அமைப்புகள் விசாரணை நடத்தி வருவதாக தகவல் வெளியாகியுள்ளது. இந்த நடவடிக்கையின் தொடர்ச்சியாக காஷ்மீரின் சில பகுதிகளில் கண்காணிப்பு மற்றும் தேடுதல் பணிகள் மேலும் தீவிரப்படுத்தப்படலாம் என எதிர்பார்க்கப்படுகிறது.

இதையும் படிங்க: காலையிலேயே சீறிப்பாய்ந்த தோட்டா... 6 வயது சிறுமியை பாலியல் வன்கொடுமை செய்து கொன்ற காமக்கொடூரன் என்கவுண்டரில் சுட்டுக்கொலை...!